Read lango Olevi 23 Bible Online

Olevi 23 - lango bible

Olevi 23

¹Rwot okobbi Muca ni,

²“Kobbi jo Icrael ni, Ecuban a Rwot ame ociko pirgi ame ibino wunu rabo ni myero obed cokere acil, ecuban ame ociko pirgi gin ene.

³Ibino wunu tiyo ticwu pi nino abicel, ento i nino me abiro mere en cabit me weo mot, en nino me cokere acil. Mom ibino wunu tiyo ticcoro; mano en cabit a Rwot kan ame ibino wunu bedo iye luŋ.

⁴“Magi gin ecuban ame Rwot ociko, gin cokere acil ame ibino wunu rabo pirgi i kare ame Rwot ociko.

⁵I dwe me agege, i nino dwe apar wie aŋwen otyeno, mano en Kato a Rwot.

⁶I nino dwe apar wie abic me dwe acellono en nino a Rwot me ecuban me Ogati a Tobi Mom iye; ibino wunu camo ogati a tobi mom iye pi nino abiro.

⁷I nino me agege mere myero ibed wunu i cokere acil; mom ibino wunu tiyo ticcoro ame tek.

⁸Ento ibino wunu yalo Obaŋa i mot ame owaŋo i mac baŋ Rwot pi nino abiro; i nino me abiro mere myero ibed wunu i cokere acil, kur iti wunu iye ticcoro atek.”

⁹Rwot dok te kobbi Muca ni,

¹⁰“Kobbi jo Icrael ni, Ka doŋ ituno wunu i lobo ame abino miyowu, ka ce ikaa wunu iye cam, ibino kelo wunu arita me gin ogeo cek me wi mwaka baŋ alamdog.

¹¹Alamdog bino yoko arita-nono i nyim Rwot, me en ye gamowu; en bino yoko i nino ame lubo cabit.

¹²I nino ame oyoko iyenono, en ame daŋ ibino wunu tero iye atin romo ame dittere romo mwaka acel, ame roccoro mom i kome, me obed mot awaŋa baŋ Rwot.

¹³Mot yala Obaŋa me moko kwon ame oyalo kede Obaŋa karacel i nyok romo, myero bed me moko kwon apwottere ame romo gwata aryo ame orubo kede moo, ame obino yalo i Rwot kun owaŋo i mac baŋ Rwot me bed gin a ŋwece kur ame yomoro cuny. Mot amata mere bino bedo vino ame romo cupa aryo kede nucu,

¹⁴Kur icam wunu ogatimoro, dok daŋ kur imwod wunu nyig belloro ame ocelo onyo a mom ocelo tuno naka i nino-naca ikokome, tuno ka ikelo wunu mot me yalo Obaŋawu. Mano bino bedo cik atwal tuno naka i kare ikwaewu luŋ, i kabedo luŋ ame ibino bedo wunu iye.

¹⁵“Ibino kwano wunu kun icako wunu i nino ame lubo cabit, en nino ame imio wunu iye arita me mot ayoka baŋ Rwot; bino bedo cabit abiro twal,

¹⁶kun ikwano wunu nino pyerabic tuno i nino ame lubo cabit me abiro mere. Eka doŋ ite cako kelo wunu baŋ Rwot motwu me moko kwon kal anyen.

¹⁷Ibino kelo wunu ogati aryo i kan ame ibedo wunu iye, ame otedo i moko a romo gwata aryo me bed me ayoka; obino tedogi i moko kwon apwottere ame orubo i tobi, obed cam me wi mwaka ame omio baŋ Rwot.

¹⁸Dok daŋ ibino wunu kelo itino rommi kany wie aryo ame mwaka me ditogi tye acel acel, dok roccoro daŋ mom i komgi, kun ikelo wunugi karacel ogati-nono, kede atin twon acel, kede nyogi romi aryo, ame bino bedo me mot oŋolo me awaŋa baŋ Rwot, karacel kede mot memoko kwon kede mot amata; gin luŋ mot ame owaŋo i mac, gin a ŋwece kur a yomoro cuny Rwot.

¹⁹Dok ibino wunu daŋ miyo nyok dyel acel me mot aŋola pi bal, kede itino nyogi romi aryo ame mwaka me ditogi tye acel acel me mot aŋola me kweyo cuny.

²⁰Alamdog bino yokogi karacel kede ogati me wi mwaka, me gin bed mot ayoka i nyim Rwot, karacel kede itino nyogi romi aryo-nono; gin bino bedo gi a Rwot acil pi alamdog.

²¹Ibino wunu rabo koppere kannaler i nino-nono ikokome; ibino bedo wunu kede cokere acil. Mom ibino wunu gudo ticcoro atek, mannono bino bedo cik atwal tuno naka i kare ikwaewu luŋ, i kabedo luŋ ame ibino bedo wunu iye.

²²“Ka ikaa wunu cam ame oceki lobowu, myero kur ika wunu yi poto luŋ aluŋa tuno naka i laŋete, dok daŋ kur irarao wunu en obwoto waŋwu i kare me kac. Magi-nono ibino wunu weko me konyo ocan kede orok; an a Rwot Obaŋawu.”

²³Rwot okobbi Muca ni, “Kob baŋ jo Icrael ni,

²⁴I dwe me abiro, nino dwe acel, ibino kwero wunu iye nino me weo mot, nino me po ame ibino wunu rabo pire i koko opel, nino me cokere acil.

²⁵Mom ibino wunu gudo ticcoro atek, dok ibino miyo wunu iye mot ame owaŋo i mac baŋ Rwot.”

²⁶Rwot dokokobbi Muca ni,

²⁷“I nino dwe apar me dwe abiro-ni, en ame bino bedo nino me kwanyo bal. Myero obed nino me cokere acil baŋwu; ibino kumo wunu kun cunywu cwer, dok ibino miyo wunu iye mot ame owaŋo i mac baŋ Rwot.

²⁸Kur igud wunu ticcoro i nino-nono, pien nino-nono obedo nino me kwanyo bal, me tiyo tic me kwanyo bal i komwu i nyim Rwot Obaŋawu.

²⁹Ŋat ame mom bino kumo kun cunye cwer i nino-nono, waŋe bino rwenyo oko i akina jo turgi.

³⁰Ŋat ame bino gudo ticcoro i nino-nono ikokome, abino neko dano-nono oko me kur bed i akina jo turgi.

³¹Mom ibino wunu gudo ticcoro; mano bino bedo cik atwal tuno naka i kare ikwaewu luŋ, i kabedo luŋ ame ibino bedo wunu iye.

³²Nino-nono en ame bino bedo cabit me weowu mot, ibino kumo wunu iye kun cunywu cwer. Ibino gwoko wunu cabitwu-nono cakere i nino dwe aboŋwen otyeno tuno naka orwo mere otyeno.”

³³Rwot dok te kobo baŋ Muca ni, “Kob baŋ jo Icrael ni;

³⁴I nino dwe apar wie abic me dwe me abiro-ni en ame ecuban me gonye a Rwot bino bedo iye, tyeko naka nino abiro.

³⁵I nino me agege myero bed iye cokere acil, mom ibino gudo wunu ticcoro atek.

³⁶Myero imi wunu mot ame owaŋo i mac baŋ Rwot pi nino abiro. I nino me aboro mere, ibino bedo wunu kede cokere acil, en ame ibino miyo wunu iye mot ame owaŋo i mac baŋ Rwot; mano en cokerewu me woro, mom ibino gudo wunu ticcoro atek iye.

³⁷“Magi-nono en ecuban ame Rwot ociko, ame ibino wunu rabo pirgi ni gin aye kare me cokere acil, me miyo mot ame owaŋo i mac baŋ Rwot, mot awaŋa, mot me moko kwon, mot aŋola kede mot amata, kun acel acel iye tye kede nino mere.

³⁸Dok daŋ imedo wunu cabit a Rwot ocele mege, kede motwu ocele mege, kede motwu ocele luŋ me cobo kwoŋ, kede motwu ocele luŋ me ber a yic ame imio wunu baŋ Rwot.

³⁹“I nino dwe apar wie abic me dwe me abiro, ka doŋ ikao wunu gin ame oceki lobo, ibino wunu kwero ecuban a Rwot pi nino abiro; nino me agege bino bedo nino me weo mot, kede nino me abor mere daŋ bino bedo nino me weo mot.

⁴⁰I nino me agege ame ibino wunu coko iye nyig yen abeco mere, kede jaŋ otit, kede jaŋ yat obuŋere, kede ŋet me dog kulo; eka ite bedo wunu i yomcuny i nyim Rwot Obaŋawu pi nino abiro.

⁴¹Ibino kwero wunu me bed ecuban a Rwot pi nino abiro mwaka i mwaka; mannono bino bedo cik atwal tuno naka i kare ikwaewu luŋ; ibino wunu kwero i dwe me abiro.

⁴²Ibino wunu bedo i gonye pi nino abiro jo luŋ ame gin jo Icrael bino bedo i gonye,

⁴³me ikwaewu ŋe ni rik amio jo Icrael obedo i gonye i kare ame akwanyogi oko i lobo Miciri; an a Rwot Obaŋawu.”

⁴⁴Muca daŋ te tito baŋ jo Icrael kittono, pi ecuban luŋ ame Rwot ociko.