Read lango Olevi 25 Bible Online

Olevi 25 - lango bible

Olevi 25

¹Rwot rikokobo baŋ Muca i wi kidi me Cinai ni,

²“Kobbi jo Icrael ni, Ka doŋ ituno wunu i lobo ame abino miyowu, lobo myero gwok cabit a Rwot.

³Ibino wunu coyo pottiwu pi mwakki abicel, ibino wunu daŋ ŋolo jaŋ olokwu pi mwakki abicel kun icoko wunu nyige,

⁴ento i mwaka me abiro mere en ame bino bedo cabit ame lobo bino weo iye mot, en cabit a Rwot; mom ibino coyo wunu ginnoro i pottiwu, dok daŋ mom ibino ŋolo wunu jaŋ olokwu.

⁵Gin otu kene iyi okoŋ mom ibino kayo wunu, mom ibino coko wunu nyig olokwu a mom oŋolo jaŋgi; mwakanono bino bedo mwaka ame lobo bino weo iye mot.

⁶Cabit a lobo-nono bino miyowu cam, bino miyo piri kede pi opiini kede aŋecani, kede opakacani, kede arok ame bedo baŋi;

⁷pi limwu luŋ akwo kede leyi me tim ame tye i lobowu, gin a cek iye luŋ bino bedo me acamagi.

⁸“Dok daŋ ibino kwano wunu cabit abiro me mwakki, mwakki abiro tyen abiro; kare-nono me cabit abiro-nono me mwakki, bino bedo baŋi mwakki pyeraŋwen wie aboŋwen.

⁹I mwakanono ibino miyo apel kok aloŋo i nino dwe apar me dwe me abiro; i nino me kwanyo bal ibino miyo apel kok winyere i lobowu luŋ.

¹⁰Ibino kwero wunu mwaka me pyerabiccere obed acil, kun irabo wunu i lobowu luŋ ni kuc tye pi jo luŋ ame bedo iye. Mano en ame bino bedo kare me jubiliwu, kare ame dano acel acel bino dok gire i dul lobo mere, dok ŋat acel acel daŋ bino dok baŋ jo me doggola mere.

¹¹Mwaka me pyerabiccere en ame bino bedo kare me jubiliwu; mom ibino coyo wunu koti, mom ibino kayo ginnoro otu kene, dok daŋ mom ibino coko wunu nyig olok ame mom iŋolo wunu jaŋgi.

¹²Pien kare nono obedo kare me jubili, kare-nono bino bedo acil baŋwu; ibino camo wunu gin ame oya i poto.

¹³“I mwaka me jubili-nono, ŋat acel acel bino dok i dul lobo mere.

¹⁴Ka ce icato lobo baŋ awotti onyo iwilo ginnoro i baŋe, myero kur itim balloro i akinawu kenwu kenwu.

¹⁵Yin ibino wilo lobo ibaŋ awotti kun wellere lubo wel mwaka a lubo jubili, dok daŋ en bino cato baŋi kun lubo wel mwaka ame ibino nwoŋo iye cam.

¹⁶Ka mwakki pwod odoŋ abup, ibino medo wel ame iculo, ka mwakki odoŋ anok, ibino dwoko wel ame iculo piny, pien gin ame en cato baŋi en aye mwakki ame cam bino cek iye.

¹⁷Mom ibino timo wunu balloro i akinawu kenwu kenwu, ento ibino lworo wunu Obaŋawu; pien an a Rwot Obaŋawu.

¹⁸“Pi mannono ibino wunu tic icwilla, kun igwoko wunu gin ame ociko luŋ dok daŋ icobo wunu, me ibed wunu i lobo kun okwe mot.

¹⁹Pien lobo bino ceko cem, ibino camo iyeŋ wunu kede, ite bedo wunu iye kun okwe mot.

²⁰Ka ce ikobo wunu ni, ‘Obino camo ŋo i mwaka me abiro, ka mom ocoo koti dok daŋ mom okao kac?’

²¹an abino ciko gum mera poto i komwu i mwaka me abicellere, me wek cam cek a romo mwaka adek twal.

²²I kare ame icoo wunu koti i pottiwu i mwaka me aboro mere, nwoŋo pwod itye icamo wunu cam aconnere, tuno naka i mwaka me aboŋwen; i kare ame cam doŋ ocek, ote kayo, nwoŋo pwod icamo wunu en aconnere.

²³Lobo mom obino cato me atera atwal, pien lobo mega gira; pien wun ibedo wunu wele, dok daŋ wun orok iye.

²⁴I lobo luŋ ame ibino bedo wunu iye, ibino miyo wunu olakoro lobo.

²⁵“Ka ominwu moro can omako, te cato dul lobo mere moro, wattere moro aceggi kede en ame bino wot lakoro lobo ame ominnere ocato-nono.

²⁶Ka ce dano-nono mom tye i wattere moro ame twero lakoro, ka ce en ikome dok olony te nwoŋo yo moro ame rome lakoro,

²⁷en myero kwan wel mwaka kun geo i kare ame en ocato iye, en te culli dano a rik owilo-nono wel ame pwod odoŋ, lobo mere te doŋ dok i ciŋe.

²⁸Cite ka yo moro mom tye ame romo miyo en ikome dwoko lobo mere i ciŋe, poto-nono bino medde bedo me a ŋat owilo naka ka mwaka me jubili oromo; i kare me jubili obino weko poto mere doŋ dok i ciŋe.

²⁹“Ka ŋattoro ocato ode ame tye i boma ame ocelo i cel, en twero lakoro oko a mom ru mwaka acel okato. En bino bedo i twer pi mwaka luŋ me lakoro.

³⁰Ka ce mom olakoro ame mwaka acel mom ru okato, obino doŋ moko ni ot ame tye i boma ame ocelo i cellono doŋ me a ŋat owilo, mege doŋ atwal naka i kare ikwae luŋ; mom dok otwero dwoko i ciŋ wonnere i kare me jubili.

³¹Ento udi ocele mege ame tye iyi caro ame mom ocelo i celloro, obino tero a rom aroma i potti ame tye iyi caro; otwero lakoro dok daŋ myero dwok i kare me jubili.

³²Kadi amannono, boma a jo Levi, udi ame omiogi me bedo megi, jo Levi twero lakoro kare ducu,

³³Ka ce dano moro i akina jo Levi mom olakoro ode obino cato ottono i boma moro ame omiogi me bedo megi, obino dwoko ottono i kare me jubili baŋ wonnere, pien udi ame tye i boma a jo Levi, magi-nono obedo jamigi ame omiogi i akina jo Icrael.

³⁴Ento barroro me kwat ame omano bomagi mom obino cato; mannono doŋ lobogi atwal.

³⁵“Ka ce ominni moro i laŋeti odoko acan ame mom romo konyere kene, yin ibino konye; en bino bedo baŋi acalo welo onyoarok ame bedo i akinawu.

³⁶Mom ibino gamo magoba moro i baŋe, dok daŋ mom ibino medo wi baŋya mere, ento myero ilwor Obaŋani, me ominni bed kwo i laŋeti.

³⁷Mom ibino miyo en koporo limmoro i baŋi pi mito nwoŋo magoba, kur daŋ imie cam kun imito ni en dwoggo kun nwoŋo koŋ omedo moro iye.

³⁸An a Rwot Obaŋawu ame rik akwanyowu i lobo me Miciri me wek amiwu lobo me Kanaan, an ate bedo Obaŋawu.

³⁹“Ka ce ominni moro i laŋeti odoko acan, te catte kene baŋi, mom ibino miyo en tio baŋi acalo opii,

⁴⁰En bino bedo baŋi acalo apakaca onyo arok. En bino tic baŋi naka i mwaka me jubili;

⁴¹i ŋe eno en doŋ bino ya oko i baŋi karacel kede itino mere, bino dok baŋ jo me doggola mere i kome, i lobo a kwari mere.

⁴²Pien gin obedo omirona ame rik akwanyogi i lobo me Miciri, mom obino catogi me bedo opii.

⁴³Mom ibino loye i loc agwa, ento myero ilwor Obaŋani.

⁴⁴Aco kop i kom opiini kede aŋecani ame ibino bedo kedgi: itwero wilo opii kede aŋeca i baŋ orok ame omano laŋetwu-ni.

⁴⁵Itwero wilo wunu daŋ i akina orok ame bedo baŋwu, kede i akina jo me doggolagi ame bedo baŋwu, ame onywalo i lobowu; gin twero doko acalo jamiwu.

⁴⁶Itwero miyo wunu baŋ itino awobewu ame bino lubowu, me bed acalo gin ame gin leo atwal. Itwero wunu miyogi obedo opiiwu, cite omegowu ame obedo jo Icrael mom ibino loyo wunu kittono, ame ŋat man loo wadgi i loc agwa.

⁴⁷“Ka welo moro onyo arokkoro ame bedo baŋwu odoko alonyo, kun ominwu moro ame bedo i laŋete odoko acan, eka te catte gire kene baŋ welo onyo arok ame tye baŋi-nono, onyo ocate baŋ wattoro me doggola a welonono,

⁴⁸ka en doŋ otyeko catte oko, otwero lakoro; ŋattoro i akina omego mere twero lakoro en oko.

⁴⁹Omin pappere onyo atin omin pappere twero lakoro en, onyo watgi moro me doggolagi twero lakoro en; onyo ka en ikome odoko alonyo, twero lakere gire kene.

⁵⁰En bino kwano wel kun kwano i ŋat a rik owile-nono; bino cako kwano i mwaka ame rik owile iye tuno naka i jubili; wel me gonye bino lubo wel mwaka. Kare ame en obedo kede baŋ lon owile obino kwano acalo kare apakaca.

⁵¹Ka ce mwaka odoŋ pwod bup, en bino culo lim me lakere mere kun poro i wel mwaka, kun kwanyo i kom lim ame rik owile kede.

⁵²Ka ce mwaka odoŋ anok me tuno i jabuli en bino kwano wel karacel i dano a rik owile-nono, te culo lim me lakere mere kun poro wel mwaka me ticcere ame pwod odoŋ.

⁵³En bino bedo baŋe acalo apakaca ame oculo mwaka i mwaka; mom obino loye i loc agwa kun yin ineno.

⁵⁴Ka ce mom olakoro en i yore acalo magi, obino gonye oko i mwaka me jubili, en karacel kede itino mere.

⁵⁵Pien jo Icrael obedo omiro mera; gin obedo omirona ame rik akwanyo i lobo Miciri; an a Rwot Obaŋawu.