Read lango Olevi 26 Bible Online

Olevi 26 - lango bible

Olevi 26

¹“Mom ibino tiyo wunu cal obaŋa moro pirwu kenwu, dok daŋ kur icib wunu cal ginnoro ame opao apaa cuŋ i lobowu onyo kidi moro ame ocibo me awora, kadi kidi moro ame ogoro cal i kome, eka ite ryebere wunu piny i nyimgi, pien an a Rwot Obaŋawu.

²Myero igwok wunu cabit mera, iwor wunu daŋ kabedona acil; an a Rwot.

³“Ka ibino gwoko wunu icwilla luŋ kede gin ame aciko ducu, kun daŋ icobo wunu,

⁴an abino miyowu kot ame cwe i kare mere, lobo bino ceko cem, yen i potti daŋ bino nyako nyiggi.

⁵Kare me dino kalwu bino ri naka i kare me pwono olok, kare me pwono olok bino ri naka i kare me coyo koti. Ibino wunu camo cam romowu, ite bedo wunu i lobo kun okwe mot.

⁶Abino miyo kuc bedo i lobo, pala romo moro mom bino beo i lobowu.

⁷Ibino ryemo wunu okworwu luŋ, pala lwenywu bino miyogi oto i nyimwu.

⁸Jowu abic keken bino ryemo jo mia twal, jowu mia bino ryemo jo tutumia apar; pala romowu bino miyo okworwu to i nyimwu.

⁹Abino paro pirwu abino miyowu inywal, inya wunu, dok daŋ abino mo ko cikerena kedwu.

¹⁰Ibino camo wunu camwu acon ame ikano wunu pi kare alac, ite onyo wunu aonya me wekki en anyen kabedo.

¹¹Abino yiko kabedona i akinawu, yia daŋ mom bino kwerowu.

¹²Abino wowota i akinawu, abino bedo Obaŋawu, wun daŋ ibino wunu bedo jo mera.

¹³An a Rwot Obaŋawu ame rik akwanyowu i lobo me Miciri, me kur ibed wunu opiigi; an doŋ atuturo bayi loc ame oririo i ŋutwu, amio doŋ iwoto wunu atira.

¹⁴“Ento ka mom ibino winyo wunu koppa, dok daŋ mom i ibino cobo wunu gin ame aciko-ni luŋ,

¹⁵ka ce ibino cayo wunu icwilla, dok ka ce yiwu okwero cikka mom ite cobo wunu gin ame aciko-ni luŋ, ento ituro wunu cikerena,

¹⁶abino timowu kit man: abino miyo lworo aŋolle aŋola makowu, kede aola owio, kede aburu ame cocoro waŋ jo kun balo komwu oko. Dok daŋ ibino wunu yelle coyo koti nono, pien okworwu gire en ame bino camo.

¹⁷Abino ciko waŋa i komwu, obino pwodowu i nyim okworwu. Jo ame dagowu en ame bino loyowu; dok daŋ ibino ŋwec wunu kun ŋattoro gire mom aryemo yorwu.

¹⁸Ka atimo mano luŋ mom daŋ ite winyo wunu koppa, abino medde goyowu tyen abiro pi balwu.

¹⁹Abino turo teko me awakawu oko, abino miyo polowu luŋ bedo atek calo nyonyo, lobowu daŋ te bedo atek calo mola.

²⁰Tek komwu bino to nono, pien lobowu mom gire bino ceko cem, yen me lobowu daŋ mom bino nyako nyiggi.

²¹“Ka ce dok pwod imedde wunu pyem keda, kun mom iwinyo wunu koppa, abino medde coro two mogo apek i komwu, kun pol bala balwu tyen abiro.

²²Dok daŋ abino cwayo leyi me tim areco mege i akinawu, ame bino mamako itinowu, tyeko limwu akwo oko i ciŋwu, eka te miyo welwu jwik doko anonok, yowu te yuggo oko.

²³“Ka ce cannono mom omio idwogo wunu baŋa, ka ce pwod imedde wunu pyem keda,

²⁴an daŋ abino pyem kedwu, an ikoma ate pwodowu tyen abiro pi balwu.

²⁵Abino kelo pala romo ikomwu me culo kwor pi cikerena. Ka icokere wunu i dye bomawu luŋ, abino cwayo too edeke agwa i akinawu, ote miyowu i ciŋ okworwu.

²⁶Abino miyo cam ame ikwo wunu kede rwenyo oko, mon apar bino tedo ogatiwu i keno acel, dok daŋ gin bino pokkiwu ogati kun opimo apima; ibino camo wunu cite mom ibino yeŋowu.

²⁷“Ka ce daŋ dok atimo man, ento mom daŋ ite winyo wunu koppa, kun imedde wunu pyem keda,

²⁸an daŋ abino pyem kedwu agwa meicel, an ikoma ate pwodowu tyen abiro pi balwu.

²⁹Ibino wunu camo riŋo kom awobewu, dok daŋ i ibino wunu camo riŋo kom anyirawu.

³⁰Abino turo ka woro jogiwu ame tye i wi kiddi malo, ate totoŋo keno lamwu me lamo odok akur oko, kun abolo komwu oto i kom obaŋewu a mom ikwo. Yia doŋ bino kwerowu oko.

³¹Abino miyo bomawu doko wi obur, kabedowu acil daŋ bino doŋ nono, mom daŋ doŋ abino ŋweyo giwu a ŋwece kur a yomoro cuny.

³²Abino balo lobowu odoco, me wekokworwu ame bino bedo iye bed kede wur pire.

³³Abino ketowu atata i akina rok ocele, ate woto pala romo iyi akure me ryemowu, lobowu doŋ te doŋ nono, bomawu luŋ daŋ te doko wi obur.

³⁴“I kare-nono lobo koŋ te gwoko cabittere luŋ pi kare luŋ ame pwod tye nono, kun wun nwoŋo itye wunu i lobo okworwu: lobo koŋ bino we kun gwoko cabittere luŋ.

³⁵Pi kare luŋ ame lobo pwod tye nono, lobo koŋ bino we, weo ame yam mom ru obilo i cabitwu luŋ i kare ame pwod onwoŋo ibedo wunu iye.

³⁶Aco jo mogo i akinawu ame bino doŋ, abino cwayigi lworo i cunygi i lobo okworgi luŋ, ame bino miyo oriŋo ka pot yat ame yamo oyeŋo. Gin bino riŋo bala lon a riŋo pala romo, ote rette piny kun ŋattoro gire mom aryemo yorgi.

³⁷Gin bino twomere kengi kengi, ŋat man i kom awottere, calo jo a riŋo leb pala romo, kadi bed ŋattoro gire nwoŋo mom aryemo yorgi; mom ibino bedo wunu i tekcunyoro me cuŋ i nyim okworwu.

³⁸Ibino to wunu luŋ i akina orok, lobo okworwu bino camo komwu luŋ.

³⁹Jo mogo i akinawu ame bino doŋ komgi bino gobere oko i lobo okworgi pi balgi; dok daŋ pi bal a kwarigi, komgi bino gobere oko calo gin.

⁴⁰“Cite ka gin bino tuco balgi kede bal a kwarigi pi timgi areco i koma, kede pi pyem keda,

⁴¹te miyo an daŋ pyem kedgi, ate kelogi i lobo okworgi; ka ce jo-nono ame lirregi rik mom ru odonyo i cunygi doŋ odoko amwol, ote timo gin a culo balgi.

⁴²Bino miyo doŋ apo i kom cikerena wan i Yakobo, abino po i cikerena wan Icaka, dok daŋ abino po i cikerena wan Iburaim, dok abino po pi lobowu daŋ.

⁴³Cite gin bino weko lobo doŋ nono kun gwoko cabittere luŋ ame nwoŋo gire pwod odoŋ nono kun gin mom tye iye. Eka gin te timo gin a culo balgi, pien gin rik ocao gin ame aciko, dok daŋ yigi okwero icwilla.

⁴⁴Cite kadi amannono, kare a gin tye i lobo orok mom abino cayogi, yia daŋ mom bino kwerogi atek ateka ame romo miyo aturo cikerena kedgi, pien an a Rwot Obaŋagi.

⁴⁵Pirgi abino po pi cikerena a rik acikere kede i kwarigi ame rik akwanyo i lobo Miciri kun rok luŋ neno, me wek abed Obaŋagi; an a Rwot.”

⁴⁶Magi en icwil luŋ kede gin a Rwot ociko, kede cik ame en oketo i akina en kede jo Icrael i wi kidi me Cinai, kun kobo baŋ Muca.