Read lango Olevi 27 Bible Online

Olevi 27 - lango bible

Olevi 27

¹Rwot okobo baŋ Muca ni,

²“Kob baŋ jo Icrael ni, Ka dano moro okwoijo kwoŋ a pire tek baŋ Rwot ame otiko kom dano, kun lubo wel ame yin iŋolo,

³wel ame iŋolo ame mako ico moro ame mwaka me dittere romo pyeraryo tuno kede naka i pyerabicel, wel ame iŋolo bino bedo cekel me ryal pyerabic, kun lubo cekel me kabedo acil.

⁴Ka ce dano-nono obedo dako, ibino ŋolo cekel pyeradek.

⁵Ka ce danonono mwaka me dittere romo abic tuno naka i pyeraryo, pi atin awobi ibino ŋolo cekel pyeraryo, me a nyako apar.

⁶Ka ce dano-nono obedo atin me dwe acel tuno kede i mwaka abic, ibinonolo cekel me ryal abic pi atin awobi, me atin a nyako cekel me ryal adek.

⁷Ka ce dano-nono mwaka me dittere romo pyerabicel dok kede malo, ibino ŋolo cekel apar wie abic pi ico, me a dako apar.

⁸Ka dano moro acan okato kare ame mom twero nwoŋo wel ame iŋolle, en bino tero dano ame okwoŋo pirenono i nyim alamdog, alamdog doŋ en a bino ŋolle wel, kun lubo gin ame dano okwoŋo-nono twero nwoŋo.

⁹“Ka ce kwoŋŋono otiko lee ame omio baŋ Rwot, lee moro keken ame ŋattoro omio baŋ Rwot, lee-nono myero bed acil.

¹⁰En mom bino loko dok i ginnoro ocele onyo keto moro ocele kakare kadi bed emito keto en aberrere akaka en araccere onyo en araccere akaka en aberrere; ka ce en loko lee moro kede lee wadgi, gin aryo luŋ ame olokogi-nono myero bed acil.

¹¹Ka ce onwoŋo obedo lee moro ame cik ogeŋo, a mom otwero miyo me yalo Rwot, dano-nono bino tero lee-nono i nyim alamdog.

¹²Alamdog bino ŋolo wellere ka lee-nono ber onyo rac; wellere bino bedo kite ame yin alamdog iŋolo kede.

¹³Cite ka en mito lakoro, en bino medo acel me abic iye.

¹⁴“Ka ce ŋattoro ojalo ode me bedo acil baŋ Rwot, alamdog en abino ŋolo wellere, ka ber onyo rac; wellere bino bedo kite ame alamdog oŋolo kede.

¹⁵Ka ce ŋat ame omio ode-nono omito lakoro oko, en bino medo acel me abic iye, ode te bedo doŋ mege.

¹⁶“Ka ce ŋattoro ojalo dullobo mere baŋ Rwot, kun mio i kom lobo ame en oleo i baŋ kwari mere, ibino ŋolo wellere kun lubo kit koti ame obino coyo iye; ka koti-nono romo coyo koti cayiri puku adek, wellere bino bedo cekel me ryal pyerabic.

¹⁷Ka ce en omio poto mere i mwaka me jubili, wellere bino cuŋ i wel ame iŋolo-nono.

¹⁸Cite ka omio poto mere iceŋ a doŋ jubili okato oko, alamdog bino ŋolo wel lim a myero en cul pire kun poro i wel mwaka ame pwod odoŋ me tuno i mwaka me jubili, ote dwoko wel a yam iŋolo piny.

¹⁹Ka lon ame omio poto-nono mito lakoro oko, en bino medo acel me abic i kom wellere, poto mere doŋ te bedo mege.

²⁰Cite ka en mom mito lakoro poto-nono, onyo ka otyeko cato poto oko baŋ ŋat ocele, mom doŋ obino lakoro atwal.

²¹Poto-nono ka ogonyo oko i kare me jubili, bino doŋ bedo acil baŋ Rwot, acalo poto ame doŋ ojalo oko atwal, alamdog en ame doŋ bino bedo wonnere.

²²“Ka ce en ojalo baŋ Rwot poto moro ame onwoŋo owilo awila, kun mom obedo dul lobo ame en oleo alea i baŋ kwari mere,

²³alamdog bino ŋolo wellere tuno naka i mwaka me jubili, dano-nono te culo wel ame oŋolo i ninonono me bed gin acil baŋ Rwot.

²⁴I mwaka me jubili poto-nono bino dok i ciŋ ŋat a rik owilo i baŋe, ŋat ame poto-nono obedo mege ame eleo i baŋ kwari mere.

²⁵Wel luŋ ame oŋolo bino lubo wel cekel me kabedo acil, kun cekel acel romo gera pyeraryo.

²⁶“Ento itino kao me leyi mom obino jalo baŋ Rwot, pien itino kao luŋ obedo me a Rwot con; kadi twon onyo romo, obedo gire me a Rwot.

²⁷Ka ce lee a cik ogeŋo, en bino wilo i baŋi i wel ame yin iŋolo, kun medo iye acel me abic, aco ka mom olakoro, yin ibino cato acata kun icato i wel ame yin iŋolo.

²⁸“Ento gin ame dano ojalo baŋ Rwot i kom ginnoro ame tye baŋe, kadi dano onyo lee onyo poto ame oleo i baŋ kwari mere, mom ibino cato, dok daŋ mom obino lakoro; ginnoro luŋ ame ojalo baŋ Rwot nwoŋo en gin acil meicel baŋ Rwot.

²⁹Ŋattoro ame ojalo baŋ Rwot me aneka, mom dok obino lakoro, obino neko gire aneka.

³⁰“Acel me apar luŋ ame oya i lobo, kadi gin ame oceki poto onyo nyig yen onyak, mannono luŋ jami a Rwot, gin acil baŋ Rwot.

³¹Ka ce dano moro mito lakoro ginnoro i kom acel me apar, en bino medo acel me abic iye,

³²Acel me apar me dok kede romi kede dyegi luŋ, acel me apar me leyi luŋ akato i te abiro akwat, gin luŋ bino bedo acil baŋ Rwot.

³³Wonnere mom bino penyo ka ber onyo rac, dok daŋ mom bino loko i moro ocele; ka ce en aloko, gin aryo luŋ ame olokogi-nono myero bed acil; mom obino lakoro.”

³⁴Magi en cik a rik Rwot ociko kede Muca i wi kidi me Cinai pi jo Icrael.