Read lango Olevi 3 Bible Online

Olevi 3 - lango bible

Olevi 3

¹“Ka mot a dano amiyo me yalo Obaŋa obedo mot aŋola me kweyo cuny, ka ce en amiyo mot ame okwanyo i akina dok, twon onyo minne, en bino miyo i nyim Rwot kun roccoro mom i kome.

²Dano-nono bino keto ciŋe i wi mottere-nono, te neko i doggola kema me rwatte; awobe Aron, ame gin olamdog, bino cocoro re mo mere romo kor keno lam luŋ.

³I kom mot aŋola me kweyo cuny, en bino miyo me bed mot awaŋa i mac baŋ Rwot; dwol luŋ ame owumo amonten kede dwol luŋ ame tye i kom amonten,

⁴kede aŋaluru aryo kede dwol luŋ a tye i pyere, kede okene ame tye i kom emany, en bino kwanyo oko karacel kede aŋaluru aryo.

⁵Awobe Aron te waŋogi i wi keno lam i kom mot awaŋa ame nwoŋo tye i wi yen i kom mac. Mano en mot awaŋa i mac, gin a ŋwece kur a yomoro cuny Rwot.

⁶“Ka ce mottere me yalo Rwot me kweyo cuny obedo lee ame okwanyo i akina romi, nyok onyo akale en bino miyo ame roccoro mom i kome.

⁷Ka ce en amiyo atin romo acalo en bino miyo i nyim Rwot.

⁸En te keto ciŋe i wi mottere, te neko oko i nyim kema me rwatte; awobe Aron te cocoro remo mere romo kor keno lam luŋ.

⁹Eka i kom mot aŋola me kweyo cuny, en bino miyo jami magi me bed mot awaŋa i mac baŋ Rwot: dwollege kede moo yibe luŋ, ame oŋolo aceggi kede cogo me oguro ŋee, kede dwol luŋ ame owumo amonten kede dwol luŋ ame tye i kom amonten,

¹⁰kede aŋaluru aryo kede dwol luŋ a tye i pyere, kede okene ame tye i kom emany ame en bino kwanyo oko karacel kede aŋaluru aryo,

¹¹Alamdog te waŋo i wi keno lam me bed cam ame omio i mac baŋ Rwot.

¹²“Ka ce mottere me yalo Obaŋa obedo dyel, en bino miyo i nyim Rwot,

¹³eka te keto ciŋe i wie, te neko oko i nyim kema me rwatte; awobe Aron te cocoro remo mere romo kor keno me lam luŋ.

¹⁴Dano-nono bino miyo moro iye me mot awaŋa i mac baŋ Rwot, dwol luŋ ame owumo amonten kede dwol luŋ ame tye i kom amonten,

¹⁵kede aŋalura aryo luŋ, kede dwol luŋ a tye i pyere, kede okene a tye i kom emany ame en bino kwanyo oko karacel aŋalura aryo.

¹⁶Alamdog te waŋo i wi keno lam, me bed cam ame omio i mac ame ŋwece kur. Dwol luŋ obedo me a Rwot.

¹⁷Man bino bedo cik atwal, i tuno i kare ikwaewu luŋ, mom ibino camo wunu dwolo onyo remo.”