Read lango Olevi 4 Bible Online

Olevi 4 - lango bible

Olevi 4

¹Rwot dok te kobbi Muca ni,

²“Kob baŋ jo Icrael ni, Ka ce dano moro obalo, kun mom obalo me akaka i kom ginnoro ame Rwot rik ociko ni myero kur tim, ka ce en otimo moro i akinagi,

³ka ce alamdog ame owiro kede moo en obalo, te kelo bal i wi lwak luŋ pi ballere ame en obalo-nono, myero en yal Rwot kede atin twon etobayit ame roccoro mom i kome, me bed mot me bal.

⁴Alamdoggono bino kelo twon i doggola kema me rwatte i nyim Rwot, eka te keto ciŋe i wi twonnono, te neko twonnono i nyim Rwot.

⁵Alamdog ame owiro kede moo bino jolo remo twonnono mogo te kelo i kema me rwatte;

⁶alamdog te luto nyako ciŋe i remo, te totono remo-nono mogo i nyim Rwot tyen kany wie aryo i nyim boŋo icika me kabedo acil.

⁷Alamdog dok te bino totono remo-nono mogo i kom tuŋ aŋwen ame tye i keno waŋo odok akur, ame tye i kema me rwatte i nyim Rwot. Remo twon odoŋŋere luŋ, en bino onyo i te keno lam me mot awaŋa, ame tye i doggola kema me rwatte.

⁸En bino wawaro dwol luŋ i kom twon ame omio pi bal, dwol ame owumo amonten, kede dwol luŋ ame tye i kom amonten,

⁹kede aŋalura aryo kede dwol luŋ ame tye i pyere, kede okene ame tye i kom emany ame bino kwanyo oko karacel kede aŋalura aryo,

¹⁰kite ame okwanyo kede i kom twon ame oŋolo me mot me kweyo cuny; alamdog bino waŋo i wi keno me mot awaŋa.

¹¹Ento pyen me twonnono kede riŋo mere luŋ, karacel kede wie kede tyene luŋ kede amontennere, kede wee iye,

¹²en bino tero luŋ teŋe i ŋe gony, kan acil, kan ame oonyo iye buru, te waŋo kuno i mac me yen. Obino waŋo kan ame oonyo iye buru.

¹³“Ka ce lwak jo Icrael luŋ otimo bal, kun nwoŋo gin otio ginnoro ame Rwot rik ociko ni kur tim, kun mom obalo me akaka, dok lwak jo luŋ mom oŋeo ginnono;

¹⁴kare ame gin doŋ oŋeo balgi, lwak bino yalo Obaŋa kede atin twon etobayit me mot me bal, gin bino kelo i nyim kema me rwatte.

¹⁵Odoŋe a lwak bino keto ciŋgi i wi twonnono i nyim Rwot, eka daŋ ote neko twonnono i nyim Rwot.

¹⁶Alamdog ame owiro kede moo bino tero remo twonnono mogo i kema me rwatte.

¹⁷Alamdog te luto nyako ciŋe i remo, te totono remo-nono mogo i nyim Rwot tyen abiro i nyim boŋo icika.

¹⁸Alamdog dok bino totono remo-nono mogo i kom tuŋ aŋwen ame tye i keno lam, ame tye i kema me rwatte i nyim Rwot. Remo twon odoŋŋere luŋ en bino onyo i te keno lam me mot awaŋa, ame tye i doggola ke ma me rwatte.

¹⁹En bino wawaro dwol luŋ i kome te waŋo i wi keno lam.

²⁰En bino timo twonnono kittono; kite ame etimo kede i kom twon me yalo Obaŋa pi bal, bino timo daŋ kittono i kom man; alamdog bino tiyo tic me kwanyo bal pirgi, Rwot daŋ bino weko balgi.

²¹En doŋ bino tero twonnono i ŋe gony, te waŋo kuno kite ame owaŋo kede twon me agege ca; mano en mot me bal a lwak.

²²“Aco ka aloccoro en obalo i ginnoro acel i kom ginnoro luŋ ame Rwot Obaŋa mere ociko ni kur tim, kun mom obalo me akaka;

²³ka ce ŋattoro omie eŋeo bal ame ebalo-nono, en bino kelo nyok dyel a roccoro mom i kome me bed mottere me yalo Obaŋa,

²⁴En bino keto ciŋe i wi dyellono, te neko kan ame oneko iye mot awaŋa i nyim Rwot; man en mot me bal.

²⁵Alamdog bino gweto remo me mot ballono i nyako ciŋe, te totono i kom tuŋ aŋwen ame tye i keno lam me mot awaŋa te onyo remo ame odoŋŋere luŋ i te keno lam me mot awaŋa.

²⁶Dwollege luŋ obino waŋo i wi keno lam kite ame owaŋo kede dwol me mot aŋola me kweyo cuny; alamdog bino tiyo tic me kwanyo bal i kome, Rwot daŋ bino weko ballere.

²⁷“Ka dano moro keken i akina jo obalo, ce otio ginnoro acel ame Rwot rik ociko ni kur tim, kun mom obalo me akaka;

²⁸ka ce ŋattoro omie eŋeo bal ame en obalo-nono, en bino kelo akale dyel a roccoro mom i kome me bed mottere me yalo Obaŋa pi ballere ame etimo,

²⁹en bino keto ciŋe i wi mot me bal, te neko kan ame oneko iye mot awaŋa.

³⁰Alamdog bino gweto remo mere mogo kede nyako ciŋe, te totono i tuŋ aŋwen ame tye i keno lam me mot awaŋa, te onyo en odoŋŋere luŋ i te keno lam.

³¹En bino wawaro dwollege luŋ kite ame owawaro kede dwol i mot aŋola me kweyo cuny; alamdog te waŋo i wi keno lam me bed gin a ŋwece kur a yomoro cuny RWOT; alamdog bino tiyo tic me kwanyo bal i kome, Rwot daŋ bino weko ballere.

³²“Aco ka ce en okelo atin romo me mottere me yalo Obaŋa pi mot me bal, en bino kelo akale romo a roccoro mom i kome.

³³En bino keto ciŋe i wi mot me bal, te neko kan ame oneko iye mot awaŋa.

³⁴Alamdog bino gweto remo mogo kede nyako ciŋe i kom mot me ballono, te totono i tun aŋwen ame tye i keno lam me mot awaŋa, te onyo remo odoŋŋere luŋ i te keno lam.

³⁵En bino wawaro dwollege luŋ kite ame owawaro kede dwol me atin romo ame omio me mot aŋola me kweyo cuny; alamdog te waŋo i keno lam, i kom mot awaŋa i mac baŋ Rwot; alamdog bino tiyo tic me kwanyo bal i kome pi bal ame en otimo, Rwot daŋ bino weko ballere.