Read lango Olevi 6 Bible Online

Olevi 6 - lango bible

Olevi 6

¹Rwot okobo baŋ Muca ni,

²“Ka ce dano moro otimo bal me abwole i nyim Rwot, kun obwolo awottere i ginnoro a rikokano baŋe, onyo ojeŋo baŋe, onyo ka omao jami mere onyo oburo awottere,

³onyo onwoŋo ginnoro ame orwenyo eka te kobo goba iye, kun kwoŋo kwoŋ me goba i kom ginnoro keken ame jo tio, te timo bal iye;

⁴ka ŋattoro obalo eka te niaŋ ni eroco, en bino dwoko gin ame onwoŋo emao-nono, onyo gin ame onwoŋo ereboro kede ebure-nono, onyo gin ame onwoŋo okano baŋenono, onyo gin ame orwenyo en te nwoŋo-nono,

⁵onyo gin ame en okwoŋo iye kwoŋ me goba-nono; myero en dwok i berrere, dok daŋ bino medo iye acel me abic, eka te miyo baŋ wonnere i nino ame en mio iye mottere me walakino i roc.

⁶En bino kelo baŋ Rwot mottere me walakino i roc kun kelo baŋ alamdog nyok ame roccoro mom i kome ame okwanyo i akina rommi, ame yin iŋolo wellere i wel a mot me walakino i roc.

⁷Alamdog bino tiyo tic me kwanyo bal i kome i nyim Rwot, Rwot daŋ bino weko ballere i ginnoro ame dano twero tiyo eka te niaŋ ni eroco.”

⁸Rwot okobbi Muca ni,

⁹“Cik Aron kede awobe mere ni, Man cik a mako mot awaŋa me yalo Obaŋa. Mot awaŋa bino ri i keno lam dyewor benebene tuno naka odiko, kun mac lyel iye nakanaka.

¹⁰Alamdog bino ruko rukkere me boŋo camanini, te daŋ ruko pali mere me camanini i pyere, eka te jobo buru ame mac owaŋo i mot awaŋa i wi keno lam, te keto i ŋet keno lam.

¹¹En te gonyo rukkere-nono oko, te ruko ruk ocele, te tero buru-nono naka i ŋe gony i kakannoro acil.

¹²Mac ame tye i wi keno lam myero mi lyel nakanaka, kur to oko. Alamdog bino waŋo iye yen nino luŋ odiko, dok daŋ bino cano iye mot awaŋa i yore i yore, te waŋo dwol me mot me kweyo cuny i wie.

¹³Mac ame tye i wi keno lam myero mi medde lyel nakanaka; kur to oko.

¹⁴“Man en cik a mako moko kwon me yalo Obaŋa. Awobe Aron en a bino miyo i nyim Rwot, i nyim keno lam.

¹⁵Ŋat acel i akinagi bino juko moko kwon apwottere kede moo poŋ ciŋe acel kun juko i kom mot me moko kwon, karacel kede odok lubannere luŋ ame tye i kom mot me moko kwon, te waŋo i wi keno lam, me obed me po i kome, gin a ŋwece kur a yomoro cunyn Rwot.

¹⁶En odoŋŋere luŋ Aron kede awobe mere bino camo; obino camo kun tobi mom iye i kakannoro acil; gin bino camo i dyekal me kema me rwatte.

¹⁷Myero kur ted kede tobi. Atyeko doŋ miyogi acalo dulgi i kom motta ame owaŋo kede mac; mano en gin acil meicel, rom aroma i mot me bal kede mot me walakino i roc,

¹⁸Ikwae Aron luŋ ame co twero camo, acalo cik ame bino ri atwal, i tuno i kare ikwaewu luŋ, i kom mot owaŋo i mac baŋ Rwot; ŋattoro keken ogudo bino doko acil.”

¹⁹Rwot okobo baŋ Muca ni,

²⁰“Man en mot ame Aron kede awobe mere bino miyo baŋ Rwot i nino ame obino wire iye kede moo: gwata moko kwon acel me moko kwon apwottere, myero obed mot me moko kwon me yalo Obaŋa kare ducu, kun nucu mere omio odiko kede nucu mere otyeno.

²¹Obino tedo kede moo i tako nyonyo; ibino kelo kun nwoŋo doŋ orubo oko aber, ame daŋ doŋ oŋiŋido oko atitino bala mot me moko kwon, eka i te yalo Obaŋa, me bed gin a ŋwece kur me yomoro cuny Rwot.

²²Alamdog ame obino kwero me leyo kaka Aron, ame nwoŋo oya i akina itino mere, bino yalo kede Rwot acalo cik ame bino ri atwal; obino waŋo luŋ i berrere.

²³Mot me moko kwon ame alamdog yalo kede Obaŋa, myero waŋ luŋ i berrere; mom myero cam kadi acel.”

²⁴Rwot okobbi Muca ni,

²⁵“Kob baŋ Aron kede awobe mere ni, Man en cik a mako mot me bal me yalo Obaŋa. Kan ame oneko iye mot me awaŋa, en ame daŋ obino neko iye mot me bal i nyim Rwot; mano en gin acil meicel.

²⁶Alamdog ame omio mot me bal, en ame bino camo; obino camo kakannoro acil i dyekal me kema me rwatte.

²⁷Ginnoro keken ame bino gudo riŋo mere, bino doko acil; ka ce remo mere moro okir i kom ruk, myero lwok boŋo ameremo okir iye-nono i kakannoro acil.

²⁸Gulu lobo ame otedo kede myero nekoko, aco ka otedo weer me mola, myero rud kome aruda ote lako kede pii.

²⁹Co luŋ ame gin olamdog twero camo; mano en gin acil meicel.

³⁰Ento myero kur cam mot me bal ka ce remo mere moro otero i kema me rwatte pi tiyo tic me kwanyo bal i kabedo acil; myero waŋ awaŋa i mac.