Read lango Olevi 7 Bible Online

Olevi 7 - lango bible

Olevi 7

¹“Man en cik a mako mot yalo Obaŋa pi walakino i roc. Mano en gin acil meicel;

²Kan ame oneko iye mot awaŋa, en ame daŋ obino neko iye mot me walakino i roc; ote cocoro remo mere romo kor keno me lam luŋ.

³Dwollege luŋ obino yalo Obaŋa, moo yibe, dwol luŋ ame owumo amonten,

⁴kede aŋalura aryo luŋ, kede dwol luŋ ame tye i pyere, kede okene ame tye i kom emany ame obino kwanyo oko karacel aŋaluru aryo.

⁵Alamdog te waŋogi luŋ i keno me lam me mot ame omio kede mac baŋ Rwot; mano en mot me walakino i roc,

⁶Co luŋ ame gin olamdog twero camo; gin bino camo kakannoro acil; mano en gin acil meicel.

⁷Mot me walakino i roc rom aroma i mot me bal, cikgi tye acel; alamdog ame otio kedgi tic me kwanyo bal, en ame bino tero.

⁸Dok daŋ alamdog ame omio mot awaŋa a ŋattoro, en a daŋ bino tero pyen me mot awaŋa ame en omio-nono.

⁹Mot me moko kwon luŋ ame otedo i keno kede en ocele mere luŋ ame otedo i cupuria onyo i tako nyonyo bino bedo me alamdog ame omio-nono.

¹⁰Mot me moko kwon luŋ, ame orubo kede moo, kede en a mom orubo bino bedo me awobe Aron luŋ: ŋat man bino tero ame rom aroma i me awottere.

¹¹“Man en cik a mako mot yalo Obaŋa me kweyo cuny ame dano moro twero miyo baŋ Rwot.

¹²Ka ce en amiyo me pwoc, en myero mi capat karacel i mot me pwoc, capat a tobi mom iye ame orubo kede moo, capat arep a tobi mom iye ame oweo moo i komgi, kede dok capat me moko kwon apwottere a tobi mom iye ame orubo aber kede moo.

¹³Ka en yalo Obaŋa i mottere me kweyo cuny me miyo pwoc, en myero med iye mottere me capat a tobi mom iye.

¹⁴Doŋ i kodi ennono, en bino miyo capat acel i kom mot acel acel me mot me yalo Rwot; mano bino bedo me alamdog ame ococoro remo me mot me kweyo cuny.

¹⁵Riŋo me gin oŋolo me mottere me kweyo cuny pi miyo pwoc myero cam oko i nino ame omio iye-nono; myero kur wek moro iye doŋ naka tuno odiko.

¹⁶Ento ka gin oŋolo me yalo Obaŋa-nono obedo mot me cobo kwoŋ onyo mottoro me ber a yic, obino camo i nino ame en oŋolo iye gi-yalo Obaŋa-nono, eka en odoŋŋere ote camo orwo mere.

¹⁷Ento riŋo odoŋ i kom gin oŋolo-nono naka i nino me adekkere, myero doŋ waŋ awaŋa i mac,

¹⁸Aco ka ocamo riŋo odoŋ i kom gin oŋolo-nono i nino me adekkere, mom obino pwoyo ŋat omio, dok daŋ mom obino kwano ni en omio ginnoro. Bino bedo gin me kwer, ŋat ame ocamo ballere bino bedo i wie.

¹⁹“Riŋo ame ogudo ginnoro ame cik ogeŋo, myero kur cam; obino waŋo awaŋa kede mac. Jo ame cikkoro mom ogeŋo twero camo riŋo;

²⁰ento ka ŋattoro ocamo riŋo me gin oŋolo me yalo Obaŋa me mot me kweyo cuny Rwot, kun ginnoro a cik ogeŋo tye i kome, dano-nono obino miyo waŋe rwenyo oko i akina jo me turgi.

²¹Dok ka ŋattoro ogudo ginnoro ame cik ogeŋo, kadi dano a tye i ginnoro i kome ame mio cik geŋe onyo lee moro ame cik ogeŋo, onyo kadi ginnoro me kwer ame cik ogeŋo, eka te camo riŋo me gin oŋolo me yalo Obaŋa me mot me kweyo cuny, dano-nono obino miyo waŋe rwenyo oko i akina jo me turgi.”

²²Rwot okobbi Muca ni,

²³“Kob baŋ jo Icrael ni, Myero kur icam wunu kit dwolo moro luŋ, kadi me twon, onyo me romo, onyo me dyel.

²⁴Dwolo lee oto kene kede dwolo ame lee tim omwodo, otwero tic kede i yore moro keken, cite myero kur cam kadi acel.

²⁵Pien ŋattoro keken ame bino camo dwolo lee me mot ame owaŋo i mac baŋ Rwot, obino miyo waŋe rwenyo oko i akina jo me turgi.

²⁶Dok daŋ kur icam wunu remo ginnoro kakannoro keken ame ibedo wunu iye, kadi bed me winyo onyo me lee.

²⁷Ŋattoro keken ame bino camo kit remo moro, danonono obino miyo waŋe rwenyo oko i akina jo me turgi.”

²⁸Rwot okobbi Muca ni,

²⁹“Kob baŋ jo Icrael ni, ŋat ame omio gin oŋolo me yalo Obaŋa me mottere me kweyo cuny, en bino kelo mottere baŋ Rwot. I kom gin oŋolo me yalo Obaŋa me mottere me kweyo cuny,

³⁰en bino kelo gire kede ciŋe mot ame owaŋo i mac baŋ Rwot. En bino kelo dwollege kede ogok, me yok ogokkono me mot ayoka i nyim Rwot.

³¹Alamdog bino waŋo dwollono i wi keno lam, ento ogok bino bedo me Aron kede awobe mere.

³²Amuru mere me tuŋ cem ibino miyo baŋ alamdog me bed mottere ame oya i gin oŋolo me yalo Obaŋa me mot me kweyo cuny;

³³ŋat ame omio remo kede dwolo me mot me kweyo cuny i akina awobe Aron, bino tero amuru me tuŋ cem obed iner mere.

³⁴Pien ogok ame oyoko kede amuru atyeko doŋ miyo oko me mot alamdog kun ya i kom mot a jo Icrael me kweyo cuny ame gin oŋolo me yalo Obaŋa.

³⁵Mano doŋ enere ame tye pi Aron kede awobe mere, ame jo Icrael bino miyogi kare ducu. Man en iner ame tye pi Aron kede awobe mere ame oya i kom mot ame owaŋo i mac baŋ Rwot. Rikokwero me bedo megi i nino ame rikokelogi baŋ Rwot me gin oti tic me olamdog baŋ Rwot.

³⁶Rwot rik onwoŋo ociko i nino ame rik owirogi i moo, ni jo Icrael myero migi man; man bino bedo enere ame gin bino camo nakanaka, tuno naka i kare ikwaegi luŋ.”

³⁷Man en cik a mako mot awaŋa me yalo Obaŋa, mot moko kwon, mot me bal, mot me walakino i roc, mot me keto alamdog i dog tic, kede mot me kweyo cuny,

³⁸ame rik Rwot onwoŋo ociko baŋ Muca i wi kidi me Cinai, i nino a rik ociko iye jo Icrael ni kel motgi baŋ Rwot, i tim me Cinai.