Read lango Olevi 8 Bible Online

Olevi 8 - lango bible

Olevi 8

¹Rwot okobbi Muca ni,

²“Ter Aron kede awobe mere, kede boŋŋi me arukagi, kede moo wir, kede twon me aŋola me mot me bal, kede nyogi romi aryo, kede dita ame tye iye ogati a tobi mom iye;

³eka i te coko jo luŋ karacel i doggola ke ma me rwatte.”

⁴Muca daŋ te timo kite ame Rwot ocike kede; ocoko lwak luŋ i doggola kema me rwatte.

⁵Muca te kobo baŋ lwak ni, “Man en gin ame Rwot ociko ni myero tim.”

⁶Muca te kelo Aron kede awobe mere, te lwoko komgi kede pii.

⁷Eka te rwako kanyi i kom Aron, te tweyo pyere kede itambara me tweyo pyer, te dok ruke kede jor, te daŋ keto epod i kome, otweo pyere kede lati me epod ame otoko kede diro, te tweyo, lido kede i kome.

⁸Te keto cao kor i kome, te daŋ keto Urim kede Tumim iyi cao kor.

⁹Odwalo itambara i wie, eka te dok tweyo akwaa jabu i kom itambara me wic i tuŋ nyime, me bed tok kwogo acil, kite a rik Rwot ociko kede Muca.

¹⁰Muca te kwanyo moo wir, te wiro i kema kede jami luŋ ame tye iye, te kwerogi.

¹¹Okikiro moo mogo i kom keno lam tyen abiro, te wiro keno lam karacel kede jami me ticcere luŋ kede moo, karacel kede tako lwokere kede akwak tere, me kwerogi.

¹²Oonyo moo wir anok i wi Aron, te wire me kwere.

¹³Muca dok te kelo awobe Aron aryo, te rukogi kede kanyi, otweo pyergi kede itambara me tweyo pyer, orwako tok atitino i wigi, kite a rik Rwot ociko kede Muca.

¹⁴Icennere doŋ te kelo twon me yalo Obaŋa pi bal, eka Aron kede awobe mere te keto ciŋgi i wi twonnono me yalo Obaŋa pi bal.

¹⁵Muca te neko oko, te jolo remo, gweto kede nyako ciŋe te totono romo tuŋ keno lam aŋwen luŋ, te lonyo keno lam, eka te onyo remo i te keno lam me kwero pi kwanyo bal i kome.

¹⁶Muca dok te wawaro dwol luŋ i kom amonten, kede i kom okene ame tye i kom emany kede aŋaluru, kede dwol luŋ, te waŋogi luŋ i wi keno lam.

¹⁷Ento riŋo twonnono kede pyennere kede wee ame tye i yie, en owaŋo awaŋa kede mac teŋe i ŋe gony, kite a rik Rwot ociko kede Muca.

¹⁸Icennere a doŋ man otum, okelo nyok romo me yalo Obaŋa me mot awaŋa; Aron kede awobe mere te keto ciŋgi i wi nyok romo-nono.

¹⁹Muca te neko oko, te cocoro remo mere romo kor keno lam luŋ.

²⁰Kare a doŋ otyeko ŋoŋolo riŋo romo-nono dul i dul, Muca te waŋo oko karacel kede wie, kede dwollege.

²¹Amontennere kede tyene ducu ote lwoko kede pii, Muca te waŋo nyok romo-nono luŋ i berrere i wi keno lam, me bed mot awaŋa me yalo Obaŋa, gin a ŋwece kur a yomoro cuny, en mot ame owaŋo i mac baŋ Rwot, kite a rik Rwot ociko kede Muca.

²²Icennere doki Muca te kela nyok romo ocele, nyok romo me keto dano i dog tic; Aron kede awobe mere te keto ciŋgi i wi nyok romo-nono.

²³Muca te neko oko, te gweto remo mere mogo cwicwinyo i yit Aron me tuŋ cem kede i twon ciŋe me tuŋ cam, kede daŋ i twon tyene me tuŋ cem.

²⁴Eka ote kelo awobe Aron, Muca te gweto remo romo mogo, te cwicwinyo i yitgi me tuŋ cem kede twon ciŋgi me tuŋ cem, kede i twon tyengi me tuŋ cem Muca te cocoro remo mere romo kor keno i lam luŋ.

²⁵Muca te kwanyo dwollege, moo yibe kede dwol luŋ i kom amonten, kede okene ame tye i kom emany, kede aŋaluru aryo luŋ, karacel kede dwolgi, kede amuru mere me tuŋ cem;

²⁶te kwanyo capat acel a tobi mom iye iyi dita me ogati a tobi mom iye ame onwoŋo tye i nyim Rwot, kede capat acel me ogati oweo moo i kome, kede dok capat acel areppere; te ketogi i wi dwol kede i wi amuru me tuŋ cem.

²⁷Muca te keto magi-nono i cuny ciŋ Aron kede i cuny ciŋ awobe mere, te yokogi me bedo mot ayoka i nyim Rwot.

²⁸Icennere en te kwanyogi oko i ciŋgi, te waŋo i wi keno lam karacel i mot awaŋa, me bed mot me keto dano i dog tic, gin a ŋwece kur a yomoro cuny, ame en mot owaŋo i mac baŋ Rwot.

²⁹Muca te kwanyo ogok, te yoko, me bed mot ayo ka i nyim Rwot; Mano en enere ame Muca camo, ame oya i kom nyok romo me ketogi i dog tic, kite a rik Rwot ociko kede Muca.

³⁰Muca te kwanyo moo wir kede remo mogo i wi keno lam te kikiro i kom Aron kede i kom rukere, kede i kom awobe mere kede rukgi; Muca te kwero Aron kede rukere, kede awobe mere kede rukgi kittono, gin te doko acil.

³¹Muca te kobbi Aron kede awobe mere ni, “Ted wunu riŋo i doggola kema me rwatte, ite camo wunu kuno, karacel kede ogati ame tye iyi dita me mot ketowu i dog tic, kite a rik aciko kede kun akobo ni, ‘Aron kede awobe mere en a myero cam.’

³²Riŋo kede ogati ame odoŋ myero waŋ awaŋa kede mac.

³³Kur iwot wunu oko i doggola kema me rwatte pi nino abiro, tuno ka kare me ketowu i dog tic ocobe re kakare, pien ketowu i dog tic bino tero nino kany wie aryo.

³⁴Kite ame obedo tiyo kede tin, yam Rwot onwoŋo ociko ni myero tim me kwanyo bal i komwu.

³⁵Wun ibino bedo wunu i doggola kema me rwatte dyeceŋ kede dyewor naka tyeko nino kany wie aryo, kun ilubo wunu gin ame Rwot ociko; me kur i to wunu, pien ocika kittono.”

³⁶Aron kede awobe mere te tiyo ginnoro luŋ ame Rwot rik ociko kun kobo baŋ Muca.