Read lango Olevi 9 Bible Online

Olevi 9 - lango bible

Olevi 9

¹I nino me aboro mere Muca olwoŋo Aron kede awobe mere karacel kede odoŋe a jo Icrael,

²eka te kobo baŋ Aron ni, “Kel atin twon etobayit me yalo Obaŋa me mot me bal, kede nyok romo me mot awaŋa, gin luŋ roccoro myero bed mom i komgi, kelgi i nyim Rwot.

³Dok daŋ kob baŋ jo Icrael ni, ‘Kel wunu nyok dyel me yalo Obaŋa me mot me bal karacel kede atin twon etobayit kede atin romo me mot awaŋa, gin aryo luŋ myero mwaka me ditogi bed acel acel, kun roccoro daŋ mom i komgi.

⁴Kel wunu daŋ twon kede nyok romo me mot kweyo cuny, gin luŋ me aŋola i nyim Rwot, kede mot me moko kwon ame orubo kede moo; pien Rwot bino nen baŋwu tin.’ ”

⁵Gin daŋ te kelo gin a Muca ociko i nyim kema me rwatte; lwak luŋ te noko aceggi, te cuŋ i nyim Rwot.

⁶Muca te kobo ni, “Man en gin ame Rwot ociko ni myero tim, eka kwogo a Rwot te nen baŋwu.”

⁷Muca dok te kobbi Aron ni, “Nok keno lam aceggi, me iyal Obaŋa i mot me bal meri, kede motti me awaŋa, i te tiyo tic me kwanyo bal i komi kede i kom lwak. Yal daŋ Obaŋa i mot a lwak, ti tic me kwanyo bal i komgi kite a rik Rwot ociko kede.”

⁸Aron te noko keno lam aceggi, te neko atin twon me mot me bal ame onwoŋo tye pire en i kome.

⁹Awobe Aron te miyo remo baŋe, en te luto nyako ciŋe i remo, te totono i tuŋe ame tye i keno lam, eka te onyo remo i te keno lam,

¹⁰Cite dwollege kede aŋaluru aryo kede okene ame tye i kom emany ame onwoŋo okwanyo i mot oŋolo me bal, en owaŋo oko i wi keno lam, kite a rik Rwot ociko kede Muca.

¹¹Riŋo mere kede pyennere en owaŋo awaŋa kede mac teŋe i ŋe gony.

¹²En dok te neko mot awaŋa me yalo Obaŋa, awobe mere te miyo remo baŋe, en te cocoro romo kor keno lam luŋ.

¹³Awobe mere te doŋ miyo mot awaŋa baŋe, kun omie dul i dul, karacel kede wie en te waŋogi i wi keno lam.

¹⁴Eka te lwoko amontennere kede tyene luŋ, te waŋogi karacel i mot awaŋa i wi keno lam.

¹⁵Kare ame man otum, en dok te miyo mot a lwak. Okelo dyel ame rik tye pi lwak me yalo Obaŋa pi bal, te neko yalo Obaŋa pi bal, bala mot bal me agege,

¹⁶Eka dok te yalo Obaŋa i mot awaŋa kun lubo cik.

¹⁷Dok te yalo Obaŋa i mot me moko kwon, ojuko poŋ ciŋe, te waŋo i wi keno lam kun medo i kom mot awaŋa me odiko.

¹⁸Dok te neko twon kede nyok romo daŋ, ame gin obedo mot aŋola me kweyo cuny ame rik tye pi lwak. Awobe mere te miyo remo baŋe, en te cocoro romo kor keno lam luŋ,

¹⁹Dok ote miye dwol me twon kede me romo, kede moo yibe, kede dwol ame owumo amonten kede aŋaluru aryo, kede okene ame tye i kom emany.

²⁰Gin te keto dwollono i wi ogok twon kede me romo, eka ote waŋo dwollono i wi keno lam,

²¹Ento ogok kede amuru mere me tuŋ cem Aron oyoko me bedo mot ayoka i nyim Rwot, kite a Muca ociko.

²²Aron dok te tino ciŋe malo tuŋ kun a lwak tye iye, te lammigi winyo; en doŋ te dwogo piny i ka yalo Obaŋa i mot me bal kede mot awaŋa kede mot luŋ me kweyo cuny.

²³Muca kede Aron te doŋ donyo i kema me rwatte; kare ame gin odonyo oko, gin olamo winyo i kom lwak, eka kwogo a Rwot te nen baŋ jo luŋ.

²⁴Mac te ya i nyim Rwot, te bino waŋo mot awaŋa kede dwol luŋ ame onwoŋo tye i wi keno lam, te tyeko oko luŋ. Kare ame lwak luŋ oneno, gin owo, ote oonyere piny i nyime.