Read lango Jeremia 10 Bible Online

Jeremia 10 - lango bible

Jeremia 10

¹Wun jo me ot Icrael, winy wunu kop ame Rwot okobo baŋwu.

²Rwot okobo ni, “Kur ipwony wunu lubo kite orok, dok cunywu myero kur poti ka ce ineno wunu anyuttogo me polo, kadi bed orok ka oneno cunygi poto pirgi.

³Pien kite orok mom obedo kit me ateni. Yat i buŋ otono oreto oko piny, apac te payo oko i gi-ticcere.

⁴Dano te kwoggo kome i ryal kede jabu, oguro ocumali i kome kede anyul me cun atek, me kur rette piny,

⁵Cal obaŋegi-nono calo pagi yat ame ocibo i poto okwer, me ryemo winyo i poto, mom oromo kop kadi acel, otiŋo-gu atiŋa, pien mom romo wot pirgi kengi. Kur ilworgi wunu kadi acel, pien mom otwero timo ginnoro arac, dok daŋ mom otwero timo ginnoro aber,

⁶Mom tye obaŋa moro ame cal kedi, Ama Rwot; yin idwon atek, dok nyiŋi daŋ dwon i teko.

⁷Ŋa kara ame mom myero olwori, Ama Abaka a rok apapat? Pien mannono en gin a myero tim baŋi, yin gire iromo alwora. Mom dok tye ŋattoro ame cal kedi, i akina oryeko luŋ me rok apapat, kadi ite locgi luŋ.

⁸Jogi luŋ ame ryek odoko omiŋo ame wigi mom tio, cal obaŋa ame otio i baoni twero pwonyogi i ginnoro?

⁹Cal jogigi okwogo kome i ryal ame okelo i Tarcic, kede jabu ame okelo i Upaj. Gin luŋ obedo gin ame opac otio, karacel kede tic otet jabu; rukgi rema kede en amaramar, gin luŋ obedo tic a jo ame odiro.

¹⁰Ento Rwot en obedo Obaŋa me ateni, en obedo Obaŋa ame kwo, Abaka ame perakino wan i wan. Ka akemo omako lobo yeŋere, dok mom tye rokkoro ame romo kanyo akemo mere.”

¹¹Wun myero ikobbigi wunu ni, “Obaŋa ame rik mom otio polo kede lobo bino gire to oko i wi lobo piny i te polo kan.”

¹²Rwot gire en oketo lobo i teko mere, dok en oketo lobo omio ocuŋ atek pi ryeko mere, en omio polo opette kite ame tye kede-ni pi ŋeccere.

¹³Ka ce dwone omor, pii i polo twaggere meicel, dok en mio ekuna duny kun ya i agikki piny. En mio lutkot wil ka kot acwe, dok mio yamo kodo kun ya i ot kano jami mere.

¹⁴Jo luŋ miŋ atek, dok daŋ mom otye kede ŋeccoro, cal jogi ame apac opao en a dok mie lewic, pien cal jogigi-nono mom obedo obaŋa, dok mom daŋ otye kede kwo kadi acel.

¹⁵Konygi moro mom, otiogi me acaa keken; i kare ame Rwot bino keto iye can i komgi, gin luŋ obino to oko.

¹⁶Obaŋa a Yakobo mom calo jogi magi, pien en obedo ŋat oketo jami luŋ, dok jo Icrael oyero me bedo mere, nyiŋe obedo Rwot me mony.

¹⁷Wun ame doŋ ogurowu oko-ni, cok ba doŋ yecwu oko i lobo!

¹⁸Pien Rwot okobo ni, “Aman doŋ abino ryemo jo ame bedo i loboni oko, dok abino kela can i komgi, can ame gin romo winyo littere.”

¹⁹Jerucalem bino kok ni, “Can i wia doi pi awano ame owana kede-ni! Wan burra-nono rac okato kare. Ateteni, man doŋ can ikokome, kanyo mere mom yot!”

²⁰Kemana doŋ otyeko balo oko, dok tol luŋ ame rik otwetweogi kede ococodo oko itinona doŋ oweka oko, gin luŋ doŋ omom. Mom tye ŋattoro ame dok romo guro kemana-nono, ŋattoro ame myero twe bono me icika mere doŋ mom.

²¹Man otimere pien okwat doŋ min amiŋa, mom doŋ openyo Rwot kadi acel, mannono omio gin mom otye aber, lim i ciŋgi-gu tye ka ket aketa.

²²Winy kop, Nen kop tye abino! Twon ginnoro ame tye ka mor atek meicel, tye ka bino i tutuŋ anyarodi, me bino miyo boma luŋ ame tye Juda doŋ nono, bino doko kabuto ekwe.

²³Ama Rwot, an gira aŋeo ni dano mom loo kwo mere kene; dano gire mom twero cun pire kene aboŋo yin, man mom twere baŋ dano ame temo loyo kwo mere kene,

²⁴Ama Rwot, tim ber ipwonya, cite kur iwuna dok atek ateka, Kur ipwonya akemo, naka mio ineka oko atwal.

²⁵Akemo myero omaki i kom rok a mom nei, kede i kom jo ame mom lwoŋo nyiŋi. Pien gin doŋ otyeko itino a Yakobo oko, olwero doŋ wie oko odoco, omio lobowa doŋ odoŋ oko nono.