Read lango Jeremia 12 Bible Online

Jeremia 12 - lango bible

Jeremia 12

¹Ama Rwot, an akelo kokona i nyimi, anwoŋo ni yin gire kiteni atira, an gira myero apid koppa i nyimi. Kara piŋo jo areco bedo aber kun daŋ olony? kara piŋo daŋ wegi erupe cobo tiyo gin ame cunygi mito timo?

²Yin en a yam ipito, eka lwitgi te cako donyo piny; odono te nyako nyiggi, Kare luŋ gin okobo kop aber komi, cite mom oparo piri i cunygi.

³Cite yin Rwot gire iŋea aber, yin inena dok daŋ itemo kite ame cunya tye kede i komi. Waagi acalo romo ame atero me aneka, ketgi kengi me kuro nino me nekogi.

⁴Lobowa bino bedo kumo pi kare a rom mene, kun lum iye luŋ otwo oko? Pien jo ame bedo i lobowa tye ka timo ka gin arac, omio leyi kede winy tye ka to oko, pien jo tye ka kobo ni, “En gire mom nenowa i kan ame wan obedo iye ducu.”

⁵Rwot okobo ni, “Jeremia we, ka ce iol oko i ŋwec kun i pyem icano, kara doŋ ŋwec pyem aguragura kono, ibino pyem iye niŋo? Ka ce irette piny i lobo ame kuc tye iye, kara doŋ ibino bedo nine i yen ame oculle acula ame tye i dog kulo me Jordan?

⁶Pien kadi omegoni ame gin jo me ot a pappi ikokome, gin daŋ otye ka timo tim me erupe i komi, gin daŋ otye ka kok atek me lweny kedi. Yin myero kur igen kopgi, kadi bed okobbi kop aber rom mene.”

⁷Rwot Obaŋa okobo ni, “An doŋ atyeko weko oda oko, atyeko doŋ kwero jona ame yam ayero ni bed mega, An doŋ awiro marra oko, amiogi i cin okworgi.

⁸Jona ame ayero me bedo mega olokere oko i koma, calo eŋatu ame tye i buŋ, omor doŋ amora i koko i koma, mannono omio an daŋ adagogi.

⁹Mom doŋ jona-nono i tuŋ baŋa calo itukere. Mom winy wadgi lweny kede kare luŋ? Wot icok leyi me tim luŋ, kelgi me obin oribere i cam karacel.

¹⁰Okwat apol apola obalo poto olokka oko, onyonyono dul lobo ame opokka i tyengi, omio doŋ dul lobona ame opokka ame onwoŋo yomoro cunya, odoko doŋ tim aler alera,

¹¹Gin doŋ omio odoŋ yie nono, odoko doŋ tim ame cona acona. Kabedo ducu iye doŋ tye nono, cite mom tye dano moro ame paro.

¹²Tur luŋ ame tye i tim, otyek piny doŋ obino oko i komgi, pien pala me lweny a Rwot jwero odoco, cakere i but lobo tuŋcel tuno kede tuŋ ocele, mom tye ginnoro akwo ame tye i kuc,

¹³Gin ocoo bel, okuto en ame te luŋyo nyak, obedo tiyo tic atek kun ool atek, cite mom onwoŋo ginnoro iye. Lewic bino makogi i gin ame ocek i pottigi, pi akemo ager ame onwoŋo omako Rwot.”

¹⁴Rwot okobo kop i kom otim tim areco luŋ ame bedo i ŋet jo mere Icrael ame tye ka balo lobo ame onwoŋo emio baŋ jo mere, ni, “Nen ba, abino kwanyogi oko i lobo a jona Icrael, dok abino kwanyo jo Juda oko ak inagi.

¹⁵Kare ame doŋ atyeko kwanyogi oko, kica dok bino maka i komgi ate dwokogi i lobogi kun ŋat acel acel dok i lobo ame rik opokke.

¹⁶Dok icennere ka kare oromo ame gin doŋ opwonyo kite a jona kun okwoŋo kede nyiŋa ni, ‘Kite ame Rwot tye kede kwo-ni’, i kite ame rik opwonyo kede jona me kwoŋ i nyiŋ Baal, gin bino rubere oko i jona ote doko atek i akinagi.

¹⁷Cite ka rokkoro i akinagi mom bino winyo koppa, abino kwanyo rokkono oko i akinagi ate tyeko oko ducu, man kop ame Rwot okobo.”