Read lango Jeremia 14 Bible Online

Jeremia 14 - lango bible

Jeremia 14

¹Man kop ame Rwot okobo baŋ Jeremia i kom can pii ame opoto i Juda, en okobo ni,

²“Juda tye ka kumo, dogcel iye luŋ tye ka tutura oko. Jo Juda luŋ obuto piny i lobo, i twon cwercuny adwoŋ meicel. Jo Jerucalem daŋ tye akok i dwon aloŋo meicel.

³Jo me awora iye tye ka cwayo oticgi me omo pii, gin woto kan ame pii awaa, ote lokere dok cen kun gi-geyo pii yigi nono, pien pii onwoŋo pe, Alee twodogi i twon lewic adwoŋ meicel, jo te dok paco ame owumo wigi oko.

⁴Pi lobo ame doŋ oballe oko, kite ame kot mom doŋ cwe kede i lobo, lewic doŋ tye ka mako opur meicel, owumo doŋ wigi awuma.

⁵Naka til i tim daŋ tye ka kwero itinogi ame pwod onywalo anyen, pien lum mom tye.

⁶Kana me tim doŋ ocuŋ i wi tur malo kan a lummoro mom iye, onamo doggi alac me mato yamo calo ekwe, waŋgi doŋ orwobere oko, pien lummoro me acamagi mom tye.

⁷“Kadi bed bal wa tye ka dotowa, Ama Rwot, tim ginnoro pi nyiŋi. Wan kare luŋ otye ka dok cen kun oya oko i baŋi, wan doŋ otyeko balo i nyimi,

⁸Ama Rwot, gen a jo Icrael tye komi, yin en ilarogi i kare ame peko opoto i komgi. Piŋo kara itye ibedo i lobowa calo orokkoro, onyo acalo dano ame woto awota ame tye ka yenyo kabuto?

⁹Piŋo ibedo calo dano ame wie ocuŋ oko, acalo lo atek meicel i lweny cite mom twero laro ŋattoro? Aco ka bedo amannono, yin Rwot gire itye i akinawa, dok otye ka lwoŋowa kede nyiŋi; kur iwekwa ba.”

¹⁰Rwot okobo kop i kom jo mere ni, “Gin gigi yam omaro wot kittono, mom oye bedo karacel. Mannono omio Rwot mom gamogi, aman en doŋ bino poyo balgi, te keto can i komgi pire.”

¹¹Rwot rik te kobba ni, “Kur ikwa ni an akony lwak man obed aber.

¹²Kadi bed okany kec, cite an gira mom abino winyo kokogi; kadi bed oyala kede mot awaŋa kede mot me moko kwon, mom gira abino gamo kadi acel. Ento an abino nekogi oko i pala me romo, i kec kede too edeke.”

¹³An ate gamo ni, “Nen ba, Ama Rwot Obaŋa, odwarpiny onwoŋo okobbigi ni, ‘Mom ibino neno wunu pala lweny, kec mom bino poto i lobowu ento abino miyowu kuc ikokome i kabedo man.’ ”

¹⁴Rwot te kobba ni, “Odwarpiny tye ka rabo kop me goba kun otio kede nyiŋa: an gira onwoŋo mom acwaogi, mom daŋ acikogi, akadi kop kedgi. Gin otye ka rabbiwu pi anyuttogo me goba, kun otyeto tyet ame konnyere mom, dok obwolo jo abwola i tam ame tye i cunygi kengi.

¹⁵Mannono omio an a Rwot akobo kop i kom odwarpiny ame tye ka rabo kop kun otio i nyiŋa aco kun an mom acwaogi, ame kobo ni, ‘Pala lweny kede kec mom bino tuno i lobo man kadi acel’. Doŋ ba, pala lweny kede kec en abino neko kodi odwarpinnyono.

¹⁶Aco jo ame gin orabo koppono baŋgi, obino bologi oko i dye yo me Jerucalem, aboŋo ŋattoro ame myero yik komgi. Pala lweny kede kec en abino nekogi. Man bino timere i komgi gin luŋ anaka mongi, itinogi awobe kede anyira. Timgi areco-nono abino dwoko i komgi.

¹⁷“Yin ibino kobbigi kop man, ni, ‘Wek pig waŋa ony piny dyewor kede dyeceŋ, kur imi pig waŋa gik, pien jona ame amaro otyeko goyogi i twon bur adola arac meicel, owaŋo arac meicel,

¹⁸Ka ce awoto i dye tim, nen, anwoŋo kom jo oneko pala lweny dwoŋ atata! Dok ka awoto i boma, nen kite ame jo ame two two me kec pol kede! Pien odwarpiny kede olamdog tio ticgi i akina lwak luŋ, kun mom oŋeo ginnoro kadi acel.’ ”

¹⁹Yin doŋ ityeko kwero Juda odoco? Cunyi doŋ dag neno Cion? Kara igoowa pino ba, ame mom doŋ oromo can-ni? Obedo ka yenyo kuc, cite ginnoro aber mom nen, oyenyo kare ame myero ocaŋ iye cite ocop ka i gin ame ke lo lworo keken.

²⁰Ama Rwot, doŋ oniaŋ balwa, naka bal a kwariwa daŋ, pien wan luŋ otimo bal i nyimi.

²¹Kur cunyi balle oko i komwa, pi gwoko nyiŋi, dok daŋ kur ikel lewic i kom kom kwogo me locci; poyo ba, me kur itur cikereni oko kedwa.

²²Tye obaŋa moro i akina obaŋe orok, ame romo miyo kot cwe? Onyo ca polo twero miyo kot ŋido i lobo? Mom yin en itio magi luŋ, Ama Rwot Obaŋawa? Wan giwa ogeni, pien yin en itimo jami magi luŋ.