Read lango Jeremia 15 Bible Online

Jeremia 15 - lango bible

Jeremia 15

¹Rwot te kobba ni, “Kadi bed Muca kede Camwiri rik ocuŋ i nyima, mom atwero loko cunya i kom jo man kadi acel. Cwagi oko teŋe i nyima; migi owot oko teŋe!

²Ka ce gin openyi ni, Kara owot kwene? Yin ibino gamo kopgi ni, Rwot okobo ni ba, Jo ame bino to i too edeke, to edeke bino neko, jo ame bino to i pala lweny, pala lweny bino neko, Jo ame kec bino neko, bino to i kec, jo ame obino tero oko i opii, bino wot i opii.”

³Rwot okobo ni, “Abino keto onek a kitegi papat aŋwen pirgi, abino miyo pala lweny nekogi, gwogi bino kikilogi atitino, eka winy ame twarre malo kede leyi me tim te bedo me camo komgi odoco.

⁴Dok abino miyogi odoko gin me kwer ame jo luŋ i wi podo bino lworogi, pi gin ame Manace wot a Kejekia otimo i Jerucalem.

⁵“Ŋa ame kica bino mako i komwu, wun jo me Jerucalem, onyo ŋa ame bino kumo pirwu? Kara ŋa ame doŋ bino cun, me penyo kite ame itye wunu kede?

⁶Rwot okobo ni, wun gire ityeko kwera wunu oko, kare luŋ itye ka dok wunu adoka cen; mannono omio doŋ atyeko ryeyo ciŋa, aryeo ciŋa i komi ate nekowu oko; aol doŋ oko i loko tamma i komwu.

⁷Abedo pyetowu kede odero i dogcel, ame tye i lobowu luŋ, Anekowu atyekowu oko, wun jona, cite mom iye wunu weko yo ame itye wunu ka lubo.

⁸Amio wei to omedde ameda i lobowu, ame kato kwoyo ame tye i dog nam oko, Aneko awobewu oko ame komgi pwod tek, amio totogi obedo i twon can apek meicel. Amio cwercuny kede lworo omakogi atura meicel.

⁹Dako ame onywalo itino abiro cunye ogem oko doŋ, mom twero nwoŋo yo moro me wee: baŋe, ceŋ poto ame piny pwod ler alera, lewic omio odoko ayot oko. Jo odoŋ luŋ abino miyo to i pala lweny, i nyim okworgi, Man kop a Rwot okobo.”

¹⁰Kwona tekkadi! Kara piŋo totta onywala? Nen kare luŋ atye ka lweny onyo daa i jo luŋ ame tye i lobo. Mom amio ŋattoro okoporo gira moro, an daŋ mom akoporo gi-a-ŋattoro, cite gin luŋ ocena acena.

¹¹Ama Rwot, mi cen ame gin ocena kede-nono ocobere ka ce mom abedo timo gin ame tye atira i nyimi, dok daŋ mom abedo laro kop kedi pi okworra i kare ame gin onwoŋo tye kede peko, kede i kare ame gin tye i cwercuny!

¹²Dano twero turo nyonyo, nyonyo ame okelo i tutuŋ anyarodi karacel kede mola?

¹³“Lonyowu kede ginnoro luŋ ame ikano wunu abino miyo bedo me ayaka, kun mom oculo ginnoro pirgi, pi balwu, ame doŋ otyeko lal oromo lobowu luŋ,

¹⁴Abino miyo itio wunu pi okworwu i lobo ame mom iŋeo wunu, pien akemo doŋ omio mac ocako lyel oko, mac ame bino waŋowu nakanaka.”

¹⁵Jeremia te kobo ni, “Ama Rwot, yin gire iŋeo jami ducu; po pira dok ikonya daŋ, cul kwor i kom jo ame mito neka. Kadi bed idio cunyi wok, kur iwekgi oneka oko, ŋe ni atye ka kanyo acae okato kare piri,

¹⁶kare ame ikobo keda, awinyo koppi ducu, koppi te doko gin ame kella yomcuny, kun alelo atek meicel i cunya; pien jo tye ka lwoŋa kede nyiŋi, Ama Rwot Obaŋa me mony.

¹⁷Rik mom abedo balo kare i jo ocele kun anyero i yomcuny, mom daŋ abedo i yomcunyoro kadi acel. Abedo bedo kena, pien ciŋi onwoŋo tye i koma, yin onwoŋo iketo akemo i cunya.

¹⁸Piŋo kara rem ame atye kede mom tye ka gik, bur i koma daŋ doŋ mom twero can, okwero doŋ can oko? Yin ce doŋ imito bedda calo waŋ pii ame bwolo jo abwola, calo pii ame kare ocele two oko-ni ce?”

¹⁹Mannono omio Rwot okobo ni, “Ka ce ilokere idwogo baŋa, abino gami, ite dok bedo cuŋ i nyima kare luŋ. Ka ce ibedo kobo kop abeco ame konygi tye, kun mom ikobo kop ame konygi mom, abino miyi ikobo kop ame kono an akob i koma, Gin bino lokere bino baŋi, cite yin myero kur idok baŋgi.

²⁰Abino keti ibedo baŋ jo man calo twon celloro, ame ocelo atek i mola, gin bino lweny kedi, cite mom obino loyi kadi acel, pien an atye kedi, me konyi kede me lari.

²¹Abino lari i cin otim tim areco, kede me lakoro yin i cin jo ame kica mom i cunygi.” Man kop a Rwot okobo.