Read lango Jeremia 16 Bible Online

Jeremia 16 - lango bible

Jeremia 16

¹Rwot dok te k obba ni.

²“Yin mom ibino nyomo dako moro, dok mom ibino bedo atin awobi moro onyo nyako moro i kabedo man.

³Pien Rwot okobo kop i kom itino awobe kede itino anyira ame obino nywalo i kabedo man, karacel kede i kom totogi kede papagi ame onywalgi i lobo man.

⁴En okobo ni gin bino to i twon two moro arac meicel. Mom obino kokogi dok daŋ mom obino yiko komgi. Komgi bino radde atata i kabedo luŋ calo cet dyaŋ. Pala lweny kede kec en abino nekogi, eka winy ame twarre malo kede leyi me tim en ate camo komgi.”

⁵Pien Rwot okobo ni, “Kur idony i ot ame otye ka kumo iye, kur daŋ iwot kan ame jo akoko iye, kur daŋ ikum pirgi, pien doŋ atyeko kwanyo kucca oko i baŋ jo mera, kede marra a mom lokere, karacel kede kicana.

⁶Jo adoŋo kede jo atino bino to i lobo man; mom obino yiko komgi, mom obino kumo pirgi, dok ŋattoro mom bino ŋoŋolo kome kene onyo lyelo wie pirgi.

⁷Mom tye ŋattoro ame bino nywako cam i ŋat akumo, me kweyo cunye pi dano ame oto; Dok mom tye ŋattoro ame bino miyo ginnoro me amata ame nyuto cuny me kica baŋ dano ame pappere onyo tottere oto.

⁸Kur idony i ot ame jo tye acamo iye arama, me cam kedgi kede matte karacel kedgi.”

⁹Pien Rwot okobo ni, “Nen ba, abino giko woo luŋ me yomcuny i lobo man, i karewu, kun ineno wunu kede waŋwu. Dok abino giko daŋ dwon anyom kede dwon atera.

¹⁰“Kare ame doŋ ityeko kobo kop man luŋ baŋgi, eka gin te kobbi ni, ‘Piŋo kara Rwot orabo pi twoni tim magi areco ni me timere i komwa? Bal aŋo ce ame wan obalo? Bal aŋo ame wan obalo i kom Rwot Obaŋawa?’

¹¹Yin ibino gamo kopgi ni, ‘Pien kwariwu rik oweka oko, ote bedo lubo obaŋe mogo ocele, kun otio baŋgi dok oworogi. Gin rik oweka oko dok daŋ okwero winyo kede lubo cikka.

¹²Cite wun doŋ itimo wunu gin arac meicel ame kato kwariwu oko, pien ŋat acel acel i akinawu obedo bedo apala apala kun lubo tammere arac dok kun kwero winyo koppa oko.

¹³Mannono omio abino kwanyowu oko i lobo man, ate bolowu i lobo moro ame wun karacel kede kwariwu mom yam iŋeo wunu. Ibino tic wunu baŋ obaŋe mogo ocele kuno, kun itio wunu dyeceŋ kede dyewor, pien kica moro mom bino maka i komwu.’

¹⁴“Pi mannono, nen ba, tye nino mogo ame tye abino, ame mom dok obino kobo iye ni, ‘Kite acalo Rwot tye kwo-ni, Rwot ame okwanyo jo Icrael i lobo me Miciri’,

¹⁵ento ni, ‘Kite acalo Rwot tye kwo-ni, Rwot ame okwanyo jo Icrael i lobo ame tye tutuŋ anyarodi karacel kede i lobo ocele luŋ ame rik en oryemogi oterogi iye,’ Rwot okobo. Pien abino dwoggogi cen i lobogi ame rik amio baŋ kwarigi.”

¹⁶Rwot okobo ni, “Nen, abino cwayo jo apol ame bino makogi calo rec; icennere dok abino cwayo jo apol ame bino dwarogi i kabedo luŋ calo leyi i wi kiddi i kabedo luŋ obedo kidikidi kede i akina lela obarre.

¹⁷Pien atye ka neno kite ame gin bedo kede luŋ; mom tye moro iye ame mom aneno, anaka balgi mom tye moro ame mom aneno.

¹⁸Abino culogi pi gin ame gin otimo arac kede pi balgi tye aryo, pien gin obalo lobona oko i cal jogigi ame rom aroma i kom jo oto nono. Gin doŋ otye ka timo timmogo me kwer adwoŋ okato kare i lobo ame obedo mega.”

¹⁹Ama Rwot, yin ame ibedo tekona kede twon celloro atek ame gwoka, kan ame alaro i kare ame atye i peko. Rok luŋ i kabedo ducu naka i agikki piny, gin luŋ obino baŋi, kun okobo ni, “Kwariwa yam oleo gigi mogo a konygi mom, gin me goba keken, gigi mogo ame konygi mom ame mom oromo nwoŋo iye ginnoro.

²⁰Dano twero tiyo Obaŋa mere pire kene? Kodi ginnono mom obedo obaŋa kadi acel!

²¹“Mannono omio abino miyogi oŋeo icel doŋ keken, abino miyogi oŋeo tekona kede twerre, dok daŋ obino ŋeyo ni nyiŋa obedo Rwot.”