Read lango Jeremia 17 Bible Online

Jeremia 17 - lango bible

Jeremia 17

¹“Bal a jo Juda doŋ otyeko coyo oko piny kede alam nyonyo; otyeko daŋ doŋ goro oko i cunygi kede alam daimon ame lebe bit, kede i kom tuŋ keno lamgi,

²kun itinogi po i kom keno lamgi kede jok a dako ame olwoŋo ni Acera ame ocibo i ŋet yen luŋ ame obuŋere, i kabedo luŋ ame obedo kidikidi,

³i wi kiddi luŋ ame tye i bar kannaler. Lonyowu kede gin ame ikano wunu abino doko me ayaka acalo gin me culo balwu ame doŋ itimo wunu i lobowu luŋ.

⁴Ibino kwanyo cinwu i kom ginnoro luŋ ame yam arruowu me bedo megwu, dok abino miyowu itio wunu baŋ okworwu i lobo ame mom iŋeo wunu, pien akemo doŋ omio pi ocako lyel oko, mac ame bino waŋowu nakanaka.”

⁵Rwot okobo ni, “Cen myero mak ŋat ame keto gennere i kom dano wadgi, ame mio dano wadgi doko ka jeŋere mere, ame cunye ya oko i geno Rwot.

⁶Kodi dano-nono rom aroma i yat a tye i tim, dok dano-nono mom neno ginnoro aber ame bino baŋe. Bino bedo i tim kan ame otwo ikaŋ, i lobo obedo kadokado, kan ame jo mom bedo iye.

⁷Dano ame geno Rwot, tye kede winyo, ame gennere luŋ tye i kom Rwot.

⁸Dano-nono rom aroma i yat ame opito kan a pii tye iye, ame cwalo lwite donyo piny i kulo, kare ame lyeto ocakere en mom bedo kede lworo moro, pote gire bedo adyaka kare luŋ, mom paro pi ceŋ ame ryeny kare luŋ aboŋo kot, pien en nyak gire kare ducu aboŋo gik.”

⁹Goba dwoŋ i cuny dano ame kato ginnoro luŋ, kom gin araccono en a doŋ obalo dano meicel; ŋa ame twero niaŋ gin ame tye i cuny dano?

¹⁰“An a Rwot aŋio tam a dano, dok atemo cuny dano, me miyo ŋat acel acel gin ame oporo kite mere, kun lubo adwoggi me gin ame en tio.”

¹¹Calo atakara ame cokocoko itino ame en mom obeko i te bwome, ŋat ame lim nya i ciŋe i yore a mom atira, daŋ cal kittono; limmono ya oko i ciŋe i kare moro keken me kwo mere, i agikki en doko dano amiŋ.

¹²Kan ame oworo iye Obaŋawa calo kom me kwogo, ame ocuŋ malo i wi kidi cakere con i acakki.

¹³Ama Rwot, gen a jo Icrael tye i komi, jo luŋ ame ya oko i baŋi, lewic mako, jo luŋ ame ya oko i baŋi, nyiŋgi bino rwenyo oko acalo coc ame ocoo ikwo, pien gin otyeko weko Rwot oko, ame obedo akoŋ ame pii me kwo tye iye.

¹⁴Tim ber icana, me acaŋ doŋ oko, lara, me doŋ alare, pien an gira apaki yin keken.

¹⁵Nen jo bedo penya ni, “Kop a Rwot tono kara tye kwene? Koŋ imi bin ba!”

¹⁶An gira mom abedo diyi me cwayo gin arac, mom daŋ abedo mito nino ame can apek myero pot iye, yin gire iŋeo mannono aber; ginnoro luŋ ame an abedo kobo, onwoŋo yin iwinyo luŋ.

¹⁷Kur ibed gin ame mia lworo, yin ibedo kan ame an alaro i kare arac.

¹⁸Mi lewic mak jo ame wuna, ento kur imigi omi lewic maka, mi cunygi poti, cite kur imi cunya an poti, mi nino arac bin i komgi, nekgi oko ducu i yore arac meicel.

¹⁹Rwot okobo baŋa ni, “Wot icun i dogcel a Benjamin, ame abaka me Juda donyo kede i boma dok daŋ kato kede oko ka oya i boma, kede i dogcel luŋ me Jerucalem,

²⁰eka ite kobo ni, ‘Winy wunu kop a Rwot wun obakki me Juda kede wun jo me Juda luŋ, kede jo luŋ ame bedo i Jerucalem ame bea i dogcel magi.

²¹Rwot okobo ni myero inen ni igwoko wunu kwowu, myero kur iye wunu yeccoro i nino me cabit, dok daŋ myero kur ikel wunu ginnoro i nino-nono kun ibeo wunu i dogcel me Jerucalem.

²²Kur daŋ itin wunu ginnoro i udiwu iter wunu oko i nino me cabit, akadi tiyo ticcoro, cite myero ikwer wunu nino me cabit bed acil, kite ame rik aciko kede kwariwu.

²³Kadi amannono, gin gigi rik mom owinyo, mom daŋ ociko yitgi me winyo koppa, cite omio ŋutgi obedo ka anwaŋ, me mom owiny dok daŋ mom ogam pwonnyoro.

²⁴“ ‘Cite ka wun iwinyo wunu koppa, eka mom ite yeyo wunu yeccoro beo wunu kede i dogcel luŋ me boma man i cen cabit, cite kwero wunu i nino-nono obedo acil kun mom daŋ itio wunu iye ticcoro,

²⁵mannono bino miyo obakki ame bino bedo i wi kom loc a Daudi beo i dogcel magi, kun oriŋo i gadigadi kede aguragura, obino donyo karacel kede rwodegi, kede jo luŋ me Juda karacel kede jo ame bedo i Jerucalem. Boma man doŋ luŋ jo bino bedo iye nakanaka.

²⁶Jo bino bino kun oya i boma luŋ me Juda, kede kabedo luŋ ame oguro Jerucalem, i lobo me Cepela, i lobo obedo kidikidi, kede i Negeb, kun okelo mot awaŋa, kit mot ocele me amia baŋ Rwot, mot me moko kwon, odokkogo ame ŋwecgi kur, dok daŋ okelo mot me pwoyo Rwot i ot a Rwot.

²⁷Cite ka mom iwinyo wunu koppa, mom igwoko wunu ceŋ me cabit obedo acil, cite iyeo wunu yec ite beo wunu kede i dogcel me Jerucalem i nino me cabit, abino moko mac i dogcellono luŋ, maccono te waŋo udi adoŋo me Jerucalem luŋ, maccono mom obino neko kadi acel.’ ”