Read lango Jeremia 18 Bible Online

Jeremia 18 - lango bible

Jeremia 18

¹Man en kop ame Rwot okobo baŋ Jeremia,

²en okobo ni, “Jeremia ya iwot i ot acwe gulu, abino miyi iwinyo koppa i kare ame itye kuno.”

³An daŋ ate ya wot i ot acwe gulu, ate nwoŋo en tye acweyo gulu mere i kom okot me cweyo gulu mere.

⁴Gulu lobo ame en tye acweyo-nono te balle oko i kare ame en tye acweyo, en te nyonyobo oko, te t iyo i gin ocele kite ame en amito.

⁵Rwot te kobba ni,

⁶“Wun jo me ot Icrael, ce ni an mom aromo timowu kite ame acwe gulu otimo cae? Wun jo ot Icrael, myero iŋe wunu ni kite ame lobo tye kede i ciŋ acwe gulu, wun daŋ itye wunu kittono i ciŋa.

⁷Ka ce i kare moro an akobo kop i kom rokkoro onyo i kom loccoro ni mannono abino puto, abino turo ate tyeko odoco,

⁸doŋ ka ce rok ame akobo kop i komgi-nono bino weko lubo yo ame onwoijo otye ka lubo, abino weko timo gin arac ame onwoijo ayikere me timo i komgi.

⁹Dok ka ce i kare moro an akobo kop i kom rokkoro onyo i kom loccoro ni mannono an abino pito ate daŋ gero doki,

¹⁰ka ce rokkono te dok timo bal i nyima, kun mom owinyo koppa, cunya bino ya oko i kom gin aber ame onwoŋo ayikere me timo i komgi.

¹¹Aman doŋ ba, yin myero i kobbi jo me Juda kede jo ame bedo i Jerucalem ni, an atye ka yiko gin arac pirgi, dok daŋ ayikere me keto can i komgi. Doŋ myero gin iye lokere, ŋat acel acel myero wek lubo yo arac ame yam elubo, dok myero iyik kwowu kede ticwu.

¹²“Cite gin te gamo ni, ‘Mannono kom konyere mom! Wan giwa obino lubo gin ame wan ikomwa otyeko yiko, dok ŋat acel acel daŋ bino timo tim me apala apala kite ame cunye tele kede’.”

¹³Mannono omio Rwot okobo ni, “Koŋ ipepenyo i akina orok, kodi timmo yam koŋ otimere kare moro? Jo Icrael ame amaro, otimo twon ginnoro ame iyiliyili meicel.

¹⁴Tye kare moro ame itwero onwoŋo pee orwenyo i wi kiddi me Lebanon, onyo kulo ame pii mere ŋic ame mol kun ya i wi kidi, twero two imek kare moro?

¹⁵Cite jona wigi owil oko i koma, owaŋo gin a ŋwece kur oyalo obaŋe mogo ocele. Orwenyo doŋ oko i yo ame otye ka lubo, oweko lubo yo acon oko, olubo doŋ yo mogo atitino, mom olubo yo gudo.

¹⁶Omio lobogi obedo gin ame mio jo lworo, obedo doŋ kan ame jo bino bedo cayo nakanaka kun ojwiye ka otuno iye. Ŋat acel acel ame beo iye bino bedo i twon lworo adwoŋ meicel, mio bedo yeno wie ayeŋa.

¹⁷Abino keketogi oko i nyim okworgi, calo apua ame yamo me tuŋ kide tye akolo. Abino nyuttigi ŋea, cite mom waŋa, i kare ame can opoto i komgi.”

¹⁸Gin te kobo ni, “Biye wunu, me obin opor wunu kop arac ikom Jeremia! Olamdog gire mom bino rwenyo i baŋwa i kare moro me pwonyowa, oryek o daŋ bino bedo miyowa tam, odwarpiny daŋ bino bedo rabbiwa kop. Biye wunu, obin opwode wunu i koppogo apek, mom myero omedde winyo koppere moro.”

¹⁹Jeremia te kwayo Obaŋa kun kobo ni, “Tim ber, Ama Rwot, iwiny kop ame atye ka kobo-ni, kede gin ame okworra tye ka kobo i koma.

²⁰Gin aber oculo i gin arac bo? Aco koŋ inen, gin doŋ otyeko kunyo bur me kwanyo kwona. Po ba pi kite ame abedo cuŋ kede i nyimi kun akobo kop aber i komgi, me ikwany akemoni oko i komgi.

²¹Pi mannono myero imi kec nek itinogi; mi pala me romo nekgi, mi mongi doŋ nono aboŋo itino kede coggi. Mi two edeke nek coggi luŋ, kun awobegi ame pwod tino ococobo i pala romo i mony.

²²Mi koko winyere i udigi, i kare ame icwao mony i komgi atura meicel! Pien gin doŋ otyeko kunyo bur me kwanyo kwona oko, dok daŋ ociko owic me maka.

²³Kadi amannono, yin Rwot gire iŋeo ginnoro luŋ ame gin tye ka poro i koma me neka. Kur itimgi kica i balgi-nono, ti tic i komgi kare ame akemo omaki.”