Read lango Jeremia 19 Bible Online

Jeremia 19 - lango bible

Jeremia 19

¹Rwot okobo ni, “Wot iwil cupa ame acwe gulo ocweo kede lobo, kwany odoŋe ame loo lwak kede olamdog oteggo mege ame ori i tic,

²wot i jonnono naka i luŋ a wot a Kinom, kun idonyo wunu i dogcel me boma ame olwoŋo ni Abaltak, ite kobo kop ame abino kobbi-ni luŋ kuno.

³Ibino kobo ni, ‘Winy wunu kop ame Rwot okobo wunu obakki me Juda kede wun jo luŋ ame bedo i Jerucalem. Rwot me mony ame obedo Obaŋa a jo Icrael okobo ni, Nen an akelo gin arac i kabedo man ame ŋat acel acel ame bino winyo i yitgi, yit bino bedo mor amora kare luŋ.

⁴Pien jo otyeko weka oko, gin obalo kabedo man i waŋo gin a ŋwece kur me yalo obaŋe mogo ocele, ame akadi gin ikomgi, akadi kwarigi, akadi obakkigi yam mom ŋeo. Pien gin doŋ omio remo a jo a mom i bal oony meicel i kabedo man,

⁵dok daŋ ogero ka woro Baal i wi kiddi malo ame owaŋo iye itinogi awobe me yalo Baal acalo mot awaŋagi, ame an gira rik mom acikogi pire dok daŋ rik mom atamo pire kadi acel, mom daŋ amio cikkoro pire,

⁶pi mannono, nen ba, Rwot okobo ni nino tye abino ame kabedo mom dok obino medo lwoŋo kabedo man ni Topet, onyo ni luŋ a wot a Kinom, cite ni luŋ me neko jo.

⁷Dok i kabedo man, en ame abino balo iye yik a jo Juda kede jo Jerucalem. Abino miyo pala lweny neko jogi iye i nyim okworgi, kede i ciŋ jo ame mito nekogi. Kom jogi oto bino doko cam a winy ame twarre malo kede me a leyi ame bedo i lobo.

⁸Abino miyo boma man bedo gin ame mio jo lworo, kun kan ame jo ka otuno iye jwiye ajwia, ŋat acel acel ame bedo iye lworo mako, te bedo jwiye ajwia pi can ame opoto iye.

⁹Abino miyogi ocamo kom itinogi kede me anyiragi, kun ŋat acel acel camo kom dano wadgi i kare ame mony ogurogi kede i kare ame otye kede peko, kan adiŋ meicel, ame nwoŋo okworgi kede jo ame mito nekogi okelo i komgi’.

¹⁰“I kare-nono en ame ibino neko iye cupa i nyim jo ame onwoŋo owoto kedi,

¹¹eka ite kobbigi ni, ‘Rwot me mony okobo ni, Abino turo rok man kede boma man kittono, kite a dano turo kede gin ame ocweo i lobo ame mom dok romo yikere. Jo bino yiko komjogi oto i Topet, pien kannoro ocele bino bedo mom me yiko jo.

¹²Rwot okobo ni, abino timo kabedo man kittono, karacel kede jo ame bedo iye, kun amio kabedo man bedo calo Topet.

¹³Udi me Jerucalem kede udi obakki me Juda, udi luŋ ame onwoŋo owaŋo gin akur i wigi me yalo ginnoro luŋ ame tye i akina mony me polo, dok daŋ oonyo iye mot amata baŋ obaŋegi ocele mege, bino balle oko calo kabedo ame tye i Toper’.”

¹⁴Jeremia doŋ te ya oko i Topet, kan ame Rwot onwoŋo ocwae iye me wot rabo koppere, eka te bino cuŋ i dyekal me ot a Rwot, te kobbijo luŋ ame onwoŋo tye kuno ni,

¹⁵“Rwot me mony ame obedo Obaŋa a jo Icrael okobo ni, Nen ba, An akelo i kom boma man adwoŋ kede i kom boma atino mege luŋ ginnoro arac luŋ ame doŋ atyeko rabo pire i komgi, pien gin omio ŋutgi obedo anwaŋ, kun okwero winyo koppa oko.”