Read lango Jeremia 2 Bible Online

Jeremia 2 - lango bible

Jeremia 2

¹Kop a Rwot obino baŋa kun kobba ni,

²“Wot irab kop man baŋ jo me Jerucalem, me gin owiny. Rwot okobo ni, Atye ka poyo kite a rik imiye kede baŋa i kare me tinoni, marri onwoŋo calo me atera, kite ame rik ibedo luba kede tim, i lobo a mom ocoo iye kotimoro,

³Icrael rik onwoŋo cil pi Rwot, acalo cam ogeo cek ame en okao. Jo luŋ ame camo odoko obal, gin arac poto i komgi, Man kop a Rwot ikokome.”

⁴Wun jo me ot a Yakobo, winy wunu kop a Rwot, kede jo luŋ me doggola a jo Icrael.

⁵Rwot okobo ni, “Gin aŋo arac ame rik kwariwu oneno atimo, ame te miyo weka oko, ote wot abor abora keda-ni, ote bedo lubo gigi mogo a konygi mom-mi? ame te miyogi daŋ doko jo a konygi mom-mi?

⁶Mom daŋ doŋ openyo ni, ‘Rwot kara tye kwene ba, Rwot ame okwanyowa i lobo Miciri, ame obedo telowa i tim, lobo otal dok bur dwon iye, lobo ame otwo dok acol icuc, i lobo ame ŋattoro mom onwoŋo bea iye, kan ame jo mom bedo iye?’

⁷Rik ate kelowu i lobo ame ceko cam atek meicel, me iyomoro wunu cunywu i cam iye kede jami luŋ abeco ame tye iye. Cite i kare ame wun ituno wunu iye, wun ite balo wunu lobo-nono oko, te loko wunu gira doko gin me kwer.

⁸Olamdog daŋ mom openyo ni, ‘Rwot kara tye kwene?’ Wegi cik daŋ onwoŋo mom nea, oloc daŋ onwoŋo tye turo cik i koma, odwarpiny doŋ tyeto tyet nyiŋ Baal, ote bedo lubo gigi mogo ame konygi mom.

⁹“Mannono omio pwod atye ka penyowu, Rwot okobo, abino penyo naka ikwaewu.

¹⁰Koŋ idokoro nam ikat i dog kulo me Kupuro me inen, on yo koŋ icwa dano i Kedar me wot ŋi aber, koŋ inen ka ce kodi ginnono tye.

¹¹Koŋ tye rokkoro ame oloko obaŋegi kadi bed gin woro obaŋa a mom obaŋa i kome Cite jona oloko kwogogi oko pi gin ame konnyere mom.

¹²Yin polo, wur kop man, koyo myero onyere i komi, kun lworo ociri oko, man kop a Rwot okobo,

¹³pien jona doŋ otyeko timo bal aryo areco, gin doŋ otyeko weka oko, kun an abedo akoŋ me pii me kwo, gin doŋ oluŋyo kunyo piigi kengi, piigi-nono obedo pii ame balle oko ame pii kare ocele dwono oko.

¹⁴“Icrael obedo opii bo? En obedo amiro ame onywalo paco bo? Kara en dok odoko lee me acama i yore aŋo?

¹⁵Eŋatu doŋ kok apol ata i kome, okok i dwongi aloŋo meicel. Omio lobo mere doŋ odoŋ oko nono, boma iye luŋ doŋ odoko wi obur, jo moro doŋ mom tye iye.

¹⁶Medo i kom mannono, jo Mempic kede jo Tapanac, doŋ otuco wii oko.

¹⁷Mom yin en ikelo can man i komi keni, pi weko Rwot Obaŋani, i kare ame yam en obedo telowu i tim?

¹⁸Kara am an doŋ ŋo ame inwoŋo wunu pi wot i Miciri, me wot mato pii i kulo Nail? Onyo ŋo ame inwoŋo wunu pi wot i Accuria, me wot mato pii i kulo Epurate?

¹⁹Balwu en ame bino pwodowu, gak weko Obaŋa en ame bino kela can i komwu me pwonyowu. Myero inen dok iŋe ni gin arac kede gin a kelo cwercuny, pi wun me weko Rwot Obaŋawu; lworo i kom Obaŋa mom doŋ tye i cunywu. Man en kop ame Rwot Obaŋa me mony okobo.

²⁰“Ituro wunu kol oko ŋutwu con meicel, icodo wunu daŋ nyor ame otweowu kede oko; ite kobo wunu ni, ‘Mom abino tic pire.’ Aco kono i wi kidi luŋ aluŋa, kede i te yen obuŋere ducu, ibedo ryebere wunu piny calo alaya.

²¹Aco an yam onwoŋo apitowu me bedo olok amittere, ame nyige luŋ beco odoco. Kara dok ilokere wunu i yore aŋo ba, en ame doŋ idoko wunu olok me tim oko-ni?

²²Kadi bed ilwok komwu i cabun agwa meicel, kadi ilwokere wunu i cabun ame bwo mere dwoŋ nwoŋo pwod atye ka neno cila me balwu. Man kop ame Rwot Obaŋa okobo.

²³Itwero kobo wunu nino ni, ‘Wan giwa mom ojebere i bal, mom giwa obedo lubo Baal’? Koŋ inen yo ame ibedo lubo wunu i luŋ ŋe gin ame ibedo wunu timo, icalo wunu atin inaga ame lubo yo mere kene,

²⁴calo kana me tim ame doŋ ona gire me bedo i tim, ame wao yamo i wume kun nwoŋo amito twon! Ŋa ame twero juko miti mere? Jo luŋ ame yenye myero kur ol, gin bino nwoŋe i dwe mere i kome,

²⁵Gwok tyeni kur iwot aboŋo amuk, gwok dwoni kur two oko pi oryo pii. Cite yin giri ikobo ni, ‘Konnyere gire mom, pien an doŋ amaro obaŋe ame wele, dok daŋ abino medde lubogi.’

²⁶“Kite acalo lewic mako akwo ka omako, lewic daŋ bino mako jo me ot Icrael kittono; gin ikomgi, obakkigi kede olocgi, olamdoggi kede odwarpingi,

²⁷ame kobbi yat ni, ‘Yin ibedo pappa,’ dok kobbi gweŋ ni, ‘Yin en inywala’, pien gin doŋ oloka ŋegi, mom nyimgi, Ento i kare me can gin dokokobo ni, ‘Ya malo me ilarwa!’

²⁸Kara obaŋewu-nono tye kwene obaŋewu ame wun i komwu itimo wunu-nono? Koŋ gin oya malo ka ce otwero larowu, i kare ame itye wunu kede peko; pien kite ame bomawu pol kede, obaŋewu daŋ pol kittono, wun jo Juda.

²⁹Rwot okobo ni, Piŋo kara itye ka ŋuŋura i koma? Wun luŋ ijem wunu i koma.

³⁰Pwodo itinowu ame yam apwodo mom okonyo kadi acel, kitegi mom oyikere; pala romowu en oneko odwarpinywu, calo eŋatu ame owor.

³¹Doŋ ba, wun jo me kare man, winy wunu kop a Rwot. An onwoŋo abedo calo tim bo baŋ jo Icrael? Onyo twon lobo moro acol icuc? Kara doŋ piŋo jona kobo ni, ‘Wan giwa obino bedo kite ame yiwa mito, wan mom dok obino dwogo baŋi?’

³²Wi nyako twero wil i rukkere me kwogo, onyo wi atera twera wil i gomici mere me nyom? Ento wi jona doŋ owil i koma oko, pi kare alac ame mom doŋ romo kwannere.

³³“Wun doŋ odiro meicel yenyo dyere, me timo tim me alaya! Omio kadi baŋ mon areco, wun ipwonyogi me lubo kitewu.

³⁴Dok bono ame iruko i komi, remo ocan a mom i bal tye iye; yam mom inwonogi otye oturo ot acalo okwo, kadi amannono, i kom kop magi luŋ,

³⁵yin ikobo ni, ‘Balla moro mom; akemo mere gire doŋ otyeko ya oko i koma.’ Nen ba, abino ŋolli kop, pi kobo ni, ‘An gira mom atimo bal.’

³⁶Piŋo kara itye ka wot atata, idok tuŋŋi kede tuŋŋi! Jo Miciri bino miyo lewic maki, kite ame rik jo Acuria omio lewic omaki kede,

³⁷Ibino ya i kuno me dwogo cen, kun ikwako wi i, pien Rwot otyeko kwero ja ame igeno-nono, dok gin pe twero miyo ibedo aber.”