Read lango Jeremia 20 Bible Online

Jeremia 20 - lango bible

Jeremia 20

¹I kare-nono Packur wot a Immer, ame rik obedo alamdog adwoŋŋere ame loo ot a Rwot, owinyo ka Jeremia rabo kop magi.

²Packur rik te goyo Jeremia adwarpiny i caa-nono cutu, te make tweye oko i kol, te kette malo i yi dogcel ame olwoŋo ni Dogcel a Benjamin ame bedo malo i ot a Rwot.

³Orwo mere, i kare ame Packur ogonyo Jeremia i kol, Jeremia okobbe ni, “Rwot gire mom lwoŋi ni Packur, cite en lwoŋi ni Lworo tuŋŋi i tuŋŋi.

⁴Pien Rwot okobo ni, Nen ba, abino miyo yin ibedo gin ame yin ikomi ilworo, dok owoteni daŋ lworo. Pala lweny okworgi bino nekogi kun yin ineno. Abino miyo jo Juda luŋ i cin abaka me Babulon, en bino terogi oko acalo opii i Babulon, bino nekogi i pala romo.

⁵Medo i kom mannono, abino miyo lonyo luŋ ame tye i bomawu, ago ba moro luŋ ame inwoŋo wunu ame tye iye ginnoro luŋ iye ame pirgi littiwu kede kit lonyo apapat ame obakki me Juda okano, abino miyogi luŋ i ciŋ okworgi, ame bino mako oko ote yako tero oko i Babulon.

⁶Doŋ yin Packur karacel kede jo luŋ ame bedo i odi, obino terowu oko luŋ acalo opii. Ibino wot wunu i Babulon kan ame ibino to wunu iye kuno, ote yiko komwu daŋ kuno, yin karacel kede owoteni ame ibedo rabbigi kop me gobagoba.”

⁷Ama Rwot, yin doŋ ibwola, omio jo daŋ obwola, Yin itek ikata oko, daŋ doŋ ityek o loya oko, Adoko doŋ gi-anyera a jo nino i nino, jo luŋ doŋ yeta ayeta,

⁸Pien ginnoro luŋ ame akobo, akobo i dwon aloŋo, kun aredo atek ateka ni, “Tim me byemi! Lobo daŋ oballe oko!” Pien kare luŋ ka atito kop a Rwot, jo nyera anyera dok daŋ ocao-gu acaa,

⁹Ka ce akobo ni, “Mom dok abino lwoŋo nyiŋ Rwot, onyo ni mom dok abino kobo kopporo i nyiŋe”, cunya onwoŋo tye iye ginnoro acalo mac, ame tye okanne oko kom cogona, mom doŋ aromo jukere kadi acel, mom atwero diyo cunya-nono.

¹⁰Pien awinyo jo apol apola tye amuŋo, Lworo doŋ tye i kabedo luŋ! Gin okobo ni, “Okwere wunu doŋ oko! Okwere wunu doŋ oko!” Man kop ame awinyo owotena a ceggi keda tye akobo, kun otye ka neno kite ame abino poto kede. Dok daŋ okobo ni, “Gwok onyo obino bwolle abwola, mannono twero miyowa omake oko, ote culo kworwa i kome.”

¹¹Ento yin i Rwot itye keda acalo lo atek i lweny, ame olworo, mannono bino miyo jo ame tye ka wuna twomere, mom daŋ obino loya, Lewic bino makogi meicel, pien yikgi mom bino cobere. Lewicgi-nono bino ri nakanaka, wi jo mom bino wil iye.

¹²Ama Rwot me mony ame temo kite a dano ka atira, ame neno cuny dano kede tammere. Mia anen kite ame iculo kede kwor i kom okworra, pien an doŋ atyeko miye gira i ciŋ i,

¹³Wer wunu wer me pako Rwot, pake wunu ba! Pien otyeko doŋ laro kwo a jo ame piny oloo, i cin otim tim areco.

¹⁴Nino ame rik onywala iye kono orwenyo oko, do ber! Gummoro kono mom te bedo atwal, i nino ame totta onywala iyenono!

¹⁵Cen myero mak ŋat ame okelo amut aber baŋ pappa ni, “Onywalo atin awobi”, ame te miye bedo i yomcunynono.

¹⁶Dano-nono myero bed winyo koko odiko, kede duru i cuny dyeceŋ,

¹⁷pien en mom oneka ame pwod atye iyi totta, kono yi totta obedo lyel me yika, kono ot nyodo a totta obedo apek apek atwal.

¹⁸Piŋo kara adonnyo rik iyi totta, me rwatte i tic atek kede cwercuny, dok me bedo kede lewic pi kare me kwona luŋ.