Read lango Jeremia 22 Bible Online

Jeremia 22 - lango bible

Jeremia 22

¹Rwot okobbi Jeremia ni, “Wot baŋ jo me ot abaka me Juda, iwot ikob kop man kuno, kob ni,

²‘Winy ba kop a Rwot, yin abaka me Juda ame bedo i wi kom me loc a Daudi, kede omironi, nakajo ame bedo i dogcel man.

³Rwot okobo ni myero iŋol wunu kop kakare dok itim wunu gin atye atira, ilar wunu daŋ ame otye ka wuno i ciŋ jo ame tye ka mayo jamigi. Dok daŋ myero kur itim wunu ginnoro arac onyo timmoro me byemi i kom rokkoro ame bedo i akinawu, i kom itino kic kede i kom mon ame coggi oto, kur daŋ iony wunu remo a ŋattoro a mom i bal i kabedo man.

⁴Ka ce ibino lubo wunu kop man ateteni, bino miyo obakki ame bedo i wi kom loc a Daudi, ame riŋo aguragura kede gadigadi, karacel kede omirogi kede jogi, gin luŋ obino donyo i dogcel luŋ me ot man.

⁵Cite ka mom ibino ciko wunu yitwu me winyo kop man, an Rwot akwoŋo i nyiŋa kena kena ni, ot man bino doko wi obur.’

⁶Pien Rwot ame okobo kop i kom jo me ot abaka me Juda okobo ni, “Wun itye wunu calo lobo me Gilead i tuŋ baŋa, icalo wunu wi kidi me Lebanon, kadi amannono, abino miyowu idoko wunu tim otwo ikaŋ, boma ame jo mom bedo iye.

⁷Abino yiko olweny ame bino tyekowu oko, ŋat acel acel bino mako jami me lwennyere. Gin jo-nono bino totoŋo yennogo me cedar abeco mege reto oko piny, ote waŋogi oko i mac.

⁸“Rok luŋ bino bea i ŋet boma man, ŋat acel acel i akinagi bino penyo awottere ni, ‘Piŋo kara Rwot otimo gin acalo man i kom boma man adwoŋ wokki?’

⁹Awottere bino gamo ni, ‘Pien gin oweko cikere ame rik ocikere i Rwot Obaŋagi oko, dok obedo woro obaŋe mogo ocele, kun daŋ otio pirgi.’ ”

¹⁰Kur ibed koko pi Yocia ame doŋ otyeko to oko ca, kur daŋ ikum pire; cite myero ikok atek meicel pi ijat a doŋ woto oko, pien mom dok bino dwogo kadi acel, me neno lobo ame onywale iye.

¹¹Pien Rwot okobo kop i kom Calum wot a Yocia, abaka me Juda, ame obedo loc akaka pappere Yocia, ame onwoŋo doŋ otyeko ya oko i lobo man, en okobo ni, “En mom dok bino dwogo kan kadi acel.

¹²En bino to i lobo ame otere iye acalo opii, en mom dok bino neno lobo man kadi acel.”

¹³Ŋat ame gero ode kede tim a mom atira, tye kede can, dok gero ici ka mege imalo aboŋo gennoro, ame mio dano wadgi tio baŋe nono kun mom mio ocara mere.

¹⁴Dano ame kobo ni, “Abino gero twon oda moro adwoŋ meicel, kun amio icika luŋ iye i malo bedo alac odoco.” Ame keto waŋ dirica i ode, eka te peto bao cedar iyi ici ka me ot, te daŋ puyo apama mere oko i raŋi arema,

¹⁵hamo ni mannono bino miyi idoko abaka, pi gero odi kede yen me cedar? Pappi mom yam obedo i kuc adwoŋ meicel i lobo-ni, mom kare luŋ en obedo dano a genne dok ame ŋolo kop atira? En rik te bedo aber i yore luŋ.

¹⁶En obedo ŋolo kop ocan kede me a jo a piny olo kakare, omio en obedo aber. Mom mannono en ŋeyo Rwot?

¹⁷Cite yin ibedo keto cunyi i komi keni, pi nwoŋo agoba i yore a mom ber, kun imito onyo remo a jo a mom i bal, iwuno jo kede timo tim me byemi. Man kop a Rwot.

¹⁸Mannono omio Rwot okobo kop i kom Yekoyakim, wot a Yocia, abaka me Juda ni, “Mom obino kumo pire, kun okobo ni, ‘Ominna doi!’ onyo ni, ‘Atinna doi!’ Mom obino kumo pire, kun okobo ni, Rwotta doi! onyo ni, ‘Abakana doi!’ ”

¹⁹Obino yiko i kite ame oyiko kede gwok, obino telo atela tetek, ote wot bolo i ŋe cel oko.

²⁰“Wot wunu i wi kidi me Lebanon, me iwot ikok wunu kuno, wot ikok wunu atek i lobo me Bacan; red wunu ilwoŋo i Abarim, pien jo ame yam imaro wunu luŋ doŋ otyeko oko,

²¹Rik akobo kedwu i kare ame lim dwoŋ i ciŋwu, cite wun giwu ite kwero wunu winyo koppa oko, Mannono en gin ame ibedo timo wunu cakere i tinowu, mom ibedo winyo wunu koppa.

²²Yamo bino kolo okwatwu luŋ, mon ame marowu bino wot oko i opii, Lewic bino makowu, ale te twodowu, pi tim areco ame ibedo timo wunu,

²³Ama wun jo ame bedo i Lebanon, ame ibedo wunu aboŋo lworo i akina yen cedar, ibino cur wunu atek meicel ka rem me can oere i komwu, rem ame rom aroma i me a dako amerem me nywal ogoo.”

²⁴Rwot okobo ni, “Kite ame atye kede kwo-ni, kadi bed Yekonia wot a Yekoyakim abaka me Juda, onwoŋo obedo atem me ŋut cin ame onwoŋo tye i ŋut ciŋa tuŋ cem, onwoŋo pwod aromo kwanyo oko i ŋut ciŋa

²⁵ate miyo baŋ jo ame mito neke, i cin jo ame en lworo, naka kadi i cin Nebukadnejar abaka me Babulon kede ocirikale mere.

²⁶Abino bayi i lobo ocele karacel kede totti ame onywali, kan ame mom rik onywali iye, ibino to daŋ kuno,

²⁷Cite mom dok obino dwogo cen kadi acel i lobo man ame omito ni kono odwogo iye-ni.”

²⁸Jeremia te kobo ni, “Man mom Yekonia ame cuny doŋ ocao oko-ni, ame doŋ calo tako gulu ame obolo ame mom doŋ tye ŋattoro amito-ni? Piŋo kara en kede itino mere obologi i lobo ame gin mom oŋeo, i ciŋ jo ame mom oŋeo?”

²⁹Yin lobo! Yin lobo! Yin lobo we! Winy ba kop a Rwot ame etye ka kobo.

³⁰Rwot okobo ni, “Co kop ame otyeko doŋ ŋolo oko i kom dano man, en mom bino bedo kede atinnoro, gummoro mom bino bedo i kome kadi acel pi kare me kwo mere luŋ, Akware moro mom bino bedo kede gum me bedo iwi kom loc a Daudi, kun bedo dok aloc i Juda.”