Read lango Jeremia 23 Bible Online

Jeremia 23 - lango bible

Jeremia 23

¹Rwot okobo ni, “Can i wi okwat ame keto dok neko rommina i bar kan ame okwaogi iye!”

²Mannono omio Rwot Obaŋa a jo Icrael okobo kit man i kom jo ame kwao rommi mere, ame gin jona, En okobo ni, “Wun okwat ame iketo wunu rommina oko, ame iryemogi wunu icwaogi wunu teŋe, dok daŋ ikwero kwayogi wunu oko. Nen ba, abino ciko waŋa i komwu me keto can i komwu pi gin arac ame itimo wunu.

³Icennere abino coko rommina ame odoŋŋere, ame tye i lobo apapat ame rik aryemogi iye, ate dwoggogi cen kan iyi anokgi, ote nywal nya atek meicel.

⁴Abino keto okwat ocele me kwayogi, ame mio mom dok oromo lworo ginnoro. I kare-nono cunygi mom dok bino medde poto kadi acel, moro i aki ‘nagi daŋ mom bino rwenyo.

⁵“Nen ba, Rwot okobo ni, nino tye abino ame abino keto dok akwar Daudi ikokome i kom me loc. En bino loc i ryeko, kun daŋ tio gin atye atira, bino ŋolo kop kakare te miyo kuc bedo tye i lobo.

⁶Obino laro Juda i kare mere, dok jo Icrael bino bedo kede kuc. Nyiŋ ame obino lwoŋe kede ene: ‘Rwot ame olarowa.’

⁷“Pi mannono, kare tye abino ame jo mom dok bino kobo ni, ‘Kite ame Rwot tye kwo-ni, Rwot ame okwanyo jo Icrael i lobo Miciri,’

⁸ento ni, ‘Kite ame Rwot tye kwo-ni, Rwot ame okwanyo jo Icrael i lobo ame tye tutuŋ anyarodi kede i lobo luŋ ame rik eryemogi ecwaogi iye.’ Gin doŋ bino bedo i lobogi ikokome.”

⁹Jeremia okobo kop i kom odwarpiny ni, “Cunya otyeko balle oko, cogona luŋ tye ka myel amyela. Acalo doŋ ŋat omer, acalo ŋat ame kono olok oromo meicel, Mannono tye atimere i koma pi Rwot, kede pi koppere acil.

¹⁰Jo i lobo luŋ doŋ mom geno Rwot, kitegi doŋ oballe oko arac meicel, lobo tye akumo pien Rwot doŋ oceno oko, bar me kwat daŋ doŋ otwo imek. Tim a jo luŋ doŋ rac odoco, mom daŋ otio i twergi kakare.

¹¹“Odwarpiny anaka olamdog daŋ mom doŋ geno Rwot; anwoŋogi-gu otye ka timo tim arac i ot me wora ikokome. Man kop ame Rwot okobo,

¹²Pi mannono ba, yo ame gin olubonono, bino bedo apwot dok acol meicel, obino ryemogi i yo-nono ote rette iye. An abino kelo can i komgi, ka mwaka me keto can i komgi oromo. An Rwot en akobo kop man.

¹³Aco odwarpiny me Camaria, anenogi otye ka timo tim me ipyeda, pien otye ka rabo kopgi i nyiŋ Baal, otelo jona Icrael arac, omio ogak oko,

¹⁴Man en kop ame Rwot akobo i kom odwarpiny me Jerucalem, ‘Anene ginnoro arac okato kare i komgi, otye ka cot kun okobo-gu goba i kabedo ducu, otye ka konyo otim areco medde ameda kede timgi, ame omio ŋattoro mom ye weko timmere araccono; gin luŋ doŋ ocalo Codoma i tuŋ baŋa, jo ame bedo iye calo jo Gomora.’

¹⁵Mannono omio Rwot me mony okobo kop i kom odwarpiny ni, Nen ba, abino pitogi i kwir a yit, ate miyogi mato pii ame kwir tye iye; pien tim me mom geno Obaŋa olal oromo lobo luŋ, kun ya i baŋ odwarpiny me Jerucalem.”

¹⁶Rwot me mony okobbi jo Jerucalem ni, “Kur iwiny wunu kop odwarpiny ame rabbiwu kop, ote miyowu bedo i gen ame konnyere mom. Gin orabbiwu kop i kom amuttogo ame gin otamo atama kengi, ame mom Rwot en okobbigi.

¹⁷Otye ka kobo kare i kare baŋ jo ame cao kop a Rwot ni gin obino bedo aber, kede baŋ jo ame lubo gin ame gin omito apala apala ni ginnoro arac gire mom bino poto i komgi.”

¹⁸Kara ŋa i akinagi ame ocuŋ cokere a Rwot, me neno kede winyo kop a Rwot? Onyo ŋa i akinagi ame owinyo dok olubo gin ame en okobo?

¹⁹Koŋ inen akemo a Rwot doŋ obino oko calo yamo kot, ocako doŋ kodo oko calo yamo ajuru, bino mwoc i wi otim tim areco.

²⁰Akemo a Rwot mom bino jukere, tuno wan ame en otio dok ocobo, ginnoro luŋ ame tye i tammere. Ibino niaŋ wunu iye aber odoco i kare ame pwod tye anyim.

²¹“An gira onwoŋo mom aoro odwarpiny, cite gin gigi omukere i ŋwec kengi, an rik mom akobo kedgi, cite gin otye ka rabo kop.

²²Kono onwoŋo gin ocuŋ i cokerena me winyo koppa, kono gin orabo koppa ikokome baŋ jona, kono daŋ omiogi olokere oweko lubo yo arac, kun oweko timo gin arac ame otye ka timo.

²³“Rwot me mony openyogi ni mom en obedo Rwot ame tye kan aceggi, cite mom kan abor?

²⁴Dano twero pono kannoro me imuŋ ame mom ŋeye me kur enen kome? Mom en obedo Obaŋa ame tye i kabedo luŋ i polo kede i lobo?

²⁵En okobo ni etyeko winyo kopporo luŋ ame odwarpiny tye ka rabo gobagoba i nyiŋe, kun ŋat acel acel kobo ni, ‘Aleko lek! Aleko lek!’

²⁶Kop goba bino medde bedo i cuny odwarpiny man ame ogoba-ni pi kare a rom mene, dok ame obedo rabo kop me goba ame tye i cunygi?

²⁷Gin otamo ni lekgi-nono ame obedo ko bo iyi akinagi bino miyo wi jona wil oko i koma, kite ame rik wi kwarigi owil kede i koma pi Baal.

²⁸Adwarpiny ame oleko lek myero kob oko ni gin ekobo-nono eleko aleka, ento ŋat ame owinyo koppa ikokome myero bed ŋat a genne i kobo koppa-nono. Itwero poro reŋ kal kede kal ikokome?

²⁹Rwot dok te medde penyo ni, Mom koppa rom aroma kede mac kede anyul ame oninido gweŋ atitino?

³⁰Pi mannono, nen ba, cunya mom yom i kom odwarpiny ame kwa lo koppa i baŋ owotegi ote rabo ni kop ame okobbigi ennono.

³¹Nen ba, cunya mom yom i kom odwarpiny ame tio i lebgi me kobo doga nono ni, ‘Rwot okobo ni’,

³²Nen ba, cunya mom yom i kom jo ame kobo lek me goba goba. Lekgi ame otye ka kobo gobagoba-nono tye ka miyo jona gak agaka karacel kede wakeregi. An gira onwoŋo mom acwaogi, mom daŋ acikogi ni myero gin owoti; pi mannono, gin gire mom okonyo jona kadi acel. Man kop ame Rwot okobo, Gin gire mom okonyo jona kadi acel. Man kop ame Rwot okobo.

³³“Ka ce ŋat acel i akina jo man openyi, kadi obedo odwarpiny onyo alamdog, ni, ‘Kop aŋo apek ame Rwot okobo?’ Yin ibino gamo ni, ‘Wun en ame idoko wunu yec apek baŋ Rwot, pi mannono en okobo ni ebino bolowu oko,’

³⁴Ka ce adwarpiny onyo alamdog, on yo ŋattoro acel i akina jo man bino kobo ni, ‘Kop apek ame Rwot okobo ene’, abino keto can i kom dano-nono karacel kede jo me ode luŋ.

³⁵Man en kop ame ŋat acel acel i akinawu bino kobo baŋ awottere onyo baŋ ominnere ni, ‘Rwot ogamo niŋo?’ Onyo ni, ‘Rwot okobo niŋo?’

³⁶Mom dok ibino medde ko bo wunu kop man, ni, ‘Kop apek ame Rwot okobo ene’: pien kop apek ame ikobo wunu en kop a ŋat acel acel ko bo pire kene, Itye wunu ka dwadwanyo wunu kop a Rwot Obaŋa ame kwo, Rwot Obaŋa ame en Rwot me mony.

³⁷Ibino kobbi wunu odwarpiny ni, ‘Rwot ogamo koppi niŋo? Onyo ce Rwot okobo kop aŋo?’

³⁸Ento ka gin okobo ni, ‘Peko me kop a Rwot.’ Yin ibino kobbigi ni, pien wun ikobo wunu kop man ni, ‘Kop apek a Rwot okobo ene’, yin ibino kobbigi ni, acikowu ni mom myero imedde kobo wunu kittono,

³⁹doŋ pi mannono ba, abino tinowu malo ateteni ate bolowu oko teŋe i nyima. Wun karacel kede boma ame rik amio baŋwu kede baŋ kwariwu.

⁴⁰Abino miyo jo caowu, kun lewic daŋ makowu wan i wan, lewic kede acae ame wi jo mom twero wil iye.”