Read lango Jeremia 24 Bible Online

Jeremia 24 - lango bible

Jeremia 24

¹Rwot onyutta dita aryo ame nyig olam open yigi, kun tye i nyim ot me woro Obaŋa. Man otimere ame doŋ Nebukadnejar, abaka me Babulon otyeko tero Yekonia wot a Yekoyakim, abaka me Juda oko iyi opii, kun kwanyo i Jerucalem karacel kede otel me Juda, odoŋe ame loo tic apapat, karacel kede otel luŋ me Juda, gin luŋ oterogi i Babulon.

²Dita me agege onwoŋo tye iye nyig olam abeco mege, ame rom aroma i en ogeo cek, cite dita ocele onwoŋo tye iye nyig olam areco mege, en areco atek ate ka, ame mom romo acama kadi acel.

³Rwot te penya ni, “Ineno ŋo, Jeremia?” An ate gamo ni, “Nyig olam, en abeco mere meicel, kede nyig olam amereco okato kare, reco ame mom romo acama kadi acel.”

⁴Rwot te kobba ni,

⁵“Rwot Obaŋa me Icrael okobo ni, Jona ame okwanyo i Juda ote tero iyi opii i Babulon-ca abino terogi calo nyig olam abeco mere-nu.

⁶Abino ci ko waŋa i komgi me timo gin aber i komgi, te dwogogi cen i lobo man, Abino miyogi obedo jo atek kun mom dok aturogi adwokogi piny. Abino pitogi calo yat eka mom dok ate putogi oko.

⁷Abino miyogi cuny me ŋeyo ni an a Rwot, dok gin obino bedojona, kun an abedo Obaŋagi, pien gin obino dwogo baŋa i cunygi ducu.

⁸“Cite Rwot okobo ni, ‘Aco Jedekia, abaka me Juda, rwode mege kede jo odoŋ, kede odoŋ i Jerucalem ame tye bedo i lobo man, kede jo ame bedo i lobo me Miciri, abino terogi calo nyig olam areco atek ateka-nu, ame mom oromo-gu camo kadi acel.

⁹Abino miyogi obedo gi-alwora me rok luŋ i wi lobo bino lworo, gi-acaa a jo, gilolo dog jo, dok jo bino kobo kop areco i komgi, kun daŋ otio i nyiŋgi acalo kop me ceno jo i kabedo luŋ ame abino ryemogi terogi iye.

¹⁰Abino cwayo pala romo i komgi, kede kec kede too edeke, tuno waŋ ame gin luŋ otum oko i lobo ame rik amio baŋgi kede baŋ kwarigi.’ ”