Read lango Jeremia 25 Bible Online

Jeremia 25 - lango bible

Jeremia 25

¹I mwaka me aŋwen me loc abaka Yekoyakim wot a Yocia abaka me Juda, Rwot okobbi Jeremia kop i kom jo luŋ me Juda, (Man onwoŋo mwaka me agege me loc a Nebukadnejar abaka me Juda.)

²Mwaka-nono en ame Jeremia okobo i jo me Juda luŋ kede jo luŋ ame bedo i Jerucalem, kun kobbigi ni,

³“Aman doŋ odoko mwakki pyeraryo wie adek, kun cakere i mwaka me apar wie adek me loc a Yocia wot a Amon abaka me Juda tuno kede naka atot tin, Rwot obedo kop keda kun an daŋ atittiwu koppere tere tere, cite wun giwu ikwero wunu winyo wunu oko.”

⁴Mom iwinyo wunu koppere, mom daŋ itero wunu yitwu me winyo, kadi bed Rwot obedo cwayo omiro mere luŋ ame obedo odwarpiny baŋwu teretere, ame rabbiwu ni,

⁵“Ŋat acel acel i akinawu myero doŋ lokere wek yo arac ame etye ka lubo dok daŋ owek timo gin arac, me ibed wunu i lobo ame Rwot rik omiowu kede kwariwu i kare acon me bedo megwu atwal.

⁶Kur dok ibed wunu lubo obaŋe mogo ocele, kun itiyi wunugi, dok iworogi wunu, kun daŋ iroka wunu imi wunu akemo maka i tic ame ibedo tiyo wunu. Mannono bino miyo mom atimo ginnoro arac i komwu.

⁷Aco nen mom ibedo winyo wunu koppa, me imi wunu akemo maka i tic ame ibedo tiyo wunu ame kelo ka can i komwu wun ikomwu.

⁸“Mannono omio Rwot me mony okobo ni, Pien wun ikwero wunu winyo koppa,

⁹nen ba abino cwayo i kom rok ducu ame bedo tutuŋ anyarodi, kede amirona Nebukadnejar, abaka me Babulon. Abino kelogi me bino lweny i kom lobo man kede i kom jo luŋ ame bedo iye, kede i kom rok man luŋ ame oguro lobo-ni. Abino jwerogi odoco, dok abino miyo lworo mako jo i komgi, kun obedo jwiye ajwia. Abino miyo jo caogi nakanaka.

¹⁰Medo i mannono, abino giko i akinagi woo me yomcuny, woo me lelo, anaka dwon anyom karacel kede dwon atera. Ŋur a min kidi merego mom dok bino winyere iye, dok tara moro daŋ mom bino lyel iye.

¹¹Lobo man luŋ bino doko wi obur kun jo mom iye. Rok man bino tic baŋ abaka me Babulon pi mwakki ame romo pyerabiro twal.

¹²A doŋ mwakki pyerabiro otum, an doŋ ate keto can i kom abaka me Babulon kede rok ame en loo naca, kede lobo me Babulon, pi balgi, ate miyo lobogi doŋ nono doŋ atwal.

¹³Kop luŋ ame atyeko kobo i kom lobo naca abino miyo cobere daŋ kittono i kome, kede kopporo luŋ ame doŋ otyeko coyo i buk man, ame Jeremia otyeko rabo i kom rok apapat.

¹⁴Pien rok apol kede obakki mogo adoŋo doŋo bino lokogi odoko opiigi, cite an abino culogi kun alubo ticgi kede gin ame gin otimo.”

¹⁵Rwot Obaŋa a jo Icrael okobo ni, “Gam i ciŋa ikopo kono olok ame akemona opoŋ iye oko-ni, wot imi rok apapat luŋ ame acwai baŋgi matti.

¹⁶Gin bino mato ote cako gate oko, kun daŋ obaŋere oko pi lweny ame abino cwayo i komgi-nono.”

¹⁷Mannono omio ate gamo ikopo i cin Rwot ate mi yo rok luŋ ame Rwot ocwaa baŋgi mato.

¹⁸Jerucalem kede boma luŋ me Juda, obakki luŋ kede rwodegi, mannono te miyo lobo doko wii obur oko kun yigi nono, jo doŋ te cako jwiye kun owuro awura, ame otio i nyiŋ lobo-nono calo gin me ceno jo kite ame tye kede naka tin.

¹⁹Parao abaka me Miciri kede omiro mere rwode mere, kede jo mere luŋ,

²⁰karacel kede ruk ocele luŋ ame bedo i akinagi; obakki luŋ me lobo Uj kede obakki luŋ me lobo Piriciti (Acikelon, Gaja, Ekron, kede jo Acidod ducu ame odoŋ):

²¹kede jo ducu me Edom, Moab kede jo Ammon;

²²obakki ducu me Turo, obakki ducu me Cidon, kede obakki luŋ ame loo lobo ame tye i dog nam;

²³jo luŋ ame bedo i boma me Dedan, Tema, kede Buj; jo luŋ ame mworo yer wigi oko doŋ acegocego;

²⁴obakki ducu me Arabia kede rok apapat ame orubere aruba ame bedo i lobo otwo ikaŋ;

²⁵obakki ducu me Jibri, Elap, kede Media;

²⁶obakki luŋ ame tye i lobo ame tye tutuŋ anyarodi, jo luŋ ame bedo i lobo ame tye kan aboco kede jo luŋ ame bedo cegicegi, kun gin luŋ olubere aluba i yore i yore, Rok apapat me loc apapat ame tye i wi podo ame bedo i lobo kan daŋ myero mati. Icennere doŋ abaka me Babulon te mato.

²⁷“Rwot dok te kobba ni, ‘Kob baŋ lwak ni, Rwot me mony ame obedo Obaŋa a jo Icrael okobo ni myero imat wunu atek, imer wunu okato kare ite nokere wunu, ite rette wunu piny ame mom dok iromo ya wunu atwal, pi lweny ame acwalo i akinawu.’

²⁸“Ka ce gin okwero gamo ikopo oko i ciŋi me mato, yin ibino kobbigi ni, ‘Rwot me mony okobo ni myero nen ni imato wunu!

²⁹Pien nen ba, acako timo gin arac i boma ame olwoŋo i nyiŋa. Wun itamo wunu ni itwero bwot wunu ame mom oketo can i komwu? Pe gire itwero bwot wunu ame mom oketo can i komwu pien atyeko doŋ yikere me cwayo mony oko i kom jo luŋ ame bedo i wi lobo. Man kop ame Rwot me mony okobo.’

³⁰“Doŋ ba yin Jeremia ibino rabo kop man luŋ i komgi, kun ikobbigi ni, “Dwon Rwot bino mor winyere i polo, en bino woto dwone i kabedo mere acil. Dwone bino mor atek meicel kom jo mere, bino redo calo jo ame tye a jejebo olok i tyengi, i kom jo luŋ ame bedo i lobo.

³¹Dwone bino mor winyere naka agikki lobo piny, pien Rwot doŋ tye i kop ame en mito ŋolo i kom rok ducu. En bino ŋolo kop i kom jo luŋ, bino miyo oneko jo areco oko luŋ i pala me lweny, Man kop ame Rwot okobo.

³²“Rwot me mony okobo ni, Nen ba, abino ket can i kom rok ducu, kun aketo i kom rok acel acel. Dok yamo ajuru agwa meicel tye ka twarogi naka iyi agikki piny.

³³“Jo ame Rwot bino neko i ninonono bino radde i kabedo ducu, cakere i but lobo tuŋcel tuno kede tuŋ ocele. Mom obino kumo kadi acel pi jo-nono, mom daŋ obino coko komgi, dok mom daŋ obino yiko komgi; kom jo oto bino radde atata i wi lobo calo cet dyaŋ.

³⁴“Kok wunu ba ame iredo wunu areda, wun okwat, ŋenne wunu ba i buru wun okwa rommi, pien kare me nekowu kede me keketowu atata doŋ oromo oko, obino ŋolo ŋutwu calo ŋolo ŋut rommi ame ocwe,

³⁵Kabedo moro me larre okwat bino bedo mom, akadi kan ame okwa rommi twero laro me bwot.

³⁶Koŋ iwiny wunu koko okwat, winy wunu daŋ redo a jo ame kwao rommi! Pien Rwot tye ka balo ka kwatgi oko i twon akemo,

³⁷omio anok rommigi ame onwoŋo tye i kuc odoŋ yigi nono, pi akemo a Rwot ame gwa meicel.

³⁸Rwot doŋ calo eŋatu ame odonnyo i gorogoro mere, pien lobogi doŋ odoŋ yie nono, pi pala me romo a Rwot, kede pi twon akemo mere agwa.”