Read lango Jeremia 26 Bible Online

Jeremia 26 - lango bible

Jeremia 26

¹I mwaka ame Yekoyakim wot a Yocia ocako iye loc acalo abaka me Juda, Rwot okobbi Jeremia kop man, ni,

²“Rwot me mony okobo ni wot icuŋ i dyekal me ot a Rwot ite kobo kop man baŋ jo i boma luŋ me Juda ame bino me woro Obaŋa i ot a Rwot. Kobbigi kop luŋ ame atyeko cikki me kobo; pe iwek kopporo doŋ ame mom ikobo kadi acel.

³Kare okene gin twero winyo eka ŋat acel acel te weko lubo yo mere arac, me wek an daŋ aŋut i kom gin arac ame doŋ ayikere me tiyo i komgi pi timgi areco.”

⁴Yin ibino kobbigi ni, “Rwot me mony okobo ni, ka ce mom ibino winyo wunu kop ame an akobo me lubo cikka ame an atyeko keto i nyimwu,

⁵ka ce mom ibino winyo wunu kop amirona ame gin odwarpiny ame abedo cwayogi baŋwu me bino oyotoyot, kadi bed wun mom iwinyo wunugi,

⁶bino miyo amio ot man bedo calo Cilo, dok abino ceno boma man oko, te bedo me ceno rok luŋ ame tye i wi lobo.”

⁷Olamdog kede odwarpiny karacel kede jo luŋ te winyo Jeremia tye akobo kop magi i ot a Rwot.

⁸I kare ame Jeremia doŋ otyeko ko bo kop man ducu ame Rwot ociko ni myero ekob baŋ lwak luŋ, olamdog kede odwarpiny karacel kede lwak luŋ ote makke oko, kun okobo ni, “Yin myero ito!”

⁹Piŋo irabo kop i nyiŋ Rwot kun ikobo ni, “Ot man bino doko calo Cilo, dok boma man bino doŋ nono aboŋo jo moro abedo iye?” Jo luŋ te cokere guro Jeremia dyere i ot a Rwot.

¹⁰I kare ame rwode me Juda owinyo kop man gin oya i paco abaka ote bino i ot a Rwot ote wot bedo i wi komgi ame tye i dogcel, ame olwoŋo ni Dogcel Anyen ame tye i ot a Rwot.

¹¹Olamdog kede odwarpiny te kobbi rwode kede lwak luŋ ni, “Dano man myero ŋolle kop me to pien en orabo kop arac i kom boma man kite ame wun luŋ iwinyo wunu kede yitwu.”

¹²Jeremia te kobbi rwode kede jo luŋ, kun kobo ni, “Rwot ocwaa me bino rabbiwu kop i kom ot man kede i kom boma man, kop luŋ ame wun doŋ ityeko winyo wunu.

¹³Doŋ pi mannono wun myero iyik wunu kitewu kede gin ame itio wunu, ite winyo wunu kop a Rwot Obaŋawu, mannono bino miyo Rwot cunye ya i timo gin arac ame doŋ otyeko kobo oko i komwu.

¹⁴Aco an, nen ba, an gira atye i cinwu, Tim wunu ginnoro luŋ ame ineno wunu ni ber i koma.

¹⁵Cite gin a myero iŋe wunu ateteni ene, ni ka ineka wunu, ibino onyo wunu remo a mom i bal, ame ballere te bedo i wiwu kede i kom boma man kede i kom jo luŋ ame bedo iye, pien iyi ateni Rwot ocwaa baŋwu me kobo kop man luŋ kun iwinyo wunu kede yitwu.”

¹⁶Eka rwode kede jo luŋ te kobbi olamdog kede odwarpiny, ni, “Dano man mom porre ŋolle kop me to pien en okobo kop man baŋwu pi nyiŋ Rwot Obaŋawa.”

¹⁷Odoŋŋogo me lobo-nono te ye kop i lwak luŋ ame ocokere karacel, kun kobo ni,

¹⁸“Mika ame rik obedo dano me Morecet rik obin orabo kop i kare abaka Kejekia, ame rik obedo abaka me Juda, en rik okobo koppere baŋ jo luŋ me Juda kun kobo ni Rwot me mony okobo ni, “Obino puro Cion oko calo poto, aco Jerucalem bino doko wi obur, kidi me ot a Rwot, yen bino culle acula iye.

¹⁹Rik abaka Kejekia me Juda kede jo luŋ obin oneke oko? Mom abaka obin olworo Rwot te tiyo gin aber ame Rwot pwo, ame te miyo Rwot weko gin arac ame onwoŋo eyikere me timo i komgi oko? Cite wan oceggi kelo twon ginnoro arac meicel i komwa kenwa.”

²⁰Dok tye dano moro ocele ame daŋ obin orabo kop i nyiŋ Rwot, Uria wot a Cemaya me Kiriat-jearim, En rik orabo kop i kom boma man kede i kom lobo man, ame koppere daŋ rik rom aroma i en ame Jeremia okobo.

²¹Kare ame abaka Yekoyakim, kede ocirikale mere luŋ, kede rwode mere luŋ owinyo kop magi, abaka omito ni myero enek dano-ni oko, cite i kare ame Uria owinyo, lworo omako te lwi wot oko i Miciri.

²²Abaka Yekoyakim te cwayo jo okene mogo i Miciri, ocwao Elnatan wot a Acibor karacel kede jo mogo okene,

²³gin te wot kela Uria i Miciri, ote tere naka baŋ abaka Yekoyakim, ote daŋ neko oko kede pala me lweny, ote tero kome wot yiko i kabedo ame oyiko iye jo ata.

²⁴Cite ciŋ Akikam wot a Capan onwoŋo obedo gwoko Jeremia omio mom ote miye baŋ lwak me wot neke.