Read lango Jeremia 27 Bible Online

Jeremia 27 - lango bible

Jeremia 27

¹I mwaka ame Jedekia wot a Yocia, abaka me Juda ogeo iye loc, Rwot okobbi Jeremia kop magi.

²Rwot okobba ni, “Wi tol, ti daŋ lodi ite tweyogi i ŋuti yin keni.

³Cwa kop baŋ abaka me Edom, abaka me Moab, abaka ikwae a jo Ammon, abaka me Turo kede abaka me Cidon, kun imio okwena ame obino i Jerucalem me bino limo Jedekia abaka me Juda.

⁴Kobbigi kop man ame myero gin wot kob baŋ odoŋegi ame loogi.” Myero gin wot kob ni, Rwot me mony, ame obedo Obaŋa me Icrael okobo ni,

⁵“An en aketo lobo kede dano kede Jeyi ame tye i wi lobo pi tekona adwoŋ meicel, dok daŋ amio baŋ ŋat ame yia mito kite ame cunya okwanyo.

⁶Aman doŋ atyeko miyo lobo magi luŋ i ciŋ Nebukadnejar, abaka me Babulon, ame en obedo amirona, dok daŋ atyeko miye leyi luŋ me tim me konye.

⁷Rok luŋ bino tic baŋe kede baŋ itino mere kede baŋ ikwae, tuno ka kare me lonyo lobo mere oromo. I kare naca en ame rokkere bino doko rok ame tio baŋ rok apol apapat kede baŋ obakki mogo adoŋodoŋo, kun otio baŋgi acalo opii.

⁸“Ka ce rokkoro onyo loccoro mom bino tic baŋ abaka Nebukadnejar, ame abaka me Babulon, mom bino ye keto lodi abaka me Babulon i ŋutgi, an ikoma abino keto can i kom rokkono, kun anekogi i pala romo, i kec, kede too edeke, Man kop ame Rwot okobo, tuno wan ame amio abaka Nebukadnejar otyeko rokkono luŋ.

⁹Doŋ pi mannono ba, myero kur iwiny wunu kop odwarpinywu otyetwu, olek lek-gu, okor tipowu kede me emurokowu ame tye ka kobbiwu ni, ‘Wun gire mom ibino tic wunu baŋ abaka me Babulon.’

¹⁰Pien gin tye ka rabbiwu kop me goba, ame adwoggi mere bino miyo okwanyowu oko i lobowu ote terowu oko i lobo abor, dok an abino ryemowu oko, eka ite to wunu oko.

¹¹Ento rokkoro ame bino keto lodi me loc abaka me Babulon i ŋutgi eka te tic baŋ abaka naca, abino miyo bedo i lobogi ikokome, me opur iye, dok daŋ obedo iye. Man kop ame Rwot okobo.”

¹²Jeremia te kobo kit kop acellono baŋ abaka Jedekia ame obedo abaka me Juda, okobbe ni, “Miye wunu kenwu i te loc abaka me Babulon, ite tic wunu baŋe kede baŋ jo mere me ibed wunu kwo.

¹³Piŋo omio yin karacel kede joni ito wunu oko i pala me romo, i kec, kede too edeke kite ame Rwot okobo kede i kom rokkoro keken ame mom bino tic baŋ abaka me Babulon?

¹⁴Kur iwiny kop odwarpiny ame tye ka kobbiwu ni, ‘Wun gire mom ibino tic wunu baŋ abaka me Babulon’, pien kopgi-nono kop me goba ame gin tye ka rabo baŋwu-nono.

¹⁵An gira mom acwaogi, gin tye ka rabo gigi kop me goba i nyiŋa ame adwoggi mere bino miyo aryemowu oko, ite to wunu oko, wun karacel kede odwarpiny ame tye ka rabbiwu koppono.”

¹⁶Mannono te miyo an kop baŋ olamdog kede baŋ jo mere luŋ, kun akobbigi ni, “Rwot okobo ni kur iwiny wunu kop odwarpiny ame tye ka rabbiwu kop, kun okobo ni, ‘Nen ba, jami ame otio kede i ot a Rwot oceggi doŋ dwoggo oko i Babulon’, pien kop ame gin orabbiwu-nono obedo kop me goba.

¹⁷Kur iwiny wunu kopgi; myero iti wunu baŋ abaka me Babulon me ibed wunu kwo. Piŋo kara imio wunu boma man odoko wi obur?

¹⁸Ka ce gin obedo odwarpiny ateteni, dok ka kop a Rwot tye i cunygi, wekgi wunu okwa Rwot me mony, me wek jami me tic ame oweko i ot a Rwot, kede en ame oweko i ot abaka me Juda, kede en ame tye i Jerucalem, kur doŋ ter i Babulon.

¹⁹Pien mannono en kop ame Rwot okobo i kom pagi luŋ, nam, kede akara me cibo tara, karacel kede jami ocele me tic i ot a Rwot ame pwod odoŋ i boma man,

²⁰ame rik Nebukadnejar abaka mom otero, i kare ame en tero jo magi iyi opii kun kwanyogi i Jerucalem terogi i Babulon, Yekonia wot a Yekoyakim, abaka me Juda kede jo ame oworo luŋ me Juda kede me Jerucalem.

²¹Man en kop ame Rwot me mony okobo, ame obedo Obaŋa me Icrael i kom jami ame otio kedgi i ot a Rwot, ame pwod odoŋ i ot a Rwot, kede i ot abaka me Juda kede i Jerucalem.

²²Gin luŋ obino terogi oko i Babulon ote bedo kuno tuno waŋ ame dok apo pirgi, ate doŋ dwoggogi cen ate dwogo ketogi i kakakargi i kabedo man.”