Read lango Jeremia 28 Bible Online

Jeremia 28 - lango bible

Jeremia 28

¹I mwaka acellono, ame abaka Jedekia, abaka me Juda ogeo iye loc, i dwe me abic i mwaka me aŋwennere, Anania wot Ajur, adwarpiny ame onwoŋo oya i Gibeon, okobba kop i ot a Rwot kun olamdog kede jo luŋ tye awinyo, en okobo ni,

²“Rwot me mony, ame obedo Obaŋa me Icrael okobo ni en doŋ etyeko turo loc abaka me Babulon oko.

³I ŋe mwaka aryo, abino dwoggo jami ame otio kede i ot a Rwot i kabedo man, ame rik abaka Nebukadnejar, abaka me Babulon oyako i kabedo man te tero i Babulon.

⁴Abino daŋ dwoggo cen i kabedo man Yekonia wot a Yekoyakim, abaka me Juda karacel kede jo luŋ ame rik oterogi acalo opii kun okwanyogi i Juda ote terogi i Babulon, pien abino turo loc abaka me Babulon oko.”

⁵Adwarpiny Jeremia te kop gin kede adwarpiny Anania kun olamdog kede jo luŋ ame onwoŋo tye ocuŋ i ot a Rwot tye awinyo. Adwarpiny Jeremia okobo ni, “Amen!

⁶Rwot myero gire tim amannono; myero en mi kop ame ikobo cobere kakare, te kela jami me tic i ot a Rwot ame aman tye i Babulon kede jo luŋ ame rik oterogi acalo opii cen i kabedo man.

⁷Cite akadi amannono myero iwiny kop magi ame ana atye ka kobo baŋi i caa ni, kun lwak luŋ daŋ tye awinyo.

⁸Odwarpiny me kare acon ame otelo nyimwa wan aryo ducu rik orabo kop i kom lweny, kec, kede too edeke ame bino poto i lobo apapat kede i kom loccogo adoŋodoŋo.

⁹Aco kop i kom odwarpiny ame orabo kop i kom kuc, i kare ame kop man doŋ ocobere jo doŋ te ŋeyo ni, Rwot kara onwoŋo ocwao adwarpinnyono.”

¹⁰Adwarpiny Anania te kwanyo lodi me ŋut dokoko i ŋut Jeremia te tuturogi oko.

¹¹Anania te ko bo kop magi kun jo luŋ tye awinyo, en okobo ni, “Mannono en kite ame abino turo kede lodi me loc a a Nebukadnejar, abaka me Babulon i ŋut rok apapat kun mwaka aryo mom ru otum.” Ento Adwarpiny Jeremia te medde gire i wottere.

¹²Icennere ame adwarpiny Anania doŋ otyeko turo lodi me twoni oko i ŋut Jeremia, Rwot te kobbi Jeremia ni,

¹³“Wot ikobbi Anania ni Rwot okobo ni, Yin ityeko turo lodi ame otio i yen, cite an abino tiyo kakargi lodi me nyonyo.

¹⁴Pien Rwot me mony, ame obedo Obaŋa a jo Icrael otyeko keto lodi me nyonyo i ŋut rok magi ducu me gin ti baŋ Nebukadnejar abaka me Babulon, gin bino tic baŋe, pien atyeko miyo baŋe anaka leyi me tim.”

¹⁵Adwarpiny Jeremia te kobbi adwarpiny wadgi, Anania ni, “Winy ba, yin Anania, Rwot gire mom ocwai ento yin imio jo man obedo kede gen i kop me goba.

¹⁶Mannono omio Rwot okobo ni, ebino kwanyi oko i wi lobo. Ibino to i mwaka-ni ikokome, pien ikobo kop me jem i kom Rwot.”

¹⁷Adwarpiny Anania te to oko i mwaka-nono ikokome, i dwe me abiro.