Read lango Jeremia 29 Bible Online

Jeremia 29 - lango bible

Jeremia 29

¹Jeremia rik te coyo waraga i Jerucalem baŋ odoŋ atekere ame onwoŋo tye i akina jo ame onwoŋo tye iyi opii, kede baŋ olamdog, kede baŋ odwarpiny, kede baŋ jo luŋ ame rik Nebukadnejar oyako i Jerucalem te tero i Babulon acalo opii,

²Man otimere icen i kare ame onwoŋo doŋ abaka Yekonia kede tottere, kedejo ame oliro, rwode me Juda, kede me Jerucalem, kede jo ame odiro i tic apapat onwoŋo doŋ otyeko ya oko i Jerucalem.

³Waraga man rik ocwao kun omio baŋ Elaca wot a Capan gin kede Gemaria wot a Kilkia, ame Jedekia ame abaka me Juda ocwao i Babulon baŋ abaka Nebukadnejar abaka me Babulon. Kop ame tye i waraga-nono onwoŋo tye kit man:

⁴Rwot me mony ame obedo Obaŋa a jo Icrael ocwao waraga man baŋ jo luŋ ame tye iyi opii, ame rik acwaogi iyi opii i Babulon kun akwanyogi i Jerucalem:

⁵Ger wunu udi ite bedo wunu iye, pit wunu cam i potti me inwoŋ wunu gi-acama.

⁶Nyom wunu mon me inywal wunu itino awobe kede anyira; nyommi awobewu mon dok daŋ imi nyom anyirawu: nya imedde wunu kunu kun welwu mom dok piny.

⁷Cite myero nen ni ibedo wunu aber i boma ame aryemowu aterowu iye acalo opii. Kwa wunu Rwot pi bomanono, pien ka jo ame tye i boma-nono bedo aber bino miyo wun daŋ ibedo wunu aber.

⁸Pien Rwot me mony, ame obedo Obaŋa me Icrael okobo ni, Kur imi wunu odwarpinywu kede okor tipowu ame tye i akinawu bwolwu, dok daŋ mom ibed winyo wunu lek ame gin oleko,

⁹pien mannono luŋ goba keken en ame gin tye ka rabbiwunono, kun orabo-gu i nyiŋa. An gira onwoŋo mom acwaogi. Man kop a Rwot okobo.

¹⁰Rwot okobo ni, “Kare ame mwakki pyerabiro doŋ otum ame atyeko miyo pi Babulon, an abino limowu ate co bo gin a rik aciko baŋwu, ate dwogowu baŋa i kabedo man.

¹¹Pien an aŋeo gin ame atyeko yiko pirwu, yik me ber bedowu, pe me timowu rac, yik ame tye pi anyimwu dok ame tye iye gen.

¹²I kare-naca ite bedo lwoŋo wunu nyiŋa, kun ibino wunu baŋa me bino kwaya, an abino winyo kwacwu.

¹³Ibino yenya wunu ite nwoŋa wunu; ka ce iyenya wunu kede cunywu ducu,

¹⁴ibino nwona wunu gire, an ate dwogo kucwu ate daŋ cokowu oko i akina rok ocele luŋ kede i kabedo luŋ ame rik aryemowu aterowu iye, ate dwogowu cen i kabedo man, ame rik akwanyowu iye me cwalowu iyi opii.

¹⁵“Pien wun ikobo wunu ni, ‘Rwot omiowa odwarpiny i Babulon,’

¹⁶mannono omio Rwot okobo kop i kom abaka ame bedo i wi kom loc a Daudi kede i kom jo luŋ ame bedo i boma man, watiwu ame mom rik obin otero oko iyi opii.

¹⁷Rwot me mony okobo ni, ‘Nen ba, acwayo i komgi pala me romo, kec, kede too edeke, dok abino miyogi bedo calo nyig oduro ame otop, ame doŋ rac odoco, a mom romo camere.

¹⁸Abino ryemogi i pala lweny, i kec, kede too edeke, dok abino miyogi obedo gin ame rok ame tye i wi lobo apapat lworo, gin bino doko gin me ceno jo, gin a jo lworo, ame jo jwio ajwia kede gin ame ocao i akina rok ducu, i kabedo luŋ ame acwaogi iye,

¹⁹pien gin rik okwero winyo koppa ame abedo cwayo baŋgi tere i tere, kun amio omirona odwarpiny kobbigi, cite gin gigi ote kwero winyo oko. Man kop a Rwot okobo.’

²⁰Winy wunu kop a Rwot wun luŋ ame itye wunu acalo opii ame rik acwaowu i Babulon, kun akwanyowu i Jerucalem:

²¹Rwot me mony, ame obedo Obaŋa a jo Icrael okobo kop i kom Akab wot a Kolaya kede Jedekia wot a Maceya ame tye ka rabo kop me goba baijwu, kun orabo-gu i nyiŋa ni. Nen ba, abino miyogi i cin Nebukadnejar, ame bino nekogi kun ineno wunu kede wanwu.

²²Jo Juda luŋ ame tye acalo opii i Babulon bino tic i nyiŋgi me ceno jo kun okobo ni, ‘Rwot bino miyi ibedo calo Jedekia kede Akab ame abaka me Babulon obulogi abula i mac.

²³Man en can ame obino keto i komgi pien gin otimo tim me miŋo iyi Icrael, gin ocodo mon owotegi, dok daŋ okobo kop me goba i nyiŋa, kun an mom acikogi gira. An en aŋeo, dok daŋ an en abedo acaden ame ŋeo gin a gin otimo. Man kop a Rwot okobo.’ ”

²⁴Aco baŋ Cemaya ame obedo dano me Neklam, obino kobbe ni,

²⁵“Rwot me mony, ame obedo Obaŋa a jo Icrael. Yin ityeko cwayo waraga apol apola kede nyiŋi kun icwao baŋ jo ame tye i Jerucalem kede baŋ Jepania wot a Cemaya, ame obedo alamdog, kede baŋ olamdog ocele luŋ, kun ikobbigi ni,

²⁶Rwot otyeko keti me bedo alamdog ocele luŋ, kun ikobbigi ni, Rwot otyeko keti me bedo alamdog akaka Yekoyada alamdog, me ilo ot a Rwot, kun iloo ŋat acel acel ame wie oballe ame rabo koppi i nyiŋ Rwot, me wek imakgi itwegi kede kol, kun daŋ irwako nyonyo i ŋutgi.

²⁷Kara doŋ ŋo omoni juko Jeremia me Anatot i kare-ni ame tye ka rabbiwu kop?

²⁸Pien en ocwao kop baŋwu i Babulon kan, kun kobo ni, Ibino ri wunu kare alac iyi opii; doŋ myero iger wunu wudi me bedowu, pit wunu daŋ cam i potowu me inwon wunu gi-acama.”

²⁹Jepenia alamdog rik te kwano waraga man kun Jeremia adwarpiny winyo.

³⁰Rwot te kobbi Jeremia ni,

³¹“Cwal kop baŋ jo ame oterogi iyi opii, kobbigi ni, ‘Rwot okobo kop ikom Cemaya me Neklam, ni, pien Cemaya orabbiwu kop kun an gira mom acwae, omio ibedo wunu i gen nononono.

³²Mannono omio Rwot okobo ni, Nen ba, abino keto can i kom Cemaya me Neklam karacel kede ikwae, ŋattoro i akina jo mere mom bino doŋ akwo me neno gin aber ame abino tiyo i kom jona, pien en okobo kop ame kela jem i kom Rwot. Man kop a Rwot okobo’.”