Read lango Jeremia 3 Bible Online

Jeremia 3 - lango bible

Jeremia 3

¹Rwot okobo ni, “Ka ce lo moro oryemo cege oko, dako-nono daŋ te wot oko, en te wot gero lo ocele, cware me agege-ni pwod dok bino dok baŋe? Mom bino miyo lobo-nono balle miecel? Yin doŋ ityeko timo tim me alaya i co apol, pwod dok iromo dwogo baŋa?

²Koŋ itiŋ waŋi malo me inen wi tur kan a tye nono ca! Kara ka kwene i kuno ame mom obuto kedi? I bedo kuro jo ame bu to kedi i ŋet yo ducu, calo Arab ame k uro jo i dye tim ata, Yin doŋ ityeko balo lobo oko, kede timmi me alaya alaya.

³Mannono en omio ojuko anaka kot oko, kot me cwir daŋ doŋ mom cwe; cite yin pwod imoro waŋi amora i tim me alaya, lewic-gu mom maki.

⁴Mom aman yin ilwoŋa ni, ‘Pappa, yin ibedo awota cakere itinona,

⁵Akemo bino make nakanaka, cunye bino waŋ naka i agikki?’ Nen ba, yin ikobo, cite yin doŋ ityeko timo kit bal luŋ ame itwero.”

⁶I kare abaka Yocia, Rwot okobba ni, “Ineno gin ame Icrael ame mom gene obino timo, kite ame en obedo wot kede i kabedo luŋ obedo kidikidi, kede i te yen obuŋere luŋ, te bedo timo tim me alaya kuno?

⁷An atamo ni ka en doŋ otyeko timo magi-nono luŋ, en bino dwogo baŋa: cite en naka mom odwogo aminnere Juda ame agoba-ni te daŋ neno timmere-nono.

⁸Kadi bed Juda oneno ni Icrael ame mom genne-ca obedo timo tim me alaya i nyima, en gin omio ate ryeme oko i nyima kun daŋ amie waraga me aryemo; cite en Juda ame agoba-ni mom obedo kede lworo moro, en daŋ owoto te wot timo tim me alaya alaya.

⁹Pien tim me alaya onwoŋo obedo gin ame yot meicel baŋe, omio en daŋ obalo lobo oko, kun bedo cot i gweŋe kede yen.

¹⁰Kadi bed magi luŋ otimere cite aminnere Juda ame ago ba-ca mom omedo i dwogo cen i cunye ducu, ento odwogo i nyima kede kome keken kun cunye tye kan ocele, man kop a Rwot okobo.”

¹¹Rwot dok te kobba ni, “Icrael ame mom genne-ni ballere nok ame kato me a Juda ame agoba-ni,

¹²Wot irab kop magi tutuŋ anyarodi, kun ikobo ni, Dwog ba cen, yin Icrael ame mom igenne-ni, man kop a Rwot. Mom abino neni i wan me akemo pien en akica, man kop a Rwot. Akemo mom bino bedo maka nakanaka,

¹³Myero iye ni ibalo, myero iŋe ni ijem i kom Rwot Obaŋani i te wot miye keni baŋ obaŋe orok i te yen obuŋere ducu, dok myero iye ni mom ibedo winyo koppa, man kop a Rwot;

¹⁴Dwog wunu cen, wun itino ame mom genne, pien an en abedo adwoŋwu; abino kwanyowu, kun akwanyo dano acel i boma moro-ni, ŋat ocele i doggola moro-ni, eka ate kelowu naka i Cion.

¹⁵“ ‘Abino miyowu okwat ame yomoro cunya, ame bino pitowu i ŋec kede niaŋ.

¹⁶I kare ame doŋ inya imedde wunu i lobo, i kare-naca, Rwot okobo, gin mom dok bino kobo kop i kom canduk me cikere a Rwot. Mom dok bino ŋiŋŋo i cuny dano moro, mom daŋ obino poyo, mom daŋ ibino yiko wunu en ocele.

¹⁷I kare-naca obino lwoŋo Jerucalem ni obedo kom loc a Rwot, rok luŋ bino cokere iye kuno, i nyim Rwot i Jerucalem, mom dok obino medde bedo apala, kun olubo tam arac i cunygi.

¹⁸I kare-naca jo me ot a Juda bino ribere oko i jo me ot Icrael, eka gin luŋ karacel ote ya i lobo ame tye tutuŋ anyarodi, ote wot i lobo ame rik omio baŋ kwarigi me alea me bedo meggi.

¹⁹Abedo tamo kite ame abino ketowu kede i akina itinorra, kun miogi lobo ame yomoro cunywu, lobo me alea aber ame kato me a rok ocele luŋ. Abedo tamo ni wun ibino lwoŋa wunu ru an abedo Papawu, dok mom ibino weko wunu lubba.

²⁰Ateteni, dako a mom geno cware weko cware oko, amannono daŋ wun onwoŋo mom igena wunu, wun jo me ot Icrael, man kop a Rwot.’ ”

²¹Dwon ŋattoro ame akok tye awinyere i wi tur kannaler malo, ikwae me Icrael tye kok kun obako doggi, pien otyeko gak oko i yoogi, wigi otyeko wil oko i kom Rwot Obaŋagi.

²²“Dwog wunu doŋ baŋa, wun itino a mom tye kede gen, an abino caŋowu oko i kom genwu a mom tye-nono. “Nen ba, wan obino baŋi, pien yin ibedo Rwot Obaŋawa.

²³Ateteni, mom tye konnyoro ame romo nwoŋere i wi kidi malo, kan ame jo wo iye i wi kiddinono, Ateteni, larre a jo Icrael, tye baŋ Rwot Obaŋawa.

²⁴“Cakere i kare me tinowa gin me lewic obedo camo ginnoro luŋ ame yam kwariwa obedo yelle kedgi, dyegigi kede rommigi, awobegi kede anyiragi.

²⁵Wek doŋ obut piny i twon lewic ame otye kede-nono, me timmogo me lewic ame obedo timo owum komwa oko; pien wan otimo bal i nyim Rwot Obaŋawa karacel kede kwariwa daŋ cakere i kare me tinowa tuno kede naka tin. Wan okwero winyo dwon Rwot Obaŋawa.”