Read lango Jeremia 30 Bible Online

Jeremia 30 - lango bible

Jeremia 30

¹Man en kop ame Rwot okobo baŋ Jeremia, Rwot ame obedo Obaŋa a jo Icrael okobo ni,

²“Co kop luŋ ame abedo kobbi-ni i buk.

³Nen ba, kare tye abino, ame abino dwoggo iye gum a jona Icrael kede Juda. Abino dwoggogi cen i lobo ame rik amio baŋ kwarigi, gin te bino bedo iye acalo meggi.”

⁴Magi en kop ame Rwot okobo i kom jo Icrael kede Juda:

⁵“Rwot okobo ni, Wan otyeko winyo koko a jo ame can opoto i komgi atura, koko a jo a lworo omako, ame mom tye i kuc.

⁶Aman koŋ ipenyere keni keni, dok ite tamo daŋ, ico twero nywalo atin? Piŋo dok atye ka neno co tye amako pyergi amaka, bala dako ame tye ka rem me nywal? Piŋo wan jo oballe oko?

⁷Oi doi! Twon nino arac meicel tye abino, mom tye nino moro ame rom kede; Nino-nono en nino me can meicel baŋ ikwae a Yakobo; kadi bed amannono, obino larogi oko i can-nono gire.”

⁸Rwot me mony okobo ni, “Ka ce nino-nono oromo, abino turo lodi me loc oko i ŋutgi abino daŋ codo nyor oko ame otweogi kede.

⁹Cakere i karenono gin bino tic pi Rwot Obaŋagi kede Daudi abakagi ame dok abino miyogi.”

¹⁰Rwot okobo ni, “Yin amirona Yakobo, kur ilwori, akadi yin Icrael, cunyi kur poti. Nen ba, abino larri i kannabor meicel, ate laro ikwai i lobo ame aman gin tye iye acalo opii. Ikwae a Yakobo bino dwogo cen, ote bedo mot i kuc, mom tye ŋattoro ame bino miyogi lworo.

¹¹Pien an atye kedwu me bino larowu, abino jwero rok ocele luŋ atyekogi oko, i akina jo ame akeketowu iye, cite wun mom abino tyekowu ducu, Abino pwodowu abeber, ento mom abino wekowu ame mom aketo can i komwu. Man kop a Rwot okobo.

¹²“Rwot okobo ni, Awano ame aketo i komwu mom twero can, dok wan bur i komwu odet arac meicel.

¹³Mom tye ŋattoro ame oromo cun pirwu, dok yattoro me aketa i wan burwu daŋ mom, wan bur i komwu doŋ mom romo can.

¹⁴Jo ame marowu luŋ, wigi doŋ owil oko i komwu, mom doŋ oparo pirwu kadi acel; pien atimowu lit calo ibedo wunu okworra, aketo can agwa meicel i komwu aboŋo kica, pien balwu onwoŋo bal ame itimo wunu me akaka, dok bal ame itimo wunu daŋ dwon atek.

¹⁵Piŋo pwod ikok wunu pi awa no ame awanowu kede? Rem ame itye wunu kede mom romo cannere. Pien balwu onwoŋo bal me akaka gin arac ame itimo wunu dwoŋ meicel; mannono en omio aketo can man i komwu.

¹⁶Pi mannono, jo luŋ ame nekowu, gin daŋ obino nekogi, okworwu luŋ aluŋa obino mako oko otero acalo opii, jo luŋ ame yako jamiwu gin daŋ obino yako jamigi, kede jo luŋ ame wunowu, gin daŋ obino wunogi.

¹⁷Pien abino miyowu dok ibedo wunu jo ame komgi yot, wan bur i komwu daŋ bino can oko, pien gin olwonowu ni wun jo a doŋ obolo oko, Cion doŋ odoko gin ame ŋattoro mom paro pire.” Man kop a Rwot.

¹⁸“Rwot okobo ni, Nen ba, abino dwoko kuc i kema a jo Yakobo: kica bino maka i kan ame gin bedo iye; obino dok gero boma i kabedo mere acon, paco abaka bino dok kakare.

¹⁹Jo me kunu doŋ bino wero wer me pwoyo Obaŋa, gin bino bedo redo i wer me yomcuny, Abino miyogi onya, kun welgi mom dok piny, abino miyo jo worogi meicel.

²⁰Itinogi bino bedo apol kite ame rik otye kede con, lwak jo iye bino cun atek i nyima, abino keto can i kom jo ame wunowu.

²¹Rwode ame bino loyogi, bino ya i akinagi, alocgi bino ya i akina rokgi. Abino lwoŋe, en bino bino baŋa, pien mom tye ŋattoro ame bino yiye kene me bino baŋa. Man kop a Rwot okobo.

²²Wun ibino bedo wunu jona, an abino bedo Obaŋawu.”

²³Koŋ inen yamo kot ame Rwot omio akodo! Akemo mere calo yamo ajuru, bino mwoc i tuc iwi jo areco.

²⁴Akemo a Rwot agwa meicel mom bino kwe, tuno wan ame doŋ ocobo gin ame eyikere me tiyo, Ibino niaŋ wunu man icennere, i kare ame pwod tye anyim.