Read lango Jeremia 31 Bible Online

Jeremia 31 - lango bible

Jeremia 31

¹Rwot okobo ni, “I kare-naca abino bedo Obaŋa a jo me doggola Icrael luŋ, gin bino bedo jona.”

²Rwot okobo ni, “Jo ame obwot i lak pala lweny, kica obin opoto i komgi i tim, i kare ame jo Icrael tye ayenyo ka weo,

³An anyutte baŋgi i kannabor, abedo maro jo Icrael kare ducu i mar a mom lokere, mannono omio an amedo bedo agen i nyimi nakanaka.

⁴Dok abino pitowu odoco wun jo Icrael, ite Cuŋ wunu, dok ibino ruko wunu ruk me kwogo ite bino myel wunu i yomcuny,

⁵Dok ibino medde pito poto olokwu, i wi kiddi me Camaria, opit olokkono bino pito oko ducu, icennere gin bino camo nyige ame ocek.

⁶Pien nino tye abino anyim ame okurpiny bino lwoŋo iye, kun olwoŋo i lobo obedo kidikidi me Epraim ni, ‘Ya wunu, me owot wunu i Cion, baŋ Rwot Obaŋawa.’ ”

⁷Rwot okobo ni, “Wer wer me yomcuny i dwon aloŋo pi jo Icrael, ya ired wunu pien gin obedo rok adwoŋ meicel, i akina rok ducu. Rab wunu pi Rwot, dok ipake wunu, kun ikobo wunu ni, ‘Rwot doŋ olaro jo mere oko, jo Icrael ame odoŋŋere.’

⁸Nen ba, abino kwanyogi oko i lobo ame tye tutuŋ anyarodi, abino cokogi i kannabor meicel, ame tye iyi agikki piny. Otowaŋ kede onwalo bino bino karacel kedgi, mon ayac kede mon a doŋ gorogoro meicel, jo ame bino dwogo kan bino bedo adwoŋ meicel.

⁹Gin luŋ obino bino kun okoko, an abino telogi me dwokogi cen, kun akweo cunygi, abino miyogi obedo i ŋet kulo ame pii opoŋ iye, obino lubo yo ocuŋ atira kun mom otwomere i ginnoro; pien an abedo pappa a jo Icrael, jo Epraim en obedo itinona me kao.

¹⁰“Winy wunu koppa an a Rwot, wun rok ducu, rab wunu koppere i lobo ame tye kan aboco, rab wunu pire naka i dog nam luŋ. Ŋat ame rik okeketo jo Icrael, en a daŋ dok bino cokogi, bino gwokogi kite ame akwat gwoko kede rommi mere.

¹¹Pien Rwot doŋ otyeko lakoro jo Icrael oko iyi opii, en olarogi i cin rok onwoŋo tek meicel katogi oko.

¹²Gin bino bino ote wer i dwon aloŋo i wi kidi me Cion, cunygi bino bedo ayom micel i kom gum ame abino miyogi, i kom kai, kono olok, kede moo, i kom rommi kede dok ame onywalo, Kwogi bino bedo aber meicel calo poto ame pii romo, mom dok obino bedo i cwercuny kadi acel.

¹³Anyira bino myel yomcuny adwoŋ meicel, jo oteggo kede awobe luŋ daŋ cunygi bino bedo ayom. Abino loko kokogi doko yomcuny, abino kweyo cunygi odoco, ate miyogi yomcuny akaka cwercuny.

¹⁴Abino miyo olamdog camo cam adwoŋ meicel dok abeco, jami abe co-no luŋ ame amiogi bino tyeko mitti a jona oko. Man kop a Rwot okobo.”

¹⁵Rwot okobo ni, “Dwon tye ka winyere i Rama, koko kede twon kumo adwoŋ meicel. Lakeri tye ka koko itino mere, en okwero ni myero kur kwe cunye, pien itino mere doŋ pe.”

¹⁶Rwot okobo ni, “Wek wunu koko bedi, we pig wanwu doŋ oko. Pien ticcoro luŋ ame itio wunu obino culowu pire, gin bino dwogo cen i lobo ame okworgi oterogi iye.

¹⁷Itye wunu kede gen i kare ame tye anyim, Itinowu bino dwogo cen i lobogi ikokome. Man kop a Rwot okobo.

¹⁸Awinyo ka jo Epraim tye akoko i cwercuny, kun okobo ni, ‘Rwot doŋ opwodowa calo dyaŋ ame mom opwonyo i pur, dwogowa cen me wan odok cen kakarwa, pien yin ibedo Rwot Obaŋawa.

¹⁹Pien i kare ame otyeko ya oko i baŋi, oŋut, i kare ame opwonyowa, ocako bedo i cuny me dwogo cen. Lewic omakowa meicel, dok alee otwodowa, pi bal ame wan otimo i kare ame pwod wan otino.’

²⁰“Epraim obedo atinna ame amaro? En obedo atin ame amaro kato itino ducu? Pien kare ducu ka atye ka kobo kop i kome, pwod amedde po pire meicel. Mannono omio cunya tye ka myel meicel pire, abino gire time kica ateteni. Man kop ame Rwot okobo.

²¹“Ket wunu ginnoro ame nyuttiwu yo, gur wunu alama mogo i yo me cimo yo, tam wunu atek meicel pi yo gudo, ame obedo yo ame rik iwoto wunu kede. Dwog wunu cen ba, wun jo Icrael, dwog wunu cen i bomawu ame yam iweweko wunu-ni.

²²Ibino bedo wunu kala akala pi kare arom mene wun jo ame mom genne-ni? Pien Rwot doŋ otyeko keto ginnoro anyen i lobo, dako en ame gwoko ico.”

²³Rwot me mony, ame obedo Obaŋa a jo Icrael okobo ni, “Jo man dok bino kobo kop magi i lobo Juda kede i boma luŋ me Juda, i kare ame adwoggogi cen i kucgi. ‘Rwot myero mi gum i kom kidi acil me Jerucalem, kabedo acil ame en bedo iye.’

²⁴Jo ame bedo i Juda kede i boma luŋ ame tye iye, okwat kede opur, kede okwa rommi ame bedo kuno, gin luŋ obino bedo karacel.

²⁵Abino miyo jo ame ool limo teko, dok abino miyo jo ame kec ociro atek meicel camo cam ote yeŋ.”

²⁶Mannono bino miyo jo kobo ni onino aber meicel dok i kare ame ocoo onwoŋo komgi yot atek.

²⁷Rwot okobo ni, “Kare tye abino ame abino miyo dano kede lee bedo adwoŋ meicel i lobo a jo Icrael kede i lobo a jo Juda.

²⁸Kare tye abino ame abino gwokogi i kare me pitogi kede miyogi doŋo malo kite ame rik agwokogi kede i kare me mukogi, me putogi, me turogi, me tyekogi kede i kare me keto can i komgi.

²⁹I kare-naca gin mom dok obino medde kobo ni, ‘Kwariwa rik ocamo nyig olok awac, ame te dilo lak itino oko.’

³⁰Ento dano acel acel bino to pi ballere en ikome. Amannono daŋ ŋat ame bino camo olok awac lake bino dil oko.

³¹ “Rwot okobo ni, Kare bino romo, ame abino moko cikerena anyen kede doggola Icrael kede doggola a Juda.

³²Mom dok abedo bala cikere a rik aketo i kom kwarigi ca, i nino ame rik amakogi i ciŋgi, ate kwanyogi oko i lobo me Miciri, cikerena ame gin obin oturo oko kadi bed an rik onwoŋo atye acalo cwargi. Man kop ame Rwot okobo.

³³Doŋ man en cikere ame abino moko kede doggola Icrael ka kare naca okato. Abino keto cik i cunygi, ate coyo i yigi. An abino bedo Obaŋagi, gin ote bedo jona.

³⁴Ŋattoro a pwonyo wadgi doŋ bino bedo mom, akadi ŋat ame kobbi ominnere ni, ‘Ŋe Rwot,’ pien gin luŋ obino ŋeya, geye i kom jo atino ame tye i akinagi, ituno i kom jo adoŋo. Pien abino timogi kica i kom timgi areco, mom dok abino poyo balgi.”

³⁵Rwot okobo ni, “Ŋa ame omio cen me menyo dyeceŋ, ŋa ame omoko kite ame dwel kede acer menyo kede piny dyewor? Ŋa ame mio pii tugere i nam te cako mor? Ŋat otimo amannono luŋ nyiŋe obedo Rwot me mony.”

³⁶Rwot okobo ni, “An doŋ atyeko moko kite ame piny myero bed kede kare luŋ, ka ce gin ame amoko-nono twero lokere, ikwae Icrael daŋ bino lokere, mom dok ote bedo rok ame an ayero acalo mera atwal.”

³⁷Rwot okobo ni, “Ka ce otwero pimo polo ame tye malo, dok ka ce otwero roto kite ame acakki me polo tye kede piny, mannono bino miyo an daŋ akwero jo Icrael, pi ginnoro luŋ ame gin otyeko timo.”

³⁸Rwot okobo ni, “Nen ba, kare tye abino ame boma man dok obino gero odoco pi Rwot, kun ocako gero i kan ocuŋ iguŋ malo ame olwoŋo ni Kananel naka i dogcel ame olwoŋo ni Dogcel me Gul.

³⁹Obino pimo i tol naka i tur ame tye kannabor ame olwoŋo ni Gareb te gono dok piny i Goa.

⁴⁰Luŋ luŋ ame rik oonyo iye kom jo oto kede buru, tuno kede naka i luŋ me Kidron, tuno kede i dogcel ame tye i kona ame olwoŋo ni Dogcel me Aguragura kato kede naka tuŋ kide, mannono luŋ bino bedo kabedo acil pi Rwot. Mom dok obino puto kadi acel akadi turo.”