Read lango Jeremia 32 Bible Online

Jeremia 32 - lango bible

Jeremia 32

¹I mwaka me apar me loc a Jedekia abaka me Juda, ame mannono rik onwoŋo obedo mwaka me apar wie aboro me loc a Nebukadnejar abaka me Babulon, kop a Rwot rik obino baŋ Jeremia,

²I kare-naca onwoŋo mony abaka me Babulon tye ka guro Jerucalem, adwarpiny Jeremia rik ote cego oko i dyekal okur piny ame tye i paco abaka me Juda.

³Jedekia abaka me Juda onwoŋo rik otwee oko i buc, kun kobo ni, “Piŋo yin itye ka rabo kop kun ikobo ni Rwot okobo ni, Nen ba, an am iyo boma man oko i cin abaka me Babulon, en bino mayo oko,

⁴Jedekia abaka me Juda mom bino bwot iciŋ jo Kaldaya, obino miye oko ateteni i cin abaka me Babulon, ame en bino kop kede wan i wan, kun ŋat acel acel neno ton wan awottere.

⁵En bino tero Jedekia i Babulon, en bino bedo kuno tuno wan ame abino lime, kadi bed ilweny wunu i jo Kaldaya rom mene, mom gire ibino loyogi wunu.”

⁶Jeremia okobo ni, “Kop a Rwot obino baŋa, kun kobo ni,

⁷Nen ba, Kanamel wot a Calum ame obedo neroni bino bino baŋi te kobbi ni, ‘Wil potona ame tye i Anatot, pien yin i watta ame itye kede twer me wilo.’

⁸Oyotoyot Kanamel ame obedo atin nerona te bino oko baŋa, kite ame Rwot onwoŋo okoba kede, te kobba ni, ‘Wil potona ame tye i. Anatot i lobo a jo Benjamin, pien yin itye kede twer me wilo. Wil lobo-naca me bedo megi ame yin ilo’. An ate niaŋ ni kop ame onwoŋo awinyo kara onwoŋo obedo kop a Rwot ateteni.

⁹“An ate wilo poto i baŋ Kanamel, ame obedo atin nerona, poto ame onwoŋo tye i Anatot. Kare ame opimo lim me wilo poto-naca, onwoŋo ni wellere romo cekel me ryal apar wie abiro,

¹⁰Ate keto ciŋa i waraga me cikere, ote mwono doge oko, ote nwoŋo ocaden ame gin te pi mo lim i mijan,

¹¹An ate tero waraga me cikere me wilwa-nono ame tito kit kare ame bino ri kede i ciŋa kede cik ame myero lub, kede kopi mere ame rom aroma kede ame mom omwono doge,

¹²ate wot miyo waragawa me cikere-nono baŋ Baruk wot a Neria ame obedo wot a Maceya, kun Kanamel atin nerona daŋ tye, kun ocaden ame oketo ciŋgi i waraga me cikere daŋ tye, karacel kede Ojudaya mogo ame rik tye obedo i dyekal okur-piny.

¹³An ate ciko Baruk i nyimgi kuno, kun akobo ni,

¹⁴‘Rwot me mony, ame obedo Obaŋa a jo Icrael, okobo ni, Kwan waraga me cikere magi, en ame omwono doge kede en ame mom omwono doge, ite ke to iyi abino ame ocweo i lobo me wek gin ri kare alac,

¹⁵Pien Rwot me mony, ame obedo Obaŋa me Icrael okobo ni, Udi kede potti kede olok-gu dok obino medo wilo i lobo man.’

¹⁶“Kare ame doŋ atyeko miyo waraga me cikere magi baŋ Baruk wot a Neria, akwao Rwot, kun akobo ni,

¹⁷‘Ama Rwot Obaŋa we! Yin giri en ame itio polo kede lobo kun itio kede tekoni adwoŋ. Mom tye ginnoro atek baŋi gire,

¹⁸yin ame inyuto mar a mom lokere baŋ jo tutumia i tutumia, dok yin daŋ iculo kwor pi bal onywal i kom ikwaegi ame bino i ŋegi. Ama Rwot Obaŋa ame tye kede twon twer kede teko adwoŋ meicel, ame nyiŋi obedo Rwot me mony,

¹⁹yin ame ibedo kede yik me awura, dok itio gigi mo go adonodono me awura. Yin ame waŋi yabere kare ducu i kom gin ame dano tio kun iculo dano acel acel ame lubo kite ame en tyekede, kede pi ticame en otio.

²⁰Yin ame inyuto anyut kede gigi mogo me awura i lobo Miciri, tuno kede i kareni iyi Icrael kede i akina lwak luŋ, ame omio aman i kare-ni doŋ onei i kabedo ducu.

²¹Yin rik ikwanyo joni Icrael i lobo me Miciri i twoni anyuttogo adoŋodoŋo kede tano mogo me awura, i twon ciŋi atek meicel, ame kelo twon lworo adwoŋ twatwal;

²²yin rik ite miyogi lobo man, ame rik onwoŋo ikwonere pire baŋ kwarigi, lobo ame cak kede moo kic dwoŋ iye meicel.

²³Gin rik te donyo i lobo man gamo bedo meggi. Gite gin rik mom ote winyo koppi akadi lubo cikki. Gin mom otimo ginnoro kadi acel i kom ginnoro luŋ ame rik icikogi iye. Mannono omio yin imio gin aracci luŋ opoto i komgi.

²⁴Nen ba, mony tye abino me bino mako boma man oko pi peko me pala lweny, kec, kede too edeke omio boma man otye doŋ ka miyo oko iciŋ jo Kaldaya ame doŋ tye ka lweny kede. Gin ame rik yin ikobo doŋ obino me cobere, doŋ nen ba, yin itye giri ka neno.

²⁵Kadi amannono, Ama Rwot Obaŋa, yin onwoŋo ikobba ni, “Wil po to kede lim, dok myero ibed ocaden i kare me wilo.” Kun kono yin itye ka miyo boma man oko i cin jo Kaldaya.’ ”

²⁶Kop a Rwot obino baŋ Jeremia, kun kobbe ni,

²⁷“Nen ba, an a Rwot Obaŋa a jo ducu, tye ginnoro ame tek baŋa?

²⁸Pi mannono ba, Rwot okobo ni, Nen ba, an atye amiyo boma man oko i ciŋ jo me Kaldaya, i cin abaka Nebukadnejar, abaka me Babulon. En bino mayo boma man oko.

²⁹Jo Kaldaya ame tye ka lweny i kom boma man bino bino ote bino cwinyo mac i kom boma man, ote wano oko, kun owaŋo udi luŋ ame yam otye ka yalo iye Baal odok akur i wigi malo, karacel kede mot amata ame otye ka yalli obaŋe mogo ocele, me miyo akemo mako Rwot.

³⁰Pien mom tye ginnoro ame jo Icrael kede jo Juda otimo aber kono ka timo bal keken cakere con i kare me tinogi; ikwae Icrael mom otimo ginnoro aber kadi acel, kono ka roka ame akemo maka i tic ame gin obedo tiyo.

³¹Boma man ocoo akemona kede iniga luŋ ame onwoŋo atye kede, cakere i kare me gero tuno kede naka tin, mannono omio amoko ni myero doŋ akwanyo oko i nyima,

³²pien pi tim areco luŋ ame ikwae Icrael kede ikwae a Juda obedo timo me roka wek akemo maka. Gin ame obakkigi kede rwodegi obedo timo, gin ame olamdog kede odwarpiny obedo timo kede gin ame jo ame bedo i Jerucalem obedo timo.

³³Gin doŋ olokka negi, kun owito nyimgi tene; kadi bed abe do pwonyogi tere i tere, gin gigi mom owinyo gin ame apwonyogi kede.

³⁴Gin obedo timo tim me kwer i ot ame olwoŋo kede nyiŋa, me obal gigi oko.

³⁵Ogero kabedo mogo i wi kiddi malo me woro Baal i luŋ a wot a Kinnon me miyo itinogi awo be kede anyira baŋ jok ame olwoŋo ni Molek, kadi bed rik an mom acikogi me timo amannono, kun daŋ mom otamo pire kadi acel, ni gin bino timo tim man me kwer, me miyo Juda po to i bal.

³⁶“Aman doŋ ba, man en kop ame Rwot Obaŋa okobo i kom boma man ame wun ikobo wunu ni, ‘Otyeko miyo oko i cin abaka me Babulon pi pala lweny, kec, kede too edeke’.

³⁷Nen ba, an abino coko jo man ducu i lobo apapat ame abino ryemogi cwayogi iye, iyi akemo kede twon iniga adwoŋ meicel ame onwoŋo omaka i komgi, abino dwoggogi i kabedo man ate miyogi bedo i kuc iye.

³⁸Gin bino bedo jona, an abino bedo Obaŋagi.

³⁹Abino miyogi obedo i cuny acel, kun kitegi acel me olwora kare ducu, mannono abino timo pirgi kede pi ber bedo ikwaegi ame bino lubogi.

⁴⁰Abino ci kere kedgi cikere ame perakino nakanaka, mom dok abino loko tamma me timo gin aber i komgi; abino miyogi obedo kede cuny me lwora me kur dok oya oko i baŋa.

⁴¹Cunya bino bedo yom me timo gin aber pirgi dok abino miyogi oguro lwitgi i lobo man i twon gen adwoŋ, kun atimo i cunya ducu kede tipona ducu.

⁴²“Pien Rwot okobo ni, Kite acalo akelo kede twon gin arac i kom jo man, abino daŋ kelo gin aber ame atyeko ciko pire i komgi kittono.

⁴³Dok obino wilo potti i lobo man ame wun ikobo wunu ni doŋ odoko wi obur, kan ame dano kede leyi mom doŋ bedo iye; otyeko doŋ miyo oko i ciŋ jo Kaldaya.

⁴⁴Potti dok obino wilo kede lim, jo bino daŋ coyo waraga me cikere ate keto cin iye, ote mwono daŋ doge oko kun ocaden tye, i lobo a jo Benjamin kede i kabedo luŋ ame oguro Jerucalem, karacel kede i boma luŋ me Juda, kede i boma luŋ ame tye i Negeb. Abino dwoggogi kucgi, man kop a Rwot okobo.”