Read lango Jeremia 33 Bible Online

Jeremia 33 - lango bible

Jeremia 33

¹Rwot dok te kobbi Jeremia tyen me aryo mere i kare ame onwoŋo en pwod tye i buc i ot ame tye i dyekal okur-piny, kun kobbe ni,

²“Rwot ame oketo lobo, Rwot ame ocweo te miyo moko atek, nyiŋe olwoŋo ni Rwot.

³En okobo ni, Lwona, an abino gamo dogi, dok abino titti twoni gigi mogo me i muŋ ame yam mom iŋeo.

⁴Pien Rwot ame obedo Obaŋa a jo Icrael okobo kop i kom udi ame tye i boma man, kede udi obakki me Juda ame yam orereto oko piny. Mom tye konnyoro ame olweny i lobo ame omony me Kaldaya oto.

⁵Jo Kaldaya tye abino me bino lweny i kom boma man me wek omi kom jo oto radde arada iye, jo ame akemona kede inigana bino miyo anekogi. Pien atyeko doŋ kano waŋa oko i kom boma man kun mom dok amito ni anen pi timmogo areco ame jo iye bedo timo.

⁶Nen ba, abino miyogi ocan ote bedo i yotkom, abino caŋogi ate nyuttigi twon lonyo kede kuc adwoŋ.

⁷Abino dwogo kuc me Juda kede me Icrael, dok abino gerogi adwokogi kit ame rik otye kede con.

⁸Abino lwokogi oko i kom bal luŋ ame yam gin otimo i koma, te timogi kica i balgi luŋ kede timgi me bedo jem i koma.

⁹Abino nwoŋo nyiŋ me yomcuny i boma man, dok daŋ rok luŋ ame tye i wi podo bino paka kun oketo kwogo i koma, ka gin owinyo pi gin aber luŋ ame atimo i kom jo me boma man, Gin luŋ obino bedo kede lworo kun komgi myel pi gin aber kede pi lonyo ame amio iye.

¹⁰“Rwot okobo ni, I kom kabedo man ame wun ikobo wunu ni odoko wi obur ame dano kede lee mom bedo iye, kede i boma luŋ ame bedo i Juda kede i yo atitino luŋ ame tye i Jerucalem ame jo mom doŋ bea iye, dok ame mom doŋ tye jo moro, akadi leyi moro ame doŋ bedo iye,

¹¹dwon me yomcuny bino winyere iye, karacel kede dwon atera kede me anyom, dwon jo ame tye ka wer kun okelo motgi me pwoc i ot a Rwot, ame ower ni, ‘Pwo wunu Rwot me mony, pien Rwot ber, marrere a mom lokere perakino wan i wan!’ Pien abino dwoggo kuc me lobo man kite ame rik tye kede con, Man kop a Rwot okobo.

¹²“Rwot me mony okobo ni, I kabedo man ame doŋ odoko wi obur ame jo kede leyi doŋ mom iye, karacel kede boma luŋ ame tye iye, okwat ame tye akwayo rommigi bino dok bedo iye.

¹³I boma luŋ ame tye i lobo obedo kidikidi, i boma luŋ ame tye i Cepela, i boma luŋ ame tye i Negeb, i boma luŋ ame tye i lobo a jo Benjamin, i kabedo luŋ ame oguro Jerucalem, karacel kede i boma luŋ ame tye i Juda, rommi kede dyegi pwod dok bino bea iye i nyim dano ame tye akwanogi, man kop a Rwot okobo.

¹⁴“Nen ba, kare tye abino, ame abino cobo iye ginnoro luŋ ame rik aciko baŋ jo me ot Icrael kede me ot a Juda.

¹⁵I kare-nono, kede i nino-nono ikokome abino keto dok akwar Daudi ikokome i kom me loc. En bino ŋolo kop kakare kun tio gin a tye atira me miyo kuc bedo tye i lobo.

¹⁶Ka karenono oromo jo Juda kede Jerucalem bino larre te bedo mot i kuc. Nyiŋ ame obino lwone kede ene: ‘Rwot ame olarowa.’

¹⁷“Rwot okobo ni, Akwar Daudi mom bino rwenyo i wi kom loc me ot a Daudi,

¹⁸dok daŋ olamdog ame obedo jo Levi mom bino bedo aboŋo dano moro i nyima me miyo mot awaŋa kede wano mot me moko kwon kede me ŋolo leyi me yala kare i kare.”

¹⁹Rwot okobbi Jeremia ni,

²⁰“Rwot okobo ni ka ce itwero turo cikerena ame ocikere kede wan kede dyeceŋ kede en ame ocikere i dyewor, ame twero miyo dyeceŋ kede dyewor mom twero bino i kare ame doŋ otyeko moko oko pirgi,

²¹itwero daŋ turo cikerena wan i Daudi ame obedo amirona, ame te miyo en bedo aboŋo akware moro i wi kom me loccere, kede cikerena wan olamdog kede jo Levi me tiyo ticca.

²²Kite ame mony me polo mom romo kwanne kede, dok kwoyo ame tye i dog nam mom daŋ oromo pimo, mannono en kite ame abino miyo kede ikwae a Daudi ame obedo amirona nya kede, karacel kede olamdog ame obedo jo Levi ame gin jo atio ticca.”

²³Rwot okobbi Jeremia ni,

²⁴“Yin ce pe inian gin ame jo man tye ka kobo ni, ‘Rwot otyeko kwero Icrael kede Juda oko ame gin atekere ame yam en oyero?’ Mannono omio gin otye ka cayo jona acaa bala mom obedo rok.

²⁵Doŋ Rwot okobo ni, Ka ce mom aketo cikerena kede ceŋ kede dwe, dok daŋ ka mom aketo cikkoro ame tye ka loyo polo kede lobo,

²⁶mannono bino miyo akwero ikwae a Yakobo karacel kede Daudi amirona, dok daŋ mom abino yero akware moro me loyo ikwae Iburaim, Icaka, kede Yakobo, Pien abino dwoggo kucgi dok daŋ kica bino maka i komgi.”