Read lango Jeremia 34 Bible Online

Jeremia 34 - lango bible

Jeremia 34

¹Man en kop ame obino baŋ Jeremia i kare ame Nebukadnejar, abaka me Babulon kede dul monnyere, karacel kede dul mony me rok apapat ducu ame tye ite loccere onwoŋo tye ka lweny i Jerucalem kede i boma luŋ ame onwoŋo ceggi kede.

²Kop ame Rwot okobo ene: “Rwot. Obaŋa me Icrael okobo ni, ‘Wot ikobbi Jedekia ame obedo abaka me Juda ni, Rwot okobo ni, Nen ba, an amio boma man i cin abaka me Babulon, en bino waŋo oko kede mac.

³Yin mom ibino bwot i ciŋe, cite obino maki ote miyi i ciŋe, ibino neno abaka me Babulon wan i waŋ, dok ibino kop wunu kede waŋ i waŋ; yin ite wot i Babulon.’

⁴Kadi amannono myero iwiny kop a Rwot, yin abaka Jedekia, me Juda! Man en kop ame Rwot okobo i komi. ‘Yin mom obino neki i pala lweny.

⁵Ibino to giri i kuc, Kite acalo rik owaŋo gin a ŋwece kur pi kwariwu ame gin ogeo bedo obakki i nyimi, yin daŋ obino wano gin a ŋwece kur piri, jo te kumo piri kun okobo ni, “Abaka doŋ oto oko doi!” ’ Pien an Rwot akobo kop man.”

⁶Adwarpiny Jeremia te kobo kop magi luŋ baŋ Jedekia abaka me Juda, kun kobbe i Jerucalem,

⁷i kare ame dul mony abaka me Babulon tye ka lweny i kom Jerucalem kede i kom boma luŋ me Juda ame onwoŋo odoŋ, Lakic kede Ajeka; pien magi en ame onwoŋo obedo boma me Juda ame onwoŋo ocelo kede cel atek, ame onwotjo odoŋ.

⁸Kop a Rwot ame ekobo baŋ Jeremia i kare ame abaka Jedekia doŋ onwoŋo otyeko cikere oko i jo luŋ ame tye i Jerucalem, ni gin myero gony opii oko kun orabo pire kannabor,

⁹ni mannono ŋat acel acel myero gony Eburania wadgi oko ame onwoŋo tye baŋe acalo opii, ico onyo dako, me kur ŋattoro dok mi dano me Eburania wadgi bed opii mere.

¹⁰Jo luŋ te winyo kop ame abaka orabo-nono, rwode karacel kede lwak ame omoko cikere-nono te ye gonyo opiigi oko, ame co onyo mon, me gin kur medde bedo opiigi; gin owinyo cikkono ote gonyogi oko,

¹¹Cite icennere gin dok te wot omo co kede mon ame onwoŋo gin ogonyo oko, ote dwoko dok ite locgi acalo opiigi.

¹²Rwot te kobbi Jeremia ni,

¹³“Rwot Obaŋa me Icrael okobo ni, Rik aketo cikerena kede kwariwu, ate kwanyogi oko i lobo me Miciri, i ot me opii, kun akobbigi ni,

¹⁴‘Iyi agikki me mwaka abicel abicel, ŋat acel acel myero gony dano me Eburania wadgi oko ame onwoŋo yam ocato baŋe te bedo tic baŋe pi mwakki abicel; akobo ni myero igony wunu kodi dano-nono i tic ame yam en tio baŋwu’, cite kwariwu te kwero winyo oko, kun mom daŋ ociko yitgi me winyo koppa.

¹⁵I kare aceggini, wun iŋut wunu ite timo wunu gin atye atira i nyima pi rabo pi gonyo opii, ŋat acel acel baŋ wadgi, wun dok ite medo wunu cikere i nyima i ot ame olwoŋo i nyiŋa.

¹⁶Cite dok ite lokere wunu balo nyiŋa i kare ame wun dok iomo wunu co kede mon ame yam obedo opiiwu ame onwoŋo doŋ ityeko gonyo wunu oko, kun ilubo wunu mitgi, ite dwoggogi wunu dok i te locwu me bedo opiiwu.

¹⁷Pi mannono ba, mom iwinyo wunu kadi acel pi rabo pi gonyo omegowu kun ŋat acel acel gonyo ominnere kede awottere; pi mannono ba, an en a doŋ abino gonyowu oko me ito i pala lweny, too edeke, kede kec. Abino miyo ibedo wunu gin ame mio jo me loc apapat me lobo bedo kede lworo.

¹⁸Dok jo ame oturo cikerena, ame okwero lubo ginnoro luŋ ame onwoŋo tye i cikere-naca, abino miyo oŋologi calo atin twon me cikere ame gin oŋolo i dul aryo.

¹⁹Rwode me Juda, rwode me Jerucalem, jo ame oliro, olamdog kede jo luŋ me lobo-nono ame bedo i akina dul kom atin twon ame opoko aryo,

²⁰abino miyogi i cin okworgi kede i ciŋ jo ame mito nekogi, Winy atwarre malo kede leyi en ame bino camo komgi ka oto.

²¹Jedekia abaka me Juda kede rwode mere obino miyo luŋ i cin okworgi kede i ciŋ jo ame mito nekogi, i ciŋ mony abaka me Babulon, ame yam kon onwoŋo oweko lweny kedwu oko.

²²Nen ba, abino miyogi odwogo cen i kom boma man, ote lweny i kome ote mayo oko, ote waŋo daŋ oko i mac. Abino miyo boma luŋ ame tye i Juda doŋ nono aboŋo ŋattoro ame bedo iye.”