Read lango Jeremia 35 Bible Online

Jeremia 35 - lango bible

Jeremia 35

¹I kare ame Yekoyakim wot a Yocia obedo abaka me Juda, Rwot okobbi Jeremia ni,

²“Wot i ot a Rekab iwot ikob kedgi i te kelogi i ot a Rwot, kelgi iyi icika moro acel ame tye i ot a Rwot, ite miyogi kono olok me omati.”

³Mannono omio ate wot kwanyo Jajania wot a Jeremia moro ocele ame obedo wot Abajinia, kede omego mere kede awobe mere luŋ karacel kede jo me ot a Rekab luŋ.

⁴Akelogi luŋ iyi icika ame tye i ot a Rwot, icika itino a Kanan wot a Igdalia ame en obedo dano Obaŋa ame icika mere onwoŋo ceggi i me a rwode ame tye i ŋet icika a Maceya wot a Calum, ame obedo agwok doggola me ot a Rwot.

⁵Ate cibo ikopo kede abino ame kono olok opoŋ yie i nyimgi, ate kobbigi ni, “Mat wunu.”

⁶Cite gin bino gamo ni, “Wan giwa mom obino mato kono olok, pien Jonadab wot a Rekab ame obedo kwariwa ocikowa ni, ‘Mom ibino mato wunu kono olok, akadi wun ikomwu onyo ikwaewu wan iwaŋ.

⁷Mom ibino gero wunu wudi; mom ibino coyo wunu koti; mom ibino pito wunu ginnoro akadi ibedo i poto olok. Ento ibino bedo wunu i kema i kare luŋ me kwowu, me iperakino wunu kare alac i lobo ame wun itye wunu iye acalo wele.’

⁸Wan owinyo kop a Jonadab ame obedo wot a Rekab ame obedo kwarowu i ginnoro luŋ ame en ocikowa iye, ni kur omat koŋo pi kare me kwowa luŋ, wan ikomwa monwa, awobewa, naka anyirawa,

⁹kun mom ogero udi me bedowa. Wan giwa mom otye kede poto olok akadi potti me ginnoro ocele;

¹⁰ento wan giwa obedo i kema kun otio ginnoro luŋ ame kwarowa Jonadab ocikowa iye.

¹¹Cite i kare ame Nebukadnejar, abaka me Babulon obino me lweny i kom Jerucalem, wan okobo ni, ‘Bin, owot i Jerucalem pi lworo mony a jo Kaldaya kede me Curia.’ Mannono en omio i kare-ni wan otye obedo i Jerucalem.”

¹²Rwot dok te kobbi Jeremia ni,

¹³“Rwot me mony, ame obedo Obaŋa a jo Icrael okobo ni, ‘Wot ikobbi jo me Juda kede jo ame bedo i Jerucalem ni, Mom ce itwero winyo wunu pwony ame apwonyowu kede, kede kop ame akobbiwu?

¹⁴Cik ame Jonadab wot a Rekab ociko kede awobe mere, me mom mato kono olok, rik gin obin ogwoko, Gin naka mom omato kono olok tuno naka tin pien gin owinyo cik a kwarogi. An abedo kop kedwu tere tere cite wun mom iwinyo wunu koppa.

¹⁵Omirona luŋ ame obedo odwarpiny, gin luŋ an acwaogi baŋwu kun acwaogi tere tere, kun akobbigi ni, “Aman myero doŋ ilokere wunu, ŋat acel acel wek yo mere me timo gin arac, kun iyiko wunu tic ame itio wunu, dok daŋ mom ibino lubo wunu obaŋe mogo ocele me tic pirgi, ite bedo wunu i lobo ame amiowu kede baŋ kwariwu.”

¹⁶Cite wun mom iye ci ko wunu yitwu akadi winya wunu. Awobe a Jonadab wot a Rekab gire ogwoko cik ame papagi ocikogi kede cite rok man okwero winye oko.

¹⁷Pi mannono ba, Rwot ame obedo Obaŋa me mony, Obaŋa a jo Icrael okobo ni, Nen ba, an akelo gin arac ame doŋ atyeko rabo pire i kom jo Juda kede i kom jo luŋ ame bedo i Jerucalem, pien an akobo kedgi, ento gin okwero winyo oko, an alwoŋogi, okwero-gu gamo doga oko.’ ”

¹⁸Jeremia te kobo ni, “Cite jo me ot a Rekab, Rwot me mony ame obedo Obaŋa a jo Icrael okobo ni, Pien gin owinyo cik a papagi Jonadab, ote lubo ginnoro luŋ ame en ociko baŋgi,

¹⁹pi mannono ba, Rwot me mony ame obedo Obaŋa a jo Icrael okobo ni Jonadab wot a Rekab bino bedo kede akware moro ame cuŋ nyim Rwot kare luŋ.”