Read lango Jeremia 36 Bible Online

Jeremia 36 - lango bible

Jeremia 36

¹I mwaka me aŋwen me loc a Yekoyakim wot a Yocia, abaka me Juda, Rwot okobbi Jeremia ni,

²“Kwany buk adola, ite coyo kop luŋ ame atyeko kobo i kom Icrael, i kom Juda kede i kom rok apapat luŋ cakere i kare ame akobo kedi, i kare a Yocia tuno kede naka tin.

³Gwok on yo jo me ot a Juda twero winyo gin arac ame ayikere me timo i komgi, ame twero miyo ŋat acel acel weko yo mere arac ame etye ka lubo, me atot ya atimgi kica i kom balgi kede i kom gin arac ame yam obedo timo.”

⁴Jeremia te lwoŋo Baruk wot a Neria, Baruk te coc i buke adola, kun coo kop luŋ ame Jeremia tye akwano, ame rik Rwot onwoŋo okobo baŋ Jeremia.

⁵Jeremia te ci ko Baruk ni, “An doŋ otyeko geŋa oko me mom donyo i ot a Rwot,

⁶pi mannono yin myero iwot iye, eka i nino me kanyo kec, ibino kwano kop a Rwot ame ityeko coyo i buk adola-ni i kare ame akwano baŋi, ibino kwano i nyim jo kuno i ot a Rwot kun jo winyo, Ibino kwano daŋ ame jo Juda luŋ tye awinyo, jo ame obino i boma apapat.

⁷Gwok on yo kwacgi twero tuno i nyim Rwot, dok onyo ŋat acel acel bino weko yo arac ame etye ka lubo, pien akemo doŋ ociro Rwot oko, kede wancuny, ame Rwot doŋ otyeko rabo pire i kom jo mere.”

⁸Baruk wot a Neria te timo ginnoro luŋ ame adwarpiny Jeremia ocike me timo i kom kop me kwano kop a Rwot ame tye i buk adola i ot a Rwot.

⁹I mwaka me abic, i dwe me aboŋwen me loc abaka Yekoyakim wot a Yocia, abaka me Juda, jo luŋ me Jerucalem kede jo ame obino i boma apapat me Juda, ame obino i Jerucalem, gin luŋ ote rabo pi kanyo kec i nyim Rwot.

¹⁰I kare-nono Baruk te cako kwano kop a Jeremia i buk adola, kun lwak luŋ winyo i ot a Rwot, iyi icika a Gemaria wot a Capan ame obedo Aran, Icika mere onwoŋo tye ceggi i dyekal ame onwoŋo tye tutuŋ malo i ŋet dogcel ame onwoŋo odonyo kede i ot a Rwot ame olwoŋo ni Dogcel Anyen.

¹¹I kare ame Mikaya wot a Gemaria, wot a Capan owinyo kop a Rwot ame tye i buk adola,

¹²en te ru ya oko i paco a abaka, te wot donyo iyi icika aran abaka, en onwoŋo rwode luŋ tye ocokere kuno: Elicama aran, Delaya wot a Cemaya, Elnatan wot Akbor, Gemaria wot a Capan, Jedekia wot Anania, kede rwode ocele mege ducu.

¹³Mikaya te tittigi kop luŋ ame owinyo Baruk okwano i buk adola kun lwak ducu winyo.

¹⁴Rwode te oro Jekudi wot a Netania, wot a Celemia, wot a Kuci, me wot kobbi Baruk ni, “Kwany buk adola ame ikwano baŋ lwak ca, ibin kede kan.” Mannono te miyo Baruk wot a Neria kwanyo buk adola bino kede baŋgi.

¹⁵Gin te kobbe ni, “Bed piny me ikwan kop iye.” Mannono te miyo Baruk kwannigi kop ame tye i buk adola-nono.

¹⁶Kare ame gin owinyo kop ame okwano luŋ, ŋat acel acel olokere oneno awottere kun lworo ociro oko, gin doŋ te kobbi Baruk ni, “Wan myero omi abaka ŋe kop magi luŋ,”

¹⁷Gin te penyo Baruk ni, “Tittiwa kite ame ico kede kop magi luŋ. Jeremia en ame obedo kwanni kop mogiluŋ kunyinicoo?”

¹⁸Baruk tegamo ni, “En obedo kobo kop magi baŋa, kun an acoo kede alam yino i buk adola.”

¹⁹Rwode te kobbi Baruk ni, “Wot ipon wunu oko, yin karacel kede Jeremia, myero ŋattoro kur ŋe kan ame wunu itye wunu iye.”

²⁰Rwode doŋ te wot i paco abaka, ote keto buk adola-naca iyi icika Elicama ame obedo aran; gin te tito kop luŋ baŋ abaka.

²¹Abaka te ru cwayo Jekudi me wot kelo buk adolanono, Jekudi te kwanyo bukkono iyi ici ka Elicama, ame obedo aran, eka en Jekudi te kwano baŋ abaka, kede rwode luŋ ame onwoŋo ocuŋ i ŋet abaka kuno.

²²Man onwoŋo doŋ dwe me aboŋwen ame obedo kare me cwir, abaka onwoŋo tye obedo i ode ame ebedo iye i kare me cwir, kun tye aoyo mac.

²³I kare ame Jekudi kwano buk adola, en okwano te tuno i dul me adek onyo aŋwen, abaka te gamo bukkono ŋoŋolo oko i pala te bolo oko i mac. En oweko bukkono owan i mac i tuno ka otum.

²⁴Akadi en onyo dano moro i akina omiro mere ame owinyo kop magi kun okwano, mom obedo kede lworo moro kadi acel, mom daŋ oyeco boŋŋigi me nyu to cwercunygi.

²⁵Kadi bed Elnatan kede Delaya kede Gemaria otemo cuko cuny abaka ni kur waŋ buk adola, cite en gire mom oye winyo kopgi.

²⁶Abaka te ciko Jeramel ame obedo wode en abaka kede Ceraya wot a Ajiriel kede Celemia wot Abdel me mako Baruk ame onwoŋo obedo aran kede Jeremia adwarpiny, cite Rwot okanogi gire oko.

²⁷I kare ame abaka otyeko wano buk adola ame onwoŋo Baruk rik ocoo kun Jeremia kobbe gin ame ocoo, Rwot dok te kobbi Jeremia ni,

²⁸“Kwany dok buk adola ocele ico iye kop luŋ ame rik icoo i buk adola me agege-ca, ame abaka Yekoyakim, abaka me Juda otyeko wano oko.

²⁹Aco kop i kom Yekoyakim abaka me Juda, yin ibino kobo ni, ‘Rwot okobo ni piŋo kara iwano buk adola man, kun ikobo ni, “Piŋo ocoo iye ni abaka me Babulon bino bino gire ateteni te balo lobo man oko, te neko jo kede leyi luŋ ame tye iye?”

³⁰Mannono omio Rwot okobo kop i kom Yekoyakim abaka me Juda kit man, ni mannono akware moro mom dok bino bedo i wi korri me loc a Daudi, kome obino bolo ata, cen te bedo wano dyeceŋ, kede nico me pee dyewor.

³¹Abino keto can i kome kede i kom ikwae, kede i kom omiro mere pi balgi. Ginnoro luŋ arac ame atyeko kobo i komgi, abino miyo poto i komgi, kede i kom jo ame bedo i Jerucalem kede i kom jo luŋ me Juda, ame gin mom otye ka winyo nono.’ ”

³²Jeremia te dok kwanyo buk adola ocele, te miyo baŋ Baruk ni myero co, Baruk wot a Neria, ame daŋ te coyo kun Jeremia tye akobe kop luŋ ame onwoŋo rik tye i buk adola ame Yekoyakim abaka me Juda rik obin owaŋo i mac-ca, Jeremia omemedo daŋ koppogo ocele iye ame rom aroma i maca me agege-ca.