Read lango Jeremia 37 Bible Online

Jeremia 37 - lango bible

Jeremia 37

¹Jedekia wot a Yocia, ame Nebukadnejar, oketo me bedo abaka me Juda, oloo loc akaka Konia wot a Yekoyakim,

²cite akadi en abaka onyo omiro mere, naka jo ame bedo i lobo mere mom oye winyo kop a Rwot ame rik en okobo baŋ adwarpiny Jeremia.

³Abaka Jedekia rik te cwayo Yekokal wot a Calemia, kede Jepania alamdog, wot a Maceya, ocwaogi baŋ Jeremia adwarpiny, kun kobbigi ni, “Kwa Rwot Obaŋawa pirwa.”

⁴I kare-nono onwoŋo Jeremia pwod wowota i akina jo, pien onwoŋo mom ru okete i buc.

⁵I kare-nono daŋ mony a Parao onwoŋo obino kun oya i Miciri; i kare ame mony a jo Kaldaya ame onwoŋo tye ka guro Jerucalem owinyo kop i komgi, gin te ya oko i Jerucalem.

⁶Rwot te kobbi Jeremia adwarpiny ni,

⁷“Rwot Obaŋa me Icrael okobo ni yin ibino kobo baŋ abaka me Juda ame ocwai ni yin ibin ipeny kop i baŋa ni, ‘Nen ba, mony a Parao ame obino me konyi ceggi dokoko cen i Miciri, i lobo mere.

⁸Jo Kaldaya bino dwogo cen, te bino lweny i kom boma man, gin obino mako oko ote waŋo oko i mac.

⁹Rwot okobo ni, Kur ibed bwolle wunu kenwu, kun ikobo wunu ni, “Jo Kaldaya gire bino bedo kannabor kedwa,” pien gin gire mom obino bedo kannabor.

¹⁰Pien akadi bed ilo wunu, mony a jo Kaldaya luŋ ame obino me lweny kedwu, eka te doŋ jo ame owanne keken, kun ŋat acel acel tye i kema mere, gin jo-nono bino ya eka te bino wano boma man oko.’ ”

¹¹I kare ame mony a jo Kaldaya oya oko i Jerucalem, i kare ame mony a Parao obino,

¹²Jeremia oya i Jerucalem te wot i lobo a jo Benjamin me wot gamo dul lobo ame opokke i akina jo turegi.

¹³Kare ame en onwoŋo tye i dogcel ame olwoŋo ni Dogcel a Benjamin, adwoŋ ame loo ocirikale onwoŋo tye kuno, ame nyiŋe Irija, wot a Celemia, wot a Anania, en te mako adwarpiny Jeremia, kun kobo ni, “Yin itye ka lwi wot baŋ jo me Kaldaya.”

¹⁴Jeremia te gamo ni, “Mannono kop me goba, an gira mom alwi awot baŋ jo me Kaldaya.” Cite Irija mom oye winyo koppere-nono, omake te tere baŋ rwode.

¹⁵Akemo te maka rwode atek meicel i kom Jeremia, ote goye, ote kete i buc i ot a Jonatan, ame obedo aran, pien onwoŋo oloko ottono odoko ot kol.

¹⁶I kare ame otero Jeremia i ot ame tye i bur piny, oweke kuno pi kare alac,

¹⁷abaka Jedekia te cwayo jo me bino ome, ote tere i nyime. Abaka te bedo penye en kene i muŋ i ode, en te kobo ni, “Tye kopporo ame Rwot okobbi?” Jeremia te gamo ni, “Kop tye.” Jeremia te kobbe ni, “Yin obino miyi oko i ciŋ abaka me Babulon.”

¹⁸Jeremia dok te medo kobbi abaka Jedekia ni, “Gin aŋo arac ame an atimo baŋi, onyo baŋ omironi, onyo baŋ jo man, ame omio yin iketa i ot kol?

¹⁹Odwarpinyi tye kwene: ame orabbi kop kun okobo ni, ‘Abaka me Babulon gire mom bino lweny i komi kede i kom lobo man?’

²⁰Aman doŋ ba adwoŋ abaka, akwai me winyo koppa. Tim ber iwiny kwacca ame amio baŋi i mwolo, me kur dok idwoka cen i ot a Jonatan ame obedo aran, naka mio abino to oko kuno.”

²¹Mannono te miyo abaka Jedekia miyo cik, ote keto Jeremia bedo i dyekal okur-piny, kun omio ogati nino acel acel; ogati ame ogamo i baŋ oted ogati i yo ame gin bedo iye tuno wan ame ogati doŋ mom tye i boma, Mannono te miyo Jeremia medde bedo kuno i dyekal okur-piny.