Read lango Jeremia 38 Bible Online

Jeremia 38 - lango bible

Jeremia 38

¹I kare-nono Cepatia wot a Mattan, Gedalia wot a Pacur, Jucal wot a Celemia, kede Pacur wot a Malcia, onwoŋo owinyo kop ame Jeremia obedo kobo baŋ lwak luŋ, kun kobo ni,

²“Rwot okobo ni ŋat ame bedo i boma man bino to i pala lweny, kec, kede too edeke. Cite ŋat ame bino wot Kaldaya bino bedo kwo, en bino bedo i kwo mere acalo mot ame omie pi lweny, en te medde bedo kwo.

³Boma man gire obino miyo ateteni i ciŋ mony abaka me Babulon, eka te gamo oko.”

⁴Rwode te kobo baŋ abaka ni, “Dano man myero nek oko, pien tye ka miyo ocirikale ame odoŋ i boma man tye adoko agoro karacel kede jo ocele luŋ, pi kobo kodi koppono baŋgi. Pien dano-ni mom tye atic pi ber bedo a jo man, ento pi timogi rac.”

⁵Abaka Jedekia te kobo ni, “Nen ba, en tye gire i ciŋi, pien abaka gire mom romo timowu i ginnoro.”

⁶Mannono te miyo gin kwanyo Jeremia oko ote wot bolo i bur pii me Malkia, ame obedo wot abaka ame onwoŋo rik tye i dyekal okur-piny kuno. Otweo Jeremia i tol ote cwayo piny i pii. Gum aber pii onwoŋo pe i burrono, kono ka coto keken, eka Jeremia te moko oko i coto.

⁷I kare ame Ebed-melek dano me Eciopia ame obedo dano ame oroo ame rik bedo i ot abaka owinyo ni obolo Jeremia piny i bur pii, I kare-nono onwoŋo abaka tye obedo i dogcel ame olwoŋo ni Dogcel a Benjamin,

⁸Ebedmelek oya i ot abaka te wot baŋ abaka, te wot kobbe, ni,

⁹“Adwoŋŋa abaka we, jo man otimo bal i kom ginnoro luŋ ame gin otimo i kom Jeremia adwarpiny, pi wot bole iyi bur pii piny; kec bino neke oko kuno, pien ogati moro mom doŋ tye i boma.”

¹⁰Abaka te ciko Ebed-melek, ame obedo dano me Eciopia, ni, “Kwany jo adek i kan iwot kedgi me iwot iwa Jeremia oko i bur pii piny, kun en mom ru oto.”

¹¹Mannono te miyo Ebed-melek wot karacel i jonnono i ot abaka, ote wot donyo i ot ame okano iye jami, ote wot kwanyo keto boŋŋi mogo ame onwoŋo tye kuno, ote wot cwayo i tol piny i bur baŋ Jeremia,

¹²Ebed-melek, dano me Eciopia te kobbi Jeremia ni, “Ket boŋŋi-nu i te bwoki ite keto tol i wigi.” Jeremia daŋ te timo amannono.

¹³Gin te wayo Jeremia oko i bur, ote kele kannaler. Jeremia doŋ te medde bedo i dyekal okur-piny.

¹⁴Abaka Jedekia te cwayo dano lwoŋo Jeremia adwarpiny Jeremia te wot baŋe i dogcel me adek me donyo i ot a Rwot. Abaka te kobbi Jeremia ni, “Amito penyi, tim ber kur imunna kopporo kadi acel.”

¹⁵Jeremia te kobo baŋ Jedekia ni, “Ka ce akobbi, mom ibino moko tammi me neka oko? Dok ka ce ami tam, ibino ye winyo koppa?”

¹⁶Abaka Jedekia te kwoŋo i muŋ baŋ Jeremia ni, “Kite acalo Rwot tye kwo-ni, Rwot ame tipo a jo tye i ciŋe, mom abino neki kadi acel, akadi miyi i cin jo man ame neki-ni.”

¹⁷Jeremia te kobbi Jedekia ni, “Rwot me mony ame obedo Obaŋa a jo Icrael okobo ni, ka ce ibino miye keni i cin rwode abaka me Babulon, kwoni mom bino rwenyo, dok boma man daŋ mom obino wano kede mac, dok yin kede jo me odi luŋ ibino bedo wunu kwo.

¹⁸Ento ka mom ibino miye keni i cin rwode abaka me Babulon, boma man obino miyo oko i ciŋ jo Kaldaya, gin bino waŋo oko kede mac, dok yin mom ibino bwot i ciŋgi.”

¹⁹Abaka Jedekia te kobo baŋ Jeremia ni, “Atye kede lworo pi Ojudaya mogo ame otyeko lwi wot baŋ jo Kaldaya, naka mio obino miya baŋgi, naka mio gin te bedo toja.”

²⁰Jeremia te kobo ni, “Mom gire abino miyi baŋgi. Aman myero yin iwiny kop a Rwot ame akobbi, bino miyo bedo aber, kwoni mom bino rwenyo.

²¹Cite ka ikwero miye keni, man en anyut ame Rwot otyeko nyutta:

²²Nen ba, mon luŋ ame aman tye i ot abaka me Juda, onwoŋo otye ka tero oko baŋ rwode abaka me Babulon, kun okobbigi ni, ‘Owotewu ame igeno wunu ni, doŋ obwolowu oko, dok daŋ oloowu oko; aman ame tyeni doŋ omoko oko i coto-ni, gin oya oweki oko.’

²³Monni karacel kede awobeni obino tero oko baŋ jo Kaldaya, yin ikomi daŋ mom ibino bwot icingi, ento me Babulon bino maki oko; boma man obino wano oko i mac.”

²⁴Jedekia te kobbi Jeremia ni, “Kur imi ŋattoro ŋe kop man, dok yin gire mom ibino to,

²⁵Ka ce rwode owinyo ni an akobo kedi, eka gin te bino baŋi me penyi ni, ‘Kobbiwa kop ame ikobo baŋ abaka, kur imuŋŋiwa ginnoro pien wan gire mom obino neki’,

²⁶yin ibino kobbigi ni, ‘Amio kwacca baŋ abaka kede mwolo, ni myero kur cwaa dok cen i ot a Jonatan me wot to kuno.’ ”

²⁷Rwode luŋ rik te bino baŋ Jeremia, ote penye, en te dok i kopgi kite ame abaka onwoŋo ocike kede, Mannono te miyo gin weko kop kede oko, pien ŋattoro onwoŋo mom owinyo kopginono,

²⁸Jeremia te medde bedo i dyekal okur-piny tuno i kare ame omao Jerucalem.