Read lango Jeremia 4 Bible Online

Jeremia 4 - lango bible

Jeremia 4

¹“Ka ce ilokere, idwogo wunu baŋa, wun jo Icrael Rwot okobo, myero idwog wunu baŋa. Ka ce ikwanyo wunu gin me kwer ame itimo wunu oko i nyima, eka mom ite bedo wiwira wunu awira,

²dok daŋ ka ikwoŋo wunu ni, ‘Kite ame Rwot tye kede kwo-ni,’ myero ikwoŋ wunu kun ilubo wunu ŋolo kop atira, kede cuny atira bino miyo rok luŋ nwoŋo gum baŋe, dok daŋ obino nwoŋo kwogo pire.”

³Rwot okobo baŋ jo me Juda kede jo ame bedo i Jerucalem ni, “Pur wunu pottiwu a yam mom ipuro wunu, kur dok ipit camwu i akina okuto,

⁴Myero ilire wunu kenwu baŋ Rwot, lirre wunu i cunywu, wun jo me Juda kede jo me Jerucalem, naka mio akemo maka, te waŋ calo man, pi gin arac ame itimo wunu, mac me akemona-nono te wan ame ŋattoro mom romo neko.”

⁵Rab wunu kop i Juda, rab wunu i Jerucalem, kun ikobo wunu ni, “Kut wunu apel rom lobo luŋ, red wunu i dwon aloŋo kun ikobo wunu ni, ‘Cokere wunu me owot wunu, i boma mogo ame ocecelo atek wok-ca!’

⁶Lub wunu yo ame woto i Cion. Lar wunu komwu, kur igal wunu, pien amito kela gin arac i tutuŋ anyarodi, kede twon can adwoŋ meicel ame bino tyeko piny oko.

⁷Eŋatu doŋ odonyo oko i ka pono mere, anek rok luŋ doŋ okato oko kannaler; oya doŋ oko i kabedo mere; me miyo lobowu doko wi obur, bomawu luŋ doŋ bino balle oko, kun jo moro mom tye ame bedo iye.

⁸Pi mannono ba, twe wunu boŋo kwero cola i pyerwu, kum wunu kun ikok wunu; pien akemo a Rwot agwa meicel, mom oya i komwa kadi acel.”

⁹“Rwot okobo ni, i nino-nono tekcuny bino rwenyo oko i baŋ obakki kede rwodegi; olamdog bino baŋere oko, kun odwarpiny tye ka wuro meicel.”

¹⁰An ate kobo ni, “Ama Rwot Obaŋa, koŋ inen, yin gire doŋ ibwolo lwak man ateteni, karacel kede jo me Jerucalem, kun ikobbigi ni, ‘Ibino bedo wunu aber i kuc’; aco kun pala romo doŋ otuno oko i kwogi ikokome.”

¹¹I kare-naca obino te kobbi lwak man karacel kede Jerucalem ni, “Yamo alyet tye oya i tim i tur malo kan ame yattoro mom iye kun kodo dok tutuŋ baŋ lwak a Rwot, mom me pyetogi calo kal, onyo me yeko gin arac oko i komgi;

¹²Yamo ame abino-nono ger okato kare. Mannono an Rwot ikokoma en a doŋ a tye aŋolo kop i kom jonanono.”

¹³Nen ba, tye ka bino calo pol, gadigadi lwennyere luŋ calo yamo ajuru; aguragura mere dwir kato cur oko. Can i wiwa doi, pien oto otum wunu doŋ oko!

¹⁴Wun jo me Jerucalem, myero ilwok wunu cunywu oko i timo tim areco, me wek ilarre wunu, Tamwu areco-nogo bino medde bedo i cunywu naka awene ba?

¹⁵Pien dwon dano moro tye a rabo kop i lobo me Dan, kun tye ka tuco gin arac ame otye ka timo i wi kiddi me Epraim.

¹⁶Kwenyoro rok luŋ ni en tye ka bino, kobbi jo Jerucalem dan ni, “Okwor tye ka bino i lobo abor meicel; gin tye ka woo kun oredo atek i kom boma me Juda.

¹⁷Oguro doŋ Juda oko calo jo ame tye ka kuro poto, pien Juda onwoŋo ojem oko kome.” Man kop a Rwot ikokome.

¹⁸Kitewu kede gin ame itimo wunu luŋ, en ame okelo can man i komwu Mannono en can ame oketo i komwu, cannere kec atek; otuno naka iyi itaowu ikokome.

¹⁹Rem doŋ ocira oko! Rem ocira oko! A waŋo koma calo mac! Oii doi Kannoro luŋ oguro itaona arem okato kare! Itaona agoye bala amito cot oko; mom aromo liŋ mot kadi acel; pien atye ka winyo koko apel, kede duru me lweny.

²⁰Can tye ka lubere agwa agwa tere i tere, lobo luŋ aluŋa doŋ odoko wi obur, Kemana luŋ doŋ obalo oko oyot meicel, aco icika ote muko i dakika moro keken,

²¹Abino bedo neno lweny pi kare a rom mene, kun atye ka winyo koko apel?

²²“Pien jona miŋ, mom onea kadi acel; gin otino ame wigi mom tio, mom otye kede ŋeccoro kadi acel.”

²³Kare ame atiŋo waŋa aneno lobo, aneno ni oballe, odoko wi obur aboŋo ginnoro iye; dok acer kede dwe ame tye malo i polo,

²⁴Dok ate tino waŋa neno kiddi, aneno gin luŋ otye ka yeŋere ayeŋa, kun kan obedo kidikidi luŋ tye awirre tuŋŋi i tuŋŋi.

²⁵Dok ate tino waŋa lworo piny, mom ate neno ŋattoro kadi acel, winy luŋ ame twarre malo onwoŋo oriŋo oko tene.

²⁶Ate dok ŋiyo lobo, nen, kan onwoŋo ceko cem meicel, onwoŋo doŋ odoko bar otal ikaŋ, kun boma iye luŋ doŋ obabalo oko, i nyim Rwot ame akemo onwoŋo omako.

²⁷Pien Rwot okobo ni, “Lobo luŋ bino doŋ nono, cite mom abino miyo gik oko.

²⁸Lobo bino kumo pi kop man, polo daŋ bino cido acol icuc; pien an doŋ atyeko kobo gin ame ayikere me timo, Mom aloko tamma, mom daŋ abino dok cen.”

²⁹Jo i boma luŋ bino riŋo oko, ka owinyo woo a wegi aguragura kede wegi atero, obino donyo i buŋ acol meicel, mogo bino yito i wi kidi malo, jo luŋ bino weko boma doŋ nono, aboŋo ŋattoro ame bedo iyigi.

³⁰Yin boma ame doŋ idoko wi oburri, pi ŋo kara itye ka ruko boŋo arema? Piŋo itye ka ruko ruk me kwogo ame otio i jabu, kun ijujuko waŋi kede raŋi ame nen amwonya? Itye ka yelle nono me yiko komi, cogi ame mari tye ka cayi acaa; otye ka yenyo yo me neki aneka.

³¹Atyeko winyo koko ame calo me a dako ame arem me nywal, kun tye i rem calo dako ame anywallo atinnere me kao. Cion tye ka koko kun mito weo, kun ryeo ciŋe malo, kobo ni, “Ato doi! Nen atye ka wille i nyim onek jo.”