Read lango Jeremia 40 Bible Online

Jeremia 40 - lango bible

Jeremia 40

¹I kare ame Nebujaradan, adwoŋ ame loo ogwok abaka otyeko gonyo Jeremia oko; i Rama, Rwot dokokobo kede Jeremia, Rik onwoŋo otwee oko kede jegere i kare ame omito tere i Babulon, karacel kede jo ocele mege ame oterogi acalo opii kun okwanyogi i Jerucalem kede Juda.

²Adwoŋ ame loo ogwok abaka otero Jeremia te wot kobbe ni, Rwot Obaŋani en ame orabo kop arac i kom kabedo man;

³Rwot en omio doŋ otimere, en otimo kite ame onwoŋo ekobo. Pien wun onwoŋo ibala wunu baŋ Rwot, dok daŋ ikwero winyo wunu koppere, en omio gin man otimere i komwu.

⁴Aman doŋ ba, tin an doŋ agonyo jegere oko i ciŋi. Ka ce ineno ni ber yin iwot keda i Babulon, bin owoti, an abino gwoki aber, cite ka ineno ni mom ber yin iwot, kur ibin. Nen, lobo man luŋ tye i nyimi, wot kan ame cunyi okwanyo ni ber baŋi.

⁵Ka ce doŋ, yin myero idok baŋ Gedalia wot Akikam, wot a Capan, ame abaka me Babulon otyeko miyo me bedo aloc adwoŋ ame loo boma ducu a tye i Juda, iwot ibed wunu kede i akina lwak; onyo itwero wot giri kan ame ineno ni ber baŋi. Mannono te miyo adwoŋ ame loo ogwok abaka miye ginnoro me wilo cam acalo mot, te weke wot.

⁶Jeremia te wot baŋ Gedalia wot Akikam i Mijipa, te wot bedo karacel kede i akina lwak ame onwoŋo odoŋ i lobo-naca.

⁷Kare ame odoŋe ame loo mony ame pwod tye i kabedo apapat i lobo Juda karacel kede lwakgi, owinyo ni abaka me Babulon otyeko keto Gedalia wot Akikam me bedo aloc adwoŋ ame loo lobogi, dokokete me loyo jo ducu ame odoŋ, co kede mon kede itino, ame gin luŋ onwoŋo obedo jo ame ocan meicel ame mom otero iyi opii i Babulon,

⁸gin owoto baŋ Gedalia i Mijipa, jo ame owoto ene: Icmael wot a Netania, Yokanan wot a Karea, Ceraya wot a Tanumet, ame gin luŋ obedo ikwae Epai, dano me Netopa, Jejania dano me Maaka, gin luŋ owoto karacel kede jogi.

⁹Gedalia wot Akikam, wot a Capan, te kwoŋ baŋgi karacel kede baŋ jogi, kun kobi ni, “Kur ibed wunu i lworo moro me tic baŋ jo Kaldaya, Bed wunu i lobowu, cite myero iti wunu pi abaka me Babulon, ibino bedo wunu gire aber aboŋo peko moro.

¹⁰Aco an, abino bedo i Mijipa, me acuŋ pirwu i nyim jo Kaldaya ame bino bino baŋwa. Aco wun, myero icok wunu koŋo olok, nyig yen kede moo, ite kano wunu i jami ame itye wunu kede, ite medde bedo giwu i bomawu, ame imao wunu.”

¹¹Kite acellono, kare ame ame Ojudaya ame onwoŋo bedo i Moab kede i akina jo Ammon kede iyi Edom karacel kede i lobo ecele, owinyo ni abaka me Babulon oweko jo mogo odoŋ i Juda dok daŋ otyeko keto Gedalia wot Akikam, wot a Capan, acalo aloc adwoŋ me loyogi,

¹²mannono omio Ojudaya luŋ odwogo oko i lobo apapat ame rik oryemogi oterogi iye, ote bino i Juda baŋ Gedalia i Mijipa. Gin te coko kono olok kede nyig yen adwoŋ meicel.

¹³I ŋe mannono Yokanan wot a Karea kede otel wi mony ame tye i kabedo apapat i lobo-naca, obino baŋ Gedalia i Mijipa,

¹⁴ote kobbe ni, “Yin itye ko ŋeyo ni Baalic, abaka a jo Ammon otyeko cwayo Icmael wot a Netania me bino neki oko?” Cite Gedalia wot Akikam mom te ye kopginono.

¹⁵Yokanan wot a Karea okobo i muŋ gin i Gedalia i Mijipa, ni, “Owoti, owot onek Icmael wot a Netania oko, ŋattoro gire mom bino ŋeyo. Piŋo en mito neki, ame te miyo Ojudaya ame tye oguri tuŋŋi i tuŋŋi te ket oko, mannono te miyo Ojudaya ame odoŋ to oko?”

¹⁶Ento Gedalia wot Akikam te kobbi Yokanan wot a Karea ni, “Mom myero itim tim man i kom Icmael, pien aniaŋ ni yin itye ikobo kop me goba i kome.”