Read lango Jeremia 41 Bible Online

Jeremia 41 - lango bible

Jeremia 41

¹I dwe me abiro, Icmael wot a Netania ame obedo wot a Elicama, ame en obedo dano acel me doggola aloc, ame en ŋat acel i akina otic abaka adoŋo mege, obino i jo apar baŋ Gedalia wot Akikam i Mijipa, I kare ame gin otyeko cam karacel kuno i Mijipa,

²Icimael wot a Netania karacel kede jo apar-ca, oya ote goyo Gedalia wot Akikam oko, ame obedo wot a Capan, kun ogoo kede pala me romo, ote daŋ neko oko, ame en dano ame onwoŋo abaka me Babulon oketo me bedo aloc ame loo lobo me Juda.

³Icimael te neko daŋ Ojudaya ame nwoŋo tye karacel i Gedalia i Mijipa kede ocirikale me Kaldaya ame onwoŋo tye kuno.

⁴Orwo mere, ame kop me to a Gedalia mom ru oŋeye,

⁵jo aboro te tuno kun oya i Cekem kede i Ci lo kede i Camaria, obino ame olyelo tikgi oko, dok daŋ oyeyeco boŋŋi i komgi oko, kun daŋ onoŋolo komgi. Obino kun okelo mot me moko kwon kede gin a ŋwece kur me amia i ot a Rwot.

⁶Jcimael wot a Netania te bino i Mijipa me bino rwatte kedgi, kun bino ame akoko. Kare ame orwatte kedgi, okobbigi ni, “Bye wunu baŋ Gedalia wot Akikam.”

⁷Kare ame gin odonyo i boma, Icimael wot a Netania karacel kede jo ame onwoŋo tye baŋe te nekogi oko, te bolo komgi i bur pii.

⁸Cite jo apar i akinagi okobbi Icmael ni, “Kur inekwa, pien wan otye kede udi kano jami ame otyeko kano iye ŋano, kai, moo jeituni, moo kic.” Mannono omio Icimael mom te nekogi karacel kede owotegi.

⁹Bur pii ame onwoŋo Icimael obolo iye kom jo ame eneko-ni, onwoŋo dwon dok lac meicel. Mannono obedo bur pii ame abaka Aca okunyo me gwoko kwo a dano, i kare ame Baaca, abaka me Icrael mito lweny i komgi. Icimael oonyo kom jo oto open burrono apoŋa.

¹⁰Icimael te mako jo ame odoŋ luŋ i Mijipa, te terogi, miyogi doko acalo opii mere, omako anyira abaka, kede jo luŋ ame onwoŋo rik odoŋ i Mijipa ame Nebujaradan adwoŋ ame gwoko abaka rik omio iciŋ Gedalia wot Akikam, Icimael te cako wot kedgi me wot ŋolo kulo me kato loka baŋ jo Ammon.

¹¹I kare ame Yokanan wot a Karea karacel kede odoŋe ame onwoŋo telo wi mony ame onwoŋo tye baŋe owinyo pi tim arac ame Icimael wot a Netania otimo,

¹²en okwanyo jo mere te wot lweny i kom Icimael wot a Netania. Gin owot omake i atapara adwoŋ ame onwoŋo tye i Gibeon.

¹³Kare ame jo onwoŋo tye baŋ Icimael, oneno Yokanan wot a Karea, kun odoŋe ame telo mony daŋ tye baŋe, cunygi obedo ayom meicel.

¹⁴Mannono te miyo jo ame onwoŋo Icimael tye ka tero ocala opii, ame okwanyogi i Mijipa te cako lokere oko me dok cen, ote wot baŋ Yokanan wot a Karea.

¹⁵Cite Icimael wot a Netania te lwi oko ibaŋ Yokanan karacel kede jo aboro ote wot naka i lobo a jo Ammon.

¹⁶Yokanan wot a Karea karacel kede odoŋe ame onwoŋo telo mony ame onwoŋo tye baŋe ote tero jo luŋ ame onwoŋo rik Icimael wot a Netania otero acalo opii kun kwanyogi i Mijipa i kare ame en otyeko neko Gedalia wot Akikam, otero ocirikale, mon, itino, jo ame oroo; mannono gin jo ame Yokanan odwoggo cen kun omaogi i Gibeon.

¹⁷Gin te wot bedo i Gerut-kiman ame tye i ŋet Beterekem, kun otye kede tam me wot i Miciri,

¹⁸pien onwoŋo otye ka lworo jo me Kaldaya, kite ame Icimael onwoŋo otyeko neko kede Gedalia wot Akikam, ame onwoŋo abaka me Babulon otyeko keto me bedo aloc adwoŋ ame loo lobo Juda.