Read lango Jeremia 42 Bible Online

Jeremia 42 - lango bible

Jeremia 42

¹Odoŋe ame telo mony, kede Yokanan wot a Karea kede Ajaria wot a Kocaya, karacel kede jo luŋ ame kitegi papat, cakere i kom jo atino kede jo adoŋo ducu te bino ceggi,

²ote kobbi Jeremia adwarpiny ni, “Tim ber iwiny kwacwa ame obako kede dogwa i nyimi-ni! Cwal kwacwa baŋ Rwot Obaŋani pi jo man luŋ ame odoŋŋi, pien wan jo odoŋ welwa doŋ nok meicel, kite ame itye giri ka neno kede waŋi.

³Rwot Obaŋani myero nyuttiwa yo a myero olubi, kede gin ame myero oti,”

⁴Jeremia adwarpiny te kobbigi ni, “Atyeko winyo kokowu; nen ba, abino kwayo Rwot Obaŋawu kite ame ikwao wunu kede, kite ame Rwot bino dokkiwu kede iye, abino titiwu. Mom abino muŋŋiwu ginnoro kadi acel.”

⁵Gin te kobbi Jeremia ni, “Rwot myero bed caden me ateteni dok ame genne i akinawa, ka ce mom otimo ginnoro luŋ, kun olubo kop ame Rwot Obaŋani ocwai me kobbiwa.

⁶Kadi bed gin aber onyo gin arac, wan giwa obino lubo kop a Rwot Obaŋawa ame wan otye ka cwayi baŋe-ni, me wek wan obed aber ka ce olubo kop a Rwot Obaŋawa.”

⁷Kare ame doŋ okato nino apar, Rwot te kop i Jeremia.

⁸Jeremia te lwoŋo Yokanan wot a Karea kede odoŋe luŋ ame loo mony ame onwoŋo tye baŋ Yokanan, karacel kede jo ocele luŋ, cakere i kom jo atino tuno kede i kom jo adoŋo,

⁹te kobbigi ni, “Rwot Obaŋa me Icrael ame icwa wunu baŋe me cwalo kwacwu i nyime, okobo ni,

¹⁰‘Ka ce ibino medde wunu bedo i lobo man, abino gerowu icun wunu atek, ento mom abino rettowu piny; pien atyeko ŋut i kom gin areco luŋ ame atimo i komwu.

¹¹Kur ilwor wunu abaka me Babulon, ame aman itye ka lworo wunu-ni; kur ilwore wunu, pien an atye kedwu me larowu i ciŋe.

¹²Abino timowu kica me en daŋ bed i kica i komwu te miyowu bedo i lobowu i kokomwu.’

¹³Cite ka ikobo wunu ni, ‘Wan giwa mom obino bedo i lobo man’, kun ikwero wunu winyo kop a Rwot Obaŋawu,

¹⁴dok daŋ ikobo wunu ni, ‘Wan giwa obino wot i Miciri kan ame mom obino neno iye lweny, akadi winyo koko apel, kun kec daŋ mom nekowu iye,

¹⁵wan giwa obino wot bedo kuno’, winy wunu doŋ kop ame Rwot okobo, wun jo Juda ame idoŋ wunu-ni, Rwot me mony ame obedo Obaŋa me Icrael okobo ni, Ka ce icako wunu wot me wot i Miciri, ite wot wunu bedo kuno,

¹⁶pala romo ame ilworo wunu-ni bino nekowu i Miciri kuno, karacel kede kec ame itye ka lworo wunu-ni, bino lubo yorwu atek meicel i Miciri kuno, ite to wunu oko kuno.

¹⁷Jo luŋ ame bino wot i Miciri te wot bedo kuno, bino to i pala lweny, kec, too edeke. Can ame akelo i komginono mom bino miyo dano moro doŋ i akinagi kadi acel, moro mom gire bino bwot.

¹⁸“Pien Rwot me mony ame obedo Obaŋa a jo Icrael okobo ni, Kite ame akemo kede iniga rik acoro i kom jo ame bedo i Jerucalem, abino coro daŋ kittono i komwu ka ce iwoto wunu i Miciri. Ibino doko wunu gin me ceno jo, gin ame mio jo lworo, kede jo ame jo kobo kop agecegece i komgi. Mom dok ibino medde wunu neno kabedo man akadi acel.

¹⁹Rwot okobo kop man baŋwu wun jo ame odoŋ ni, ‘Myero kur iwot wunu i Miciri’, Myero iŋe wunu ateteni ni atyeko kwenyorowu tin,

²⁰ni mannono wun ityeko gak wunu oko, kun imito ni kwowu rweny oko, Pien wun icwaa wunu baŋ Rwot Obaŋawu, kun ikobo wunu ni, ‘Tim ber ikwayiwa Rwot Obaŋawa, doŋ ginnoro keken ame Rwot Obaŋawa bino kobo baŋwa, wan giwa obino timo.’

²¹Doŋ tin an atyeko kobbiwu, cite wun mom iwinyo wunu kop a Rwot Obaŋawu i ginnoro luŋ ame en ocwaa me kobbiwu.

²²Aman myero iŋe wunu ni ibino to wunu ateteni, kun ito wunu i pala lweny, kec, kede too edeke, i kabedo ame imito wunu wot iye-nono.”