Read lango Jeremia 46 Bible Online

Jeremia 46 - lango bible

Jeremia 46

¹Man en kop ame Rwot okobo baŋ Jeremia adwarpiny i kom rok ocele.

²Man en kop ame en okobo i kom Miciri, Rwot okobo kop i kom mony a Parao Neko, abaka me Miciri, ame yam Nebukadnejar, abaka me Babulon oloo oko i lweny i Karkemic, ame ceggi kede kulo me Epurate, i mwaka me aŋwen me loc a Yekoyakim wot a Yocia, abaka me Juda, kun kobo ni,

³Odoŋe me Miciri tye ka redo ni, “Ruk wunu nyonyo me geno komwu, dok iyik wunu daŋ kwodewu, me icak wunu wot i lweny!

⁴Twe wunu kom me bedo i ŋe aguragura; wun wegi aguragura, bed wunu doŋ oko i wigi! Ryeye wunu doŋ oko i tyeŋ, kun iruko wunu tok nyonyo i wiwu! Pak wunu leb toŋiwu bed abit! Ruk wunu daŋ kotiwu me nyonyo i komwu!

⁵Ŋo kara ame atye ka neno nie? Lworo ocirogi oko, olokere oko odok cen. Twoni jogi a tek i lweny tye doŋ awano i komgi, otye ka riŋo oko oyotoyot meicel; kun mom oneno negi kadi acel, lworo doŋ ogurogi tuŋŋi i tuŋŋi! Man kop ame Rwot okobo.

⁶Lo adwir i ŋwec daŋ mom bino bwot; lo atek meicel i lweny daŋ mom bino bwot. Tutuŋ anyarodi i ŋet kulo me Epurate, otye ka twomere kengi kengi ote rette piny.

⁷“Man ŋa ame tye atinere calo pii ame tye i kulo Nail-li, calo kulo ame pii mere opoŋ olapakino atata?

⁸Miciri en ame tye atiŋere calo pii i kulo Nail-lono, calo pii i kulo ame pii mere opoŋ olapakino atata. Miciri tye akobo ni, ‘Abino tiŋere ate wumo loba luŋ, abino babaloboma kede jo luŋ ame bedo iye.’

⁹Medde wunu ba anyim, wun aguragura, wun gadigadi lweny, lor wunu ba i ŋwec! Cwal olweny wot anyim; Jo me Eciopia kede jo Put ame mako kwot, jo me Lud ame odiro meicel i telo akud atero.

¹⁰Nino-nono bino bedo nino a Rwot me mony, bino bedo nino me culo kwor, nino ame en bino culo kede kwor i kom okworrere. Pala lweny bino cem i tuno ka otyeko jo luŋ, remo bino mwonne amwona i lebgi. Pien Rwot Obaŋa me mony tye ka miyo mottere acalo mot me yalo Obaŋa, i lobo ame tye tutuŋ anyarodi i ŋet kulo me Epurate.

¹¹Wun jo i Miciri, wot wunu ba i Gilead, me iwot iyeny wunu yat me cano twowu kuno! Yen ame ibedo tic wunu kede doŋ konygi mom, mom doŋ romo canowu kadi acel.

¹²Rok ocele doŋ otyeko winyo pi lewic ame itye wunu kede, kokowu doŋ oromo lobo luŋ; pien olwenywu doŋ tye atwomere kengi kengi, ame jo otwomere, jo rette piny karacel.”

¹³Man en kop ame Rwot okobo baŋ Jeremia adwarpiny i kom bino a Nebukadnejar, abaka me Babulon me bino lweny i kom lobo me Miciri: Rwot okobo ni,

¹⁴“Kob kop i Miciri, dok irab pire daŋ i Migdol; rab pire i Mempic, kede i Tapanec ni, ‘Cuŋ wunu atek ame iyikere wunu me lweny, pien pala lweny bino balo ginnoro luŋ ame itye wunu kede.’

¹⁵Piŋo kara Apic oriŋo owekowu oko? cal twoni ame itio wunu mom dok tye ocuŋ do? Pien Rwot oretogi oko luŋ piny.

¹⁶Lwak doŋ tye ka twomere kengi kengi ote rette piny, kun ŋat man kobbi awottere ni, ‘Ya malo me odok cen oyotoyot baŋ jo turwa, i lobo ame onywalowa iye, me obwot i lak pala okworwa.’

¹⁷Lwoŋ wunu nyiŋ Parao abaka me Miciri, lwoŋ wunu i nyiŋ anyen ni, ‘Ŋat awo meicel balo cawa nono.’

¹⁸“Rwot okobo ni, kite ame atye kede kwo-ni, An a Rwot me mony. Acalli kidi me Tabor ame wie bor kato wi kiddi ducu, kede kidi me Karmel ame ocuŋ iguŋ malo i dog nam, teko a ŋat ame bino lweny i komwu tye kittono.

¹⁹Yikere wunu, bed ame itweo yecwu oko me wot iyi opii, wun jo ame bedo i lobo me Miciri. Pien Mempic bino doŋ yie nono, bino doko wi obur ame dano moro mom bedo iye.

²⁰“Miciri calo roya ame ocwe aber meicel, cite lwani areco ame kao dok ame oya i tutuŋ anyarodi, tye ka lweny kede.

²¹Ocirikale mere ame opaŋo apaŋa kede lim daŋ tye kittono, gin daŋ ocwe ame komgi moo keken calo roya, odoko doŋ agoro ame tekogi mom. Nen ba, gin luŋ olokere oko i ŋwec ame mom doŋ oromo cuŋ, pien kare me keto can i komgi doŋ oromo, kare me gonyogi doŋ ennono.

²²“Miciri tye ka riŋo oko kun kok calo twol, pien okworrere doŋ tye ka bino atek meicel, kun obino me lweny i kome kede lee, calo jo ame awot toŋo yen.

²³Rwot okobo ni, Gin obino toŋo bunnere oko, kadi bed bunnono onwoŋo oculle arom mene, pien jo mere pol meicel, calobonyo ame welgi mom romo kwanne, welgi mom ŋeye kadi acel.

²⁴Wun jo i Miciri, lewic be bino makowu, obino miyowu oko i cin jo ame oya i tutuŋ anyarodi.”

²⁵Rwot me mony ame obedo Obaŋa a jo Icrael okobo ni, “Nen ba, nen atye ka kelo can i kom Amon, ame obedo obaŋa me Tebec, kede Parao kede Miciri, kede obaŋe mogo ocele kede i kom obakki mere, i kom Parao kede i kom jo luŋ ame gene.

²⁶Abino miyogi i cin jo ame mito nekogi, i cin Nebukadnejar abaka me Babulon, karacel kede oticcere adoŋo. Icennere jo dok bino bedo i lobo me Miciri, kite ame rik jo bedo iye i kare acon.”

²⁷Rwot okobo ni, “Yin amirona Yakobo, kur ilwori, akadi yin Icrael, cunyi kur poti; Nen ba, abino larri i kannabor meicel, kede ikwai i lobo ame aman gin tye acalo opii, Ikwae a Yakobo bino dwogo cen, ote bedo mot i kuc, mom tye ŋattoro ame bino miyogi lworo.

²⁸Pien atye kedwu me bino larowu, abino jwero rok ocele luŋ atyekogi oko, iyi akina jo ame akeketowu iye, cite wun mom abino tyekowu ducu, Abino pwodowu abeber, ento mom abino wekowu ame mom aketo can i komwu. Man kop ame Rwot okobo.”