Read lango Jeremia 47 Bible Online

Jeremia 47 - lango bible

Jeremia 47

¹I kare ame Parao mom ru olwenyo i jo Gaja, Rwot okobbi Jeremia kop i kom jo Piriciti.

²Rwot okobo ni, “Nen ba, okwor tye abino i tutuŋ anyarodi, abino calo pii ame otinere i kulo, kun mol karacel atek meicel. Bino jwero jami luŋ i lobo calo pii ame molo ginnoro luŋ ame tye i lobo, boma karacel kede jami luŋ ame tye iye, jo bino redo i koko meicel, jo luŋ ame bedo i lobo bino kok

³Gin bino winyo tyen aguragura ame awo, karacel kede mor a gadigadi, karacel kede nur a tyen gadigadi, onywal mom doŋ bino lokere me neno itinogi, bino nwoŋo ciŋgi daŋ doŋ okwe oko,

⁴Mannono bino timere pien nwoŋo kare me tyeko jo Piriciti luŋ doŋ oromo oko kede me tyeko jo ame yam mio kony baŋ jo Turo kede Cidon. Pien Rwot ikome atyeko doŋ jo Piriciti oko, jo luŋ me dog nam me Kaptor ame yam odoŋ.

⁵Cwercuny adwoŋ meicel doŋ obino oko i kom jo Gaja, jo Acikelon doŋ oto otum oko doi. Jo Anak ame odoŋ, ibino kumo wunu pi kare arom mene ba?

⁶Itye ka redo wunu ni, Pala me lweny a Rwot! Ibino bedo ŋoŋolo komwu naka awene ba? Dok ba cen iyi akureni, me ibed doŋ mot.

⁷Ibino kara we i yore aŋo ba, kun an a Rwot doŋ atyeko miye tic me atia? Ityeko miya tic me lweny i kom Acikelon, kede i kom jo ame bedo i dog nam.”