Read lango Jeremia 49 Bible Online

Jeremia 49 - lango bible

Jeremia 49

¹I Rwot okobo ni, “Jo Icrael mom tye itino awo be bo? Jo moro mom doŋ tye ame myero le lobogi bo? Piŋo owe ko jo ame woro Milkom ogamo dul lobo me a jo me atekere a Gad oko me be bedo meggi, dok jogi tye ka bedo i boma luŋ ame iye kuno?

²Pi mannono, nen ba, kare tye abino i nyim, ame abino miyo jo me Raba winyo koko me lweny, boma a jo Ammon luŋ, bino doko wi oburu, karacel kede pacci luŋ ame tye iye, obino wano oko i mac. Jo Icrael bino mayo lobogi oko, i baŋ jo ame yam omao baŋgi. Man kop a Rwot okobo.

³“Kok wunu ba, wunjo me Kecbon: Pien bomawu me Ai doŋ odoŋ yie nono! Kok wunu ba, wun anyira me Raba! Twe wunu bono cola i komwu, kum wunu, ite bedo ŋwec wunu atata naka i wi cel-gu! Pien Milkom ame obedo obaŋawu, obino tero oko iyi opii, olamdoggere karacel kede rwode mere daŋ obino tero oko iyi opii.

⁴Piŋo kara itye iwakere wunu pi luŋ ame tye i lobowu, wun jo a mom genne-ni, Piŋo kara itye ka geno lonyowu ame ikano wunu, kun ikobo wunu ni, ‘Ŋa abino lweny i komwa?’

⁵Nen ba, abino miyo lworo makowu, i kom jo luŋ ame bedo i ŋetwu, dok obino ryemowu oko, ŋat acel acel bino riŋo kene me laro kwo mere kun mom dok tye ŋattoro ame bino coko oriŋ ayela karacel. Man kop ame Rwot me mony okobo.”

⁶Cite icennere, abino dwoko gum a jo Ammon, Man kop ame Rwot okobo.

⁷Rwot me mony okobo ni, “Ryeko doŋ orwenyo oko i Teman bo? “Ryeko doŋ orwennyi omi-tam oko ba? Ryeko doŋ orwenyo oko luŋ bo?

⁸Wun jo me Dedan, lokere wunu me iriŋ wunu oko, wot ipon wunu i bur adit meicel. Pien abino neko ikwae Ecau oko, pien kare me keto can i komgi doŋ oromo.

⁹Ka ce opwon olok obino baŋi, gin opwono olok ducu mom oweko moro doŋ i wi yat? Ka ce okwo obino dyewor, mom obino yako jami ame oromogi keken?

¹⁰Ento atyeko ikwae Ecau ducu, abalo kabedo moro luŋ ame yam gin obedo iye, Man omio mom dok otwero nwoŋo kabedo moro me pono. Itino mere kede omego mere daŋ doŋ oneko oko, wati mere kede owote mere daŋ doŋ ajwero oko,

¹¹Wek itino kicwu ame onywalgi oto oko-ni baŋa, an abino gwokogi, mon towu luŋ myero gena.”

¹²Rwot okobo ni, “Ka ce jo ame onwoŋo myero mom ket can i komgi otyeko keto can i komgi, wun ibino bwot wunu ame mom oketo can i komwu? Mom ibino bwot wunu ame mom oketo can i komwu, myero gire imat wunu ikopo me can,

¹³Pien doŋ atyeko kwoŋ an kena kena ni Boma me Bojra, bino doko twon ginnoro arac ame jo kobo kop i kome, dok ame owuro ame yie odoŋ nono, ame daŋ doŋ oceno oko; boma luŋ ame tye i ŋete bino doko wi oburu, Man kop ame Rwot okobo.”

¹⁴Atyeko winyo kop ame oya i baŋ Rwot, otyeko cwayo okwena me rabo pire baŋ rok ducu, kun okobo ni, “Cokere wunu karacel me ibin ilweny wunu i kom Edom. Yikere wunu me lweny ba!

¹⁵Pien nen ba, Rwot bino miyowu idoko wunu agoro i akina rok, dok obino cayowu meicel.

¹⁶Wakere gire mom konyowu kadi acel, mom tye ŋattoro ame lworowu, wun jo ame ibedo wunu i akina kiddi ame obarre, kadi bed ibedo wunu i wi kidi malo kannabor meicel. Kadi bed ibedo wunu malo calo cur, abino dwoggowu oko piny. Man kop ame Rwot okobo.

¹⁷“Edom bino doko gin ame mio jo lworo, ŋat acel acel ame bea i ŋete bino bedo i twon lworo adwoŋ meicel, ote bedo jwiye ajwia pi can ame opoto i kome.

¹⁸Kite ame rik oreto kede Codoma kede Gomora kede boma luŋ ame tye i ŋete, ŋattoro mom dok bino bedo kuno, ŋattoro daŋ mom bino bedo welo me kuno.

¹⁹Abino miyogi oriŋo oko oyotoyot, calo eŋato ame tye i bar me kwayo rommi, ame oya i buŋ ame yen oculle acula iye ame tye i dog kulo me Jordan, Abino keto ŋattoro keken ame cunya omito me loye. Ŋa kara ame rom keda? Ŋa ame twero lwoŋa me wot lweny kede?

²⁰Akwattene ame romo Cuŋ i nyima, pi mannono, myero iwiny gin ame Rwot otyeko yiko me timo i kom Edom, kede gin ame en otyeko yiko me ti mo i kom jo ame bedo i boma me Teman. Anaka jo atino mege abino miyo owaogi. Ateteni can ame bino poto i kom otinogi, bino miyo jo lworo.

²¹Ka Edom opo to, morrere bino miyo lobo yeŋŋere, koko mere bino winyere naka i dog Nam Arema.

²²Nen ba, okwor bino bino me bino lweny i kom Bojra, calo cur ame twarre malo i polo te lyao piny kun doŋ oyaro bwome oko. I nino-nono cuny olweny me Edom bino bedo alwor calo cuny dako amerem me nywal ogo.”

²³Man en kop ame Rwot okobo kom Damaciko, “Jo ame bedo i boma me Kamat kede Arpap ale doŋ otwodogi oko, pien gin doŋ otyeko winyo amut arac; cunygi doŋ oŋabere aŋaba pi lworo, ocalo doŋ nam ame atagere, ame mom romo cuŋ mot.

²⁴Jo Damaciko doŋ odoko agoro meicel, olokere me riŋo doŋ oko i twon lworo adwoŋ meicel. Rem kede cwercuny doŋ ocirogi oko, calo dako amerem me nywal ogo.

²⁵Boma ame yam neye wok-ki, boma ame yam yomcuny dwon iye wok-ki, doŋ otyeko weko oko!

²⁶Pi mannono, awobe mere atino obino neko oko i dye boma, ocirikale mere luŋ daŋ obino jwero oko i nino-nono, Man kop ame Rwot me mony okobo.

²⁷Abino moko mac i kom apama cel me Damaciko, maccono bino wano paco adwoŋ me Ben-adad oko.”

²⁸Man en kop ame okobo i kom atekere me Kedar kede i kom loc luŋ me Kajor ame yam Nebukadnejar, abaka me Babulon olwenyo i komgi te loyogi oko, Rwot okobo ni, “Ya malo me iwot ilweny i kom jo Kedar! Wot inek atekere luŋ ame tye tutuŋ kide.

²⁹Kemagi kede rommigi obino yako oko, karacel kede boma me icikagi, naka jami luŋ ame tye i kemagi. Inagagi bino wot nywal iciŋ jo ocele, jo bino redo ni, ‘Lworo doŋ ogurowu tuŋŋi i tuŋŋi!’

³⁰Wun jo me Kajor, acikowu ni myero iriŋ iwot ipon wunu oko kannabor, pien Nebukadnejar, abaka me Babulon, otyeko yikere me timo gin arac i komwu, otyeko doŋ poro kop oko i komwu.

³¹“Ya wunu, me iwot ilweny wunu i kom jo ame yam bedo mot i kuc aboŋo aye la moro, doggola me celgi mom tye, akadi arii mogo me geno, dogcelgi bedo olaŋara,

³²Inagagi obino yako oko, dokgi daŋ obino yako oko, abino keto jo ame mworo yer wigi doŋ acogo, i kabedo luŋ ame tye i lobo, can ame abino kela i komgi, bino ya kabedo ducu.

³³Kajor bino doko tim, kan ame ikwe keken en ame bedo iye, kan ame ŋattoro mom bedo iye kadi acel, dok ŋattoro daŋ mom bino wot kuno.”

³⁴I kare ame Jedekia abaka me Juda pwod cako loc acaka, Rwot okobbi Jeremia adwarpiny kop i kom Elam.

³⁵Rwot me mony okobo ni, “Nen ba, abino neko wegi akud tero luŋ ame tye i Elam, ame gin jo ame omio lobo me Elam odoko atek.

³⁶Abino miyo yamo kodo i twok lobo aŋwen luŋ bino i kom Elam, jo iye te ket i akina rok luŋ ame tye i lobo,

³⁷Abino miyo lworo mako jo Elam meicel i nyim okworgi, kede i nyim jo ame mito neke, Abino kela gin arac i kom jo Elam, kede twon akemona agwa. Abino miyo pala me lweny lubo yorgi ate nekogi oko.

³⁸Abino keto kom locca i Elam, ate neko abakagi kede rwodegi oko. Man kop ame Rwot okobo.

³⁹“Cite icennere abino miyo gum a jo Elam. Man kop ame Rwot okobo.”