Read lango Jeremia 5 Bible Online

Jeremia 5 - lango bible

Jeremia 5

¹Wun jo me Jerucalem, koŋ iriŋ iloŋ wunu dye yowu luŋ, Ŋoloro wunu kabedo luŋ me inen wunu. Koŋ inen wunu kabedo luŋ ame yam jo cato iye jami, koŋ inen ka ce itwero neno wunu dano moro iye, ame ŋolo kop kakare, ame temo bedo ŋat a genne, me atim Jerucalem kica,

²Kadi bed gin kobo ni, “Kite ame Rwot tye kwo-ni, pwod dokokwoŋo kwon me gobagoba.

³Ama Rwot, yin mom imito neno ateni? Yin doŋ ityeko goyogi, cite gin mom owinyo rem; yin ityekogi oko, cite mom oye yikere. Waŋgi ocwiny kato gwen oko, okwero gigi ŋut oko.”

⁴An dok ate kobo ni, “Magi obedo ocan keken, wigi mom tio kadi acel, pien mom oŋeo yo a Rwot, ame en cik Obaŋagi.

⁵Abino wot baŋ jo adoŋo ame tye kede twer, abino wot kop kedgi, pien gin oŋeo yo a Rwot, ame en cik Obaŋagi.” Cite anwoŋo ni gin luŋ orom aroma, gin luŋ oturo loc oko i ŋutgi, ocodo-gu nyor ame otweogi kede oko.

⁶Mannono omio eŋatu ame bino ya i buŋ bino nekogi oko, epet me tim bino tyekogi oko. Kwac bino kuro bomagi luŋ akura, ŋattoro keken ame bino ya iye me wot oko, kwac bino kikilo atitino; pien balgi doŋ dwon meicel, dok timgi me ya oko i baŋ Obaŋa tye ka medde ameda.

⁷“Atwero timowu kica i yore aŋo? Itinowu doŋ otyeko weka oko, otye doŋ ka kwon i nyiŋ gigi mogo ame mom obedo Obaŋa. Ka ce apitogi oyeŋ, ocako cot atata ociro karacel me wot i wudi olaya.

⁸Onwoŋo opitogi oyeŋ atek, calo twon aguragura ame opito aber, inwono ŋat acel acel tye ka koko dako a wadgi.

⁹Mom atwero keto can i komgi pi timgi-nono? Dok mom aromo culo kworra i kom rok acalo man? Man kop ame Rwot okobo.

¹⁰“Wot ibe i akina olokkere me ibabalo oko, cite kur ibal luŋ aluŋa: lwelwero jangi oko, en mom obedo me a Rwot.

¹¹Pien jo me ot Icrael kede jo me ot a Juda, onwoŋo mom doŋ genna kadi acel. Man kop a Rwot.”

¹²Gin obedo kobo kop me goba i kom Rwot, dok daŋ okobo ni, “En gire mom bino timo ginnoro; cannoro gire mom bino poto i komwa, mom daŋ obino neno pala romo, kec daŋ mom bino poto baŋwa.

¹³Odwarpiny luŋ bino lokere doko yamo, kun kopporo doŋ mom i cunygi, Mannono en gin ame obino timo i komgi.”

¹⁴Mannono omio Rwot Obaŋa me mony okobo ni, “Pien gin okobo kop man, nen ba, aloko koppa ame tye i dogi adoko mac, kun aloko jo man doko yen, mac bino wanogi oko.

¹⁵Nen ba, wun jo me ot Icrael, an akelo rokkoro i komwu i kannabor. Man kop a Rwot. Rokkere obedo rok atek meicel, dok obedo rok acon meicel, rok ame wun mom iŋeo wunu lebgi, dok mom iromo niaŋ wunu kop ame gin kobo.

¹⁶Wegi aterogi mom bao piny nono, gin luŋ obedo twoni jo atek meicel.

¹⁷Gin bino camo kalwu ame ikaa wunu, kede kit cam ocele luŋ, gin bino ca mo anyirawu kede awobewu; gin bino camo dyegiwu, rommiwu kede dokwu, obino camo olokwu kede odurowu; bomawu luŋ ame oceoelo ame igeno wunu wok-ku, gin abino babalo oko i pala romo.”

¹⁸Rwot okobo ni, “Akadi i kare naca daŋ mom abino tyekowu odoco.

¹⁹Ka ce jowu bino kobo ni, ‘Piŋo kara Rwot Obaŋawa otimo jami man luŋ i koo, mwa?’ wun ibino kobbegi wunu ni, ‘Kite acalo iweka wunu ite cako wunu tiyi obaŋe mogo ocele, amannono daŋ ibino tiyi wunu rok ocele i lobo a mom obedo megwu.’ ”

²⁰Kob kop man baŋ jo me ot a Yakobo, rab koppere i Juda ni,

²¹“Winy wunu kop man, wun jo amiŋ ame wiwu mom tio-ni, ame tye kede waŋgi, cite mom neno ginnoro, ame tye i yitgi, cite mom winyo kop.

²²Rwot openyowu ni, Wun mom ilwora wunu ce? Komwu mom myel i nyima bo? Aketo kwoyo obedo gin ame poko pii i nam, ame obedo wan apokki arac ame mom romo kate atwal; kadi bed pii i nam tagere rom kwene, mom romo loyo kadi acel, kadi pii mere mor rom mene, mom romo kato i wie malo.

²³Cite jo man opala meicel, dok cunygi mito jem keken; olokkere tene, owe ka doŋ oko.

²⁴Mom daŋ okobo i cunygi ni, ‘Myero obed kede lworo i kom Rwot Obaŋawa, ame mio kot cwe i kare mere ikome, kot me iporo kede kot me cwir, dok gwoko pirwa kare luŋ ame otyeko moko me kayo kac.’

²⁵Balwu omio magi luŋ doŋ oya oko i baŋwu, balwu omio gin aber doŋ mom tye baŋwu.

²⁶Pien jo ame timo tim areco tye i akina jona, obedo kiyo piny calo jo ame adwaro winy. G in ociko owicgi; owicgi-nono te mako jo.

²⁷Udigi opoŋ iye kop me erupe, calo winy ame opoŋ dita; mannono omio doŋ odoko jo adoŋo ame olony,

²⁸doŋ ocwe ame komgi lilia alili; Ka gikgi mom i timo gin arac, mom oŋolo kop atira kadi acel, mom okonyo itino kic, atot ya obed aber, dok kop ajo ame piny oloo mom opido atira,

²⁹Mom aromo keto can i komgi pi timgi-nono? dok mom aromo culo kworra i kom rok acalo man? Man kop a Rwot okobo.”

³⁰Gin me awura meicel ame mio jo lworo, doŋ otyeko timere oko i lobo.

³¹Odwarpiny doŋ tyeto kop me goba keken, olamdog daŋ doŋ timo gin ame yigi mito keken; jona daŋ mito ni bed timere amannono, kara doŋ ibino timo wunu ŋo ka ce agikki piny doŋ otuno?