Read lango Jeremia 50 Bible Online

Jeremia 50 - lango bible

Jeremia 50

¹Kop ame Rwot akobo baŋ Jeremia adwarpiny i kom Babulon, ame en lobo a jo Kaldaya, tye kit man:

²“Tuc kop man baŋ rok ducu dok daŋ irab pire, Tin wunu bendera malo kannaler ite kobo wunu kop man, Kur ikan wunu kop man bed calo kop me imuŋ, cite myero irab wunu pire ni, ‘Babulon doŋ opoto oko! Bel ame obaŋa mere lewic doŋ omako oko, Merodak cunye doŋ oballe oko. Cal jogi mere luŋ, lewic doŋ omako oko, cal jogi mere ame otio atia i cin cunygi doŋ ojebere oko.’

³“Pien rok ame oya i tutuŋ anyarodi, obino doŋ oko me bino lweny i kom Babulon. Gin bino miyo lobo me Babulon doko wi obur, ŋattoro mom bino bedo kunnu; akadi dano onyo lee bino riŋo oko i kuno.

⁴“Ka kare-naca otuno, jo Icrael kede jo Juda bino bino karacel kun obino ame okobo, ote bino yenyo Rwot Obaŋagi.

⁵Gin obino penyo yo me Cion, ote wot atira kunnu, Obino ko bo ni, ‘Bye wunu, me obin oribere wunu i Rwot, i ikere ame perakino nakanaka, ame wi jo mom bino wil iye.’

⁶“Jona doŋ calo rommi ame orwenyo ame okwatgi ame miogi orwenyo, kun terogi i wi kidi, oya i wi kidi man, okobo i wi kidi man, omio wigi te wil oko i kom kan ame obedo iye.

⁷Jo luŋ ame nwoŋogi, nekogi aneka, okworgi daŋ kobo ni, ‘Wan giwa omom i bal, pien gin obalo baŋ Rwot, ame en kabedogi me ateteni, Rwot ame kwarigi obedo geno.’.

⁸“Wun jo Icrael, rin wunu oko i Babulon. Ya wunu oko i lobo a jo Kaldaya, me ibed wunu calo nyok dyel ame telo nyim dyegi.

⁹Nen ba, abino tugo twoni rokkogo atek apapat, me bino lweny i kom Babulon, abino tugogi i tutuŋ anyarodi, Gin bino ryeye i teyn me lweny i kom Babulon, ote daŋ mako oko, aterogi calo me olweny ame odiro meicel ame mom dok ciŋgi nono.

¹⁰Obino yako lobo a jo Kaldaya oko, jo ame oyako lobogi-nono, bino yako ginnoro luŋ ame cunygi omito. Man kop ame Rwot okobo.

¹¹“Wun jo Babulon we, kadi bed cunywu bed yom, kun iwakere wunu calo roa ametye ka nyono, onyo acalo twon aguragura ame tye olakino i koko, wun jo ame yako jona.

¹²Lewic bino mako lobowu meicel, lobo ame onywalowu iye bino bedo i twon lewic adwoŋ meicel. Babulon bino doko rok atidi meicel i akina rok ducu, lobo mere bino doko tim ame otwo imek.

¹³Ŋattoro mom bino bedo i Babulon pi akemo a Rwot, lobo mere bino doko wi obur kun yie tye nono. Jo luŋ ame bino bea i ŋete bino wuro awura, lworo bino makogi meicel pi gin ame otimere-nono.

¹⁴“Wun jo luŋ ame omako akud atero, cun wunu doŋ oko i tyeŋ me lweny i kom Babulon, gure wunu dyere me ibae wunu aterowu ducu, pien en otimo bal i kom Rwot.

¹⁵Red wunu i dwon aloŋo, i dwon me lweny, gur wunu boma oko, pien Babulon doŋ otyeko miye oko kene i cinwu. Cellere luŋ doŋ omuko oreto oko piny An Rwot en ame atye aculo kwor i kom Babulonnono, pi mannono myero icul wunu kwor i komgi, tim wunugi kite ame gin rik otimowu kede.

¹⁶Nek wunu jo ame coo koti luŋ i Babulon, kede jo ame mako pala me kac, i kare me kac, moro i akinagi myero kur doŋ. Pala me lweny ame jo tye alweny kede kuno, bino miyo arokkoro keken ame bedo i akinawu, lworo mako, te ya wot oko i lobogi.

¹⁷“Jo Icrael calo rommi ame eŋatu dwaro te ryemo miyo ket atata. Jo me Acuria yam koŋ ogeo lweny i komgi, aman dok Nebukadnajer abaka me Babulon omwomwodo cogo mere oko.

¹⁸Man omio Rwot me mony ame obedo Obaŋa jo Icrael okobo ni: Nen ba, Abino keto can i kom abaka me Babulon karacel kede lobo mere, kite ame oketo kede can i kom abaka me Acuria.

¹⁹Abino dwoko jo Icrael oko cen i lobogi. Gin bino bedo camo cem ame cek i wi kidi me Karmel kede i lobo me Bacan, dok daŋ obino camo ginnoro luŋ ame cunygi mito ame ocek i lobo obedo kidikidi me Epraim kede i Gilead.

²⁰I kare-naca kede i ninonaca, obino yenyo bal iyi Icrael, cite mom obino nwoŋo moro iye kadi acel, mom daŋ obino nwoŋo moro i Juda, pien abino timo jo ame odoŋ kica. Man kop ame Rwot okobo.

²¹“Wot ilweny wunu i kom jo Merataim, kede i kom jo ame bedo i Pekod. Wot inekgi wunu, ityekgi wunu oko, nen ni itimo wunu ginnoro luŋ ame acikowu me timo.

²²Woo me lweny tye awinyere i lobo, twon to arac meicel doŋ obino oko.

²³Anyul me lobo doŋ onidde oko atitino! Babulon doŋ odoko gin ame mio jo lworo i akina rok ducu!

²⁴Babulon doŋ otyeko moko oko owic ame aciko pire, omoko kun onwoŋo mom ŋeo. Onwoŋo doŋ omoko oko iye, pien en onwoŋo olwenyo i kom Rwot.

²⁵Rwot doŋ otyeko yabo kan ame ekano iye jami lwennyere, okwanyo jami lwennyere okelo oko i twon akemo adwoŋ meicel, pien Rwot Obaŋa me mony tye kede gin ame emito timo, i kom lobo me Babulon.

²⁶Bin icak wunu lweny i ko me i kom kabedo ducu; yab wunu dero kallere oko luŋ. Cok wunu jami mere ame iyako wunu iyid wunu ni bim, bala kai ame ocoko karacel. Jwer wunu lobo mere oko odoco, kur iwek wunu ginnoro doŋ iye kadi acel.

²⁷Nek wunu twoni mere ducu, ter wunu iwot inek wunu oko luŋ, Can i wi jo Babulon doi! Pien karegi doŋ oromo oko! Kare me keto can i komgi doŋ oromo!

²⁸“Koŋ inen wunu oriŋ ayela ame obwot i lobo Babulon tye ka lwi riŋo oko, gin oriŋo i Cion, otye otito kite ame Rwot Obaŋawa oculo kede kwor pi gin ame yam Babulon otimo kede i kom ot me wore.

²⁹“Lwon wunu wegi akud atero me bin lweny i kom Babulon. Cwa wunu jo luŋ ame ŋeo telo akud atero wot kunu, Wot igur wunu boma oko, kur imi wunu ŋattoro bwoti. Wot icul wunu kwor i kome, kun lubo gin ame yam en otimo, time wunu arom aroma i gin ame yam en otimo i kom jo ocele, pien yam otimo bal i kom Ŋat Acil me Icrael i twon awaka adwoŋ meicel.

³⁰Pi mannono, awobe mere atino obino neko oko i dye boma, ocirikale mere luŋ obino daŋ tyeko oko i nino-nono. Man kop ame Rwot okobo,

³¹“Nen ba, an atye i kop i komwu wun jo ame wakere, pien karewu doŋ oromo oko, kare ame abino keto iye can komwu. Man kop ame Rwot me mony okobo.

³²Jo ame wakere bino gatte te rette piny, kun ŋattoro ame tiŋogi malo mom tye, dok abino cwinyo mac i bomagi luŋ, maccono bino wano ginnoro luŋ ame tye i ŋetgi.

³³“Rwot me mony okobo ni: Otye ka wuno jo me Icrael kede jo me Juda meicel. Jo ame omakogi te terogi acalo opii, olidogi doŋ atek odoco, kun mom oye ni owoti.

³⁴Ŋat ame lakkorogi tek meicel; nyiŋe Rwot me mony. En ikome bino pido pirgi, me wek emi lobo bed i kuc, ento ekel can i kom jo me Babulon.”

³⁵Rwot okobo ni, “Nek wunu jo Babulon! Nek wunu jo Kaldaya! Nek wunu rwode kede oryeko luŋ ame tye iye.

³⁶Nek wunu otyet ame tyeto tyet me goba goba, me gin luŋ odok jo amin meicel. Nek wunu ocirikale me lweny, nek wunugi ityekgi ducu.

³⁷Nek wunu aguraguragi, bal wunu daŋ gadigadi me lwenygi oko. Nek wunu rok a mony ocele luŋ ame tye i akinagi, me odok agoro calo mon. Bal wunu lonyo luŋ ame tye iye, yak wunu lonyo iye luŋ.

³⁸Mi wunu can pii pot i lobogi, me pii two oko iye luŋ. Pien Babulon obedo lobo ame cal jogi dwon iye meicel, cal appa oloko jo odoko opoa.

³⁹“Pi mannono ba, leyi me tim kede ekwe kede udo bino bedo i Babulon, ŋattoro mom doŋ bino bedo kunu atwal, pi kare a jo me lwagi ducu.

⁴⁰Kite ame rik otimere kede i kare ame Obaŋa oreto kede Codoma kede Gomora karacel kede bomagi ducu, ŋattoro daŋ mom bino bedo kunu kittono, dano moro mom bino bedo iye acalo welo. Man kop ame Rwot okobo.

⁴¹“Nen ba, rokkoro tye abino i tutuŋ anyarodi, rok atek ame obakki mere pol meicel, tye ka yubere me bino lweny i kannabor meicel.

⁴²Omako doŋ akud aterogi kede tonigi oko, rokkono ger meicel dok kica mom i cunygi. Woogi calo pii i nam ame amor, gin oriŋo aguragura, ame otere oko acalo dano ame akuro lweny akura, gin abino me bino lweny i komwu, wun jo Babulon.

⁴³“Abaka me Babulon doŋ otyeko winyo kop i komgi oko, omio ciŋgi doŋ okwe oko inon, twon remmoro adwoŋ meicel doŋ oketo kome oko, tye ka rem calo dako ame rem me nywal ogo.

⁴⁴“Nen ba, abino miyogi oriŋo oko oyotoyot, calo eŋatu ame tye i bar me kwayo rommi, ame oya i bun ame yen oculle acula iye, ame tye i dog kulo me Jordan. Abino keto ŋattoro keken ame cunye omito me loye. Ŋa kara ame rom keda? Ŋa ame twero lwoŋa me wot lweny kede? Akwattene ame romo cuŋ i nyima?

⁴⁵Pi mannono ba, myero iwiny gin ame Rwot otyeko yiko me timo i kom Babulon, kede gin ame en otyeko yiko me timo i kom lobo a jo Kaldaya. Anaka jo atino mege abino miyo owaogi. Ateteni, can ame bino poto i kom otinogi bino miyo jo lworo.

⁴⁶Ka Babulon opoto, morrere bino miyo lobo yeŋere, koko mere bino winyere i akina rok ducu.”