Read lango Jeremia 51 Bible Online

Jeremia 51 - lango bible

Jeremia 51

¹Rwot okobo ni, “Nen ba, abino tugo cuny anek jo me bino i kom Babulon, kede i kom jo ame bedo i Kaldaya.

²Abino cwayo rok ame jwero Babulon oko calo yamo ame akolo ren kal, rokkono bino timogi cucu, te weko lobo doŋ nono, ka gin bino me lweny i koma kabedo luŋ, i nino ame abino keto iye can komgi.

³Kur imi wunu jo Babulon kare me celo aterogi, kur imigi wunu kare me riko koti lweny. Kur iwek wunu awcbegi moro doŋ akwo, tyek wunu monygi luŋ.

⁴Gin bino rette piny ame doŋ oto oko i lobo me Kaldaya, obino rette ame doŋ owanogi i dye gudu luŋ ame tye i boma.

⁵Pien a Rwot me mony, mom aweko jo Icrael kede jo Juda, kadi bed otimo bal adwoŋ meicel i lobo a jo Kaldaya, i kom an Ŋat Acil me Icrael.

⁶“Riŋ wunu oko i akina jo Babulon, ŋat acel acel myero lar kwo mere. Kur imi nekwu oko pi bal a jo me Babulon, pien en man en kare me culo kwor a Rwot, kare me keto can i kom Babulon ame rom aroma i gin ame en otimo.

⁷Babulon onwoŋo tye acalo ikopo me jabu i cin Rwot, ame onwoŋo omio lobo luŋ tye ka mer amera, rok luŋ obedo mato koŋo olokkere, onwoŋo omio rok luŋ odoko opoa oko.

⁸Babulon doŋ orette oko oyotoyot, te tur oko. Kok wunu pire ba! Ter wunu yat owot iket wunu i wan burere ame oketo ikome, gwok onyo twero can.

⁹Rok ame bedo kuno okobo ni otemo konyo Babulon, cite otemo kwe, mom romo larre. Weke wunu doŋ, ŋat acel acel myero dok cen paco mere; pien Obaŋa ikome en a doŋ oŋolo kop i kome, otyeko doŋ jwero Babulon odoco.

¹⁰Rwot doŋ otyeko nyuto ni kopwa tye atira, biye wunu, obin orab wunu pire i Cion, gin ame Rwot Obaŋawa otimo.

¹¹“Rab wunu aterowu! Kwany wunu kwodewu, wun jo Media! Rwot doŋ otugo cuny obakki me Media oko, pien yikkere tye me balo Babulon oko, pien mannono en kite ame en bino culo kede kwor, kwor pi gin ame jo me Babulon otimo i kom ode.

¹²“Twe wunu bendera cun ame nyuto ni lweny tye i kom cal me Babulon; cuk wunu cuny okur-piny kur bed alwor, pok wunu okur-piny oko i kabedo apapat, mi wunu jo ame opono bed kun okio piny. Rwot doŋ otyeko timo gin ame yam eyikere me timo, gin ame yam en okobo i kom jo ame bedo i Babulon.

¹³Wun jo Babulon ame itye wunu kede kulo meicel i lobowu, dok lonyo daŋ dwoŋ meicel i ciŋwu, agikkiwu doŋ ceggi, uci ame otudde i kom kwowu doŋ ocodo oko.

¹⁴Rwot me mony doŋ otyeko kwon i nyiŋe kene, en okwoŋo ni, Abino kelo lwak jo apipim calo bonyo, me bino lweny i kom Babulon, gin bino woo i dwon ame nyuto ni gin doŋ otyeko loyo lweny.

¹⁵“Rwot gire en oketo lobo kede teko mere, en ocibo lobo omio ocuŋ atek pi ryeko mere, en omio polo opette kite ame tye kede-ni pi ŋeccere.

¹⁶Ka ce dwone omor pii i polo twaggere meicel, dok en mio ekuna duny kun ya i agikki piny, En mio lutkot wil ka kot ocwe, dok mio yamo kodo kun ya i ot kano-jami mere.

¹⁷Jo luŋ min atek dok daŋ mom otye kede ŋeccoro, cal jogi ame apac opao en ame dok mie lewic, pien cal jogi-nono mom obedo obana, dok mom daŋ otye kede lworo kadi acel.

¹⁸Konygi moro mom, otiogi me acaa keken, i kare me keto can i komgi, gin luŋ obino to oko.

¹⁹Obaŋa a Yakobo mom calo cal jogi-nono, pien en obedo ŋat oketo jami luŋ, dok oyero jo Icrael me bedo jo mere. Nyiŋe Rwot me mony.”

²⁰Rwot okobo ni, “Yin ibedo anyuila kede jami me lwenya, atio kedi me ninyo rok luŋ atitino, dok atio kedi me babalo loc apapat,

²¹atio kedi me neko aguragura kede ŋat ame ŋweco kede; atio daŋ kedi me tuturo gadigadi kede jo ame ryemogi,

²²atio kede me neko co kede mon, atio daŋ kedi me ŋe ko awobe kede anyira;

²³atio kedi me neko akwa rommi karacel kede rommi mere; dok atio kedi me neko apur karacel kede twoni ame en puro kede; dok atio kede me neko oloc adoŋo karacel kede otel mony apapat.

²⁴“Abino culo kwor i kom Babulon kede i kom jo Kaldaya luŋ pi gin arac ame gin otimo i Cion, kun wun ineno wunu kede waŋwu. Man kop ame Rwot okobo.

²⁵“Nen ba, yin Babulon ame itye calo kidi ame neko jo-ni, an atye kede kop i komi, yin ame ityeko lobo luŋ oko-ni; abino ryeyo ciŋa i komi ate maki ikwic, ate bedo lori piny i lobo, ate miyi doko calo kidi ame owaŋo.

²⁶Mom obino kwanyo gweŋŋoro i komi kadi acel me bedo me gwic ot, mom daŋ obino kwanyo gweŋŋoro, me bedo me acakki te ot, ibino bedo calo tim ame yi jo ocao, Man kop ame Rwot okobo.

²⁷“Gur wunu bendera cuŋ i lobo me nyuto lweny! Kut wunu apel me rok luŋ winy! Yik wunu rok apapat me lweny i kom Babulon, lwon wunu loc apapat me bin lweny i kome, loc a jo Ararat, jo Mini kede loc a jo Ackenaj; ket wunu adwoŋ ame lo wi mony luŋ me lweny i kome. Kel wunu aguragura apipim calo bonyo.

²⁸Yik wunu rok luŋ me lweny i kom Media, obakki me Media, oloc adoŋo, karacel kede odoŋe ame konyogi, kede lobo luŋ ame tye i te locgi.

²⁹Lobo tye ka yeŋere meicel, dok jo iye rem ociro oko, pien Rwot doŋ tye acobo gin ame en oyiko, me timo i kom Babulon. En bino miyo Babulon doŋ yie nono aboŋo jo moro ame bedo iye.

³⁰Olweny me Babulon doŋ ogiko lwenyoko, obedo doŋ abedo iyi celgi ame ocelo atek; tekogi doŋ otum oko, odoko doŋ mon ata; obedo doŋ ikuduru i dog mac, dog bomagi luŋ doŋ oturo oko.

³¹Jo ame ooro riŋo tere i tere, kun ŋat man rwatte i wadgi, me wot kobbi abaka me Babulon ni boma mere doŋ oturo oko i kabedo ducu.

³²Okwor otyeko mako mel kede yede luŋ ame tye i dog kulo, dok daŋ ocwicwinyo lum oko kede mac, ocirikale me Babulon doŋ obabaŋa oko.

³³Pien Rwot me mony ame obedo Obaŋa me Icrael okobo ni; Okwo ceggi nyono Babulon oko calo laro me dino kal, kare me nyono piny pwod odoŋ anonok, kare mere bino tuno.”

³⁴“Nebukadnajer abaka me Babulon otima lit; onyona aboŋo kica. Omio boma odoŋ yie nono calo yi gulu, omwonya oko alutu calo twon lee moro ame bedo i pii. Odepo ginnoro luŋ ame cunye mito, te ŋoko en ame odounere oko.

³⁵Tim me kole ame otimo i koma, kede i kom watina, myero gire dok i wi Babulon.” Jo ame bedo i Cion myero kob ni, “Remona myero dok i wi jo Kaldaya, pi watina ame gin oneko.”

³⁶Pi mannono Rwot me mony okobo ni, “Nen ba, an abino pido pirwu, dok daŋ abino culo kworwu, abino miyo pii i nam me Babulon two oko, ate miyo wan akoŋ iye luŋ daŋ two oko.

³⁷Babulon bino doko wi obur ame oyido ibim, kan ame ekwe bedo iye. Bino bedo twon kabedo moro arac ame mio jo lworo, kun ŋattoro mom bedo iye ka di acel.

³⁸“Jo Babulon luŋ bino kok karacel bala iŋatu, dok obino ŋuŋura karacel calo itino eŋatu,

³⁹kare ame gin owor wokkono abino teddigi arama, abino miyogi omato kono olok ote mer ame cunygi doŋ yom atata. Obino nino mom dok ote co atwal.

⁴⁰Abino terogi calo itino rommi, calo nyogi dyegi onyo nyogi rommi ame atero awot neko.

⁴¹“Babulon ame obedo twon boma adwoŋ ame wii lobo luŋ pako-ni, doŋ omako oko! Babulon doŋ odokoboma ame omio rok i wi lobo luŋ lworo meicel.

⁴²Pii nam doŋ ocore oko i kom Babulon, tugere me pii nam atagere kun mor tye awumo Babulon oko.

⁴³Boma iye luŋ doŋ odoko gin ame mio jo lworo, tye doŋ acalo tim ame otwo ikaŋ, ame ŋattoro daŋ doŋ mom bed iye, dok ŋattoro daŋ mom bea iye.

⁴⁴Abino keto can i kom Bel, ame obedo obaŋa me Babulon, dok abino kwanyo jami luŋ ame yam en omwonyo ame tye i doge. Rok luŋ mom dok bino medde ciro baŋe kite a yam con, apama cel me Babulon doŋ orette oko.

⁴⁵“Wun jo Icrael, rin wunu, iya wunu oko i kuno! Ijat acel acel myero nen ni erino elaro kwo mere i akemo a Rwot agwa meicel!

⁴⁶Cunywu myero kur poti, dok kur daŋ ibed wunu i lworo i kom kop ame ityeko winyo wunu-ni. Mwaka i mwaka kop apapat winyere i kabedo ducu, kop ame owuno kede jo i lobo, kede kop i kom abaka ame tye alweny i kom abaka ocele.

⁴⁷“Pi mannono ba, nen kare tye abino, kare ame abino keto iye can i kom jogi me Babulon. Lewic adwoŋ meicel bino mako lobo me Babulon luŋ, jo ame oneko iye, bino rette i dye boma.

⁴⁸Ginnoro luŋ ame tye i wi polo kede en ame tye i wi lobo bino wero wer me yomcuny pi Babulon, pien Babulon bino poto i cin jo ame bino bino me lweny i komgi kun ya i tutuŋ anyarodi, Man en kop ame Rwot okobo.

⁴⁹Babulon myero doŋ rette, pien omio jo Icrael apol meicel oto, Babulon ikome en ame okelo to i kom jo luŋ ame bedo i wi lobo.

⁵⁰“Wun jona ame itye wunu i Babulon, ame ibwot wunu abwota i lak pala me lweny, myero doŋ iya iwot wunu oko, kur dok ibed bedo wunu mot! Myero ipo wunu pi Rwot Obaŋawu, kadi bed itye wunu kannabor, wiwu myero po i kom Jerucalem.

⁵¹Kob wunu ni, ‘Omio lewic omakowa, pien owinyo kop acae ame ocaowa kede; odoko doŋ jo agoro meicel, pien orok doŋ omao kabedo acil oko ame tye i ot a Rwot.’

⁵²“Pi mannono ba, kare tye abino, ame abino ŋolo iye kop i kom jogi me Babulon, jo ame owaŋo bino bedo ŋuŋura i kabedo apol meicel ame tye i lobo me Babulon luŋ,

⁵³Kadi bed Babulon yit malo naka i polo, kadi bed cel paco mere ame tye malo-nono atek meicel, pwod abino cwayo jo ame bino balo oko. Man kop ame Rwot okobo.

⁵⁴“Koŋ iwiny wunu koko ame tye awinyere i Babulon! Winy wunu can ame opoto i kom lobo a jo Kaldaya.

⁵⁵Pien Rwot tye doŋ amiyo yi Babulon adoŋ nono, atyeko teko mere oko, te daŋ doŋ litj oko mot, Mony tye ka bino i kome oyotoyot calo pii me nam ame tye amor, obino me bino lweny i kome i twon wo adwoŋ meicel.

⁵⁶Gin doŋ obino oko me bino kelo can i kom Babulon, ocirikale mere me lweny doŋ omako oko, akud aterogi daŋ doŋ onununo oko atitino, An a Rwot Obaŋa en ame aketo can i kom jo pi balgi, abino culo kwor i kom Babulon pi bal ame jo mere otimo.

⁵⁷Abino miyo rwode mere mer oko, jo aryek iye, oloc adoŋo me lobo, odite ame telo mony karacel kede ocirikale. Gin luŋ obino nino oko atwal, mom dok obino co kadi acel. An abaka ame nyiŋa Rwot me mony doŋ atyeko kobo.

⁵⁸“Rwot me mony okobo ni, Cel me Babulon alac wok-ki obino muko oreto oko piny, dol dog cellege ame ocuŋ malo i gun-ni, obino wano oko i mac. Tic ame rok ocele obedo tiyo iye bino to nono, rok apapat kom obedo yelle i tic atek ame bino wan oko i mac.”

⁵⁹Ceraya wot a Deria, ame obedo wot a Maceya, rik obedo ŋat ame gwoko abaka Jedekia. I mwaka me aŋwen me loc a Jedekia abaka me Juda, Ceraya onwoŋo owoto i Babulon, adwarpiny Jeremia te kobbe koppogo ame myero en wot kede i Babulon.

⁶⁰Jeremia ocoo kop i kom can ame bino poto i kom Babulon i buk, kede koppogo ocele luŋ i kom Babulon.

⁶¹En okobbi Ceraya ni, “Ka ituno i Babulon, nen ni ikwano kop magi luŋ kite ame ocoo kede-ni baŋ lwak,

⁶²Dok myero ikwa Rwot Obaŋa ni, ‘Ama Rwot, rik onwoŋo ikobo ni ibino tyeko kabedo man oko, ame ginnoro ame tye kede kwo mom dok bino bedo iye, dano onyo lee, te doŋ bedo tim otwo ikan atwal.’

⁶³Ka doŋ ityeko kwano buk man baŋ lwak, twe gwen i kom buk man, ite bolo oko i dye kulo me Epurate,

⁶⁴kun ikobo ni, ‘Man en kite ame Babulon bino mwonyere kede, kun mom dok kato oko atwal, pi can ame abino kela ate keto i kome.’ ” Kop ame Jeremia okobo te gik kan.