Read lango Jeremia 52 Bible Online

Jeremia 52 - lango bible

Jeremia 52

¹Jedekia ocako loc ame mwaka me dittere oromo pyeraryo wie acel, en te cako loc i Jerucalem pi mwakki apar wie acel. Nyiŋ tottere Kamutal, nyaka a Jeremia me Libna.

²En obedo timo gin ame nen arac i nyim Rwot, kun lubo ginnoro luŋ ame pappere Yekoyakim obedo timo.

³Pien ake mo omako Rwot omio otuno kan ame doŋ mom romo kanyo, Rwot te bolo Jerucalem kede Juda oko tene, kun kwanyogi oko i nyime. Abaka Jedekia rik te cako jem oko i kom abaka me Babulon.

⁴I mwaka me aboŋwen me loccere, i dwe me apar, i nino dwe apar, en ame Nebukadnejar, abaka me Babulon obino iye i kom Jerucalem, kun bino karacel i monnyere luŋ, te bino guro Jerucalem oko; ote daŋ toro lobo guro oko irit.

⁵Jerucalem te bedo ame oguro oko kittono nakanaka i mwaka me apar wie acel me loc a Jedekia.

⁶I nino dwe aboŋwen, me dwe me aŋwen, onwoŋo kec doŋ orido jo atek meicel ame cam mom doŋ romo nen pi jo i boma.

⁷Jo te muko apama cel me boma oko, eka abaka kede monnyere te lwi riŋo oko dyewor, kun obeo i dogcel ame tye akina cel aryo me boma, ame tye i ŋet poto abaka, kadi bed rik jo Kaldaya onwoŋo oguro boma oko. Gin te lubo yo ame dok tutuŋ Araba.

⁸Cite mony a jo Kaldaya rik te ryemo yo abaka ote bino make i bar me Jeriko twal, monnyere te ket wekke kene.

⁹Mony me Kaldaya te make kele naka baŋ abaka me Babulon i Ribla, kan ame ote ŋolle iye kop.

¹⁰Gin te cako neko awobe mere i nyime kun en aneno kede waŋe,

¹¹ote lokere i kome loyo waŋe oko, ote tweye kede jegere tere i Babulon. Ote wot kette i ot can, kan ame en te bedo iye tuno naka i nino me to mere.

¹²I dwe me abic, i nino dwe apar, ame obedo mwaka me apar wie aboŋwen me loc a Nebukadnejar, abaka me Babulon, i nino-nono, Nebujaradan, adwoŋ ame loo jo ame gwoko abaka me Babulon, owoto i Jerucalem.

¹³En te wano ot a Rwot oko kede ot abaka, kede udi luŋ ame onwoŋo tye i Jerucalem; en owaŋo udi adoŋo luŋ kede mac.

¹⁴Mony a jo Kaldaya luŋ ame rik onwoŋo tye baŋ adwoŋ ame loo jo ame gwoko abaka, gin te muko apama cel me Jerucalem oko.

¹⁵Nebujaradan, adwoŋ ame loo jo ame gwoko abaka, te tero jo luŋ ame onwoŋo rik oweko i Jerucalem iyi opii, jo ame rik oya oko i baŋe te lokere baŋ abaka me Babulon, karacel kede lwak ocele luŋ, gin luŋ ote terogi oko iyi opii.

¹⁶Cite en rik te weko jo mo go ame ocan doŋ kuno, me gin bed jo ame gwoko poto kede opur i kweri dyaŋ.

¹⁷Jo Kaldaya rik te tuturo pagi aryo me mola ame rik onwoŋo tye i ot a Rwot kede gadigadi atitino, kede nam me mola ame rik tye i to a Rwot, gin oturo ote ŋinyo atino, ote tero luŋ i Babulon.

¹⁸Gin otero gulli apipim, atok mac, makac, tako me wano odok akur, karacel kede jami luŋ ame rik onwoŋo otio kedgi i ot a Rwot,

¹⁹kede wer me lodi mac, kede becen, En otero jami luŋ ame otio i jabu acalo jabu, kede en ame otio i ryal acalo ryal.

²⁰Aco kop ame mako dero pii aryo kede nam acel kede gadigadi atitino ame rik Culeman otio me ot a Rwot, mola ame odonyo i komgi dwon meicel ame pekkere mom romo pimmere.

²¹Pagi acel acel borrere tye futi apyeraryo wie abiro.

²²I wie malo onwoŋo oketo iye tok me mola ame borrere romo futi aŋwen kede nucu. I kom tok ote dok keto iye bao kede cal pomegranat, kun gin luŋ otio i mola oguro tok i dyere. Pagi me aryo daŋ onwoŋo rom aroma kede awottere, tye daŋ i tokkere kede boo mere me mola.

²³Cal pomegranat onwoŋo romo pyeraboŋwen wie abicel, kun tye i neye luŋ, gin luŋ onwoŋo doŋ tye mia acel.

²⁴Adwon ame loo jo ame gwoko abaka otero baŋ Ceraya, ame onwoŋo obedo alamdog adwoŋ, kede alubbe Jepenia, kede okur doggola me ot a Rwot adek.

²⁵Dok te tero daŋ adwoŋ ame onwoŋo loo mony, karacel kede jo abic, ame obedo omemba me cokere abaka ame rik onwoŋo tye i boma, kede aran adwoŋ me mony, ame rik obedo ŋat ame coko jo pi lweny; kede jo pyerabicel ame obedo jo me lobo-nono, ame gin onwoŋo otye i boma.

²⁶Nebujaradan, adwoŋ ame loo jo ame gwoko abaka, omakogi te terogi naka i Ribla baŋ aba ka me Babulon.

²⁷Abaka me Babulon te nekogi oko luŋ i Ribla, i lobo me Kamat. Mannono en kite ame rik okwanyo kede jo Juda i lobogi ote terogi iyi opii.

²⁸Man en wei jo ame yam Nebukadnejar, abaka me Babulon omako te tero oko iyi opii: I mwaka me abiro otero Ojudaya ame romo tutumia adek kede pyeraryo wie adek.

²⁹I mwaka me apar wie aboro me loccere en otero jo ame romo mia aboro kede pyeradek wie aryo, kun okwanyogi i Jerucalem.

³⁰I mwaka me pyeraryo wie adek me loccere, Nebujaradan, adwoŋ ame loo jo ame gwoko abaka otero Ojudaya ame romo jo mia abiro kede pyeraboŋwen wie abic. Wei Ojudaya luŋ ame oterogi iyi opii, ka oribogi karacel romo tutumia aŋwen kede mia abicel.

³¹I mwaka me pyeradek wie abiro, cakere i kare ame otero kede Yekoyakin abaka me Juda iyi opii, i dwe me apar wie aryo, i nino dwe pyeraryo wie abic, en ame Evil-Merodak, abaka me Babulon otimo iye Yekoyakin, abaka me Juda, kica. En ogonye oko i buc i mwaka ame en ocako iye loc.

³²En te bedo kop kede kica meicel, te kette bedo i wi kom ame dwon akato ducu iyi akina kome ame rik oloc bedo iye i Babulon.

³³Mannono omio Yekoyakin ogonyo bono me buc oko i kome. Cakere i nino-nono, en doŋ te bedo cam i wi meja abaka nino i nino pi kare me kwo mere luŋ.

³⁴Abaka me Babulon rik te bedo miye lim me konye nino i nino kite ame en mi to, tuno ka en oto.