Read lango Jeremia 7 Bible Online

Jeremia 7 - lango bible

Jeremia 7

¹Kop a Rwot ame rik obino baŋ Jeremia kobo ni,

²“Cuŋ i doggola me ot a Rwot, me irab kop man kuno, kun ikobo ni, Wun jo luŋ me Juda ame donyo i doggola magi me wot woro Rwot, winy wunu kop a Rwot.

³Rwot me mony, ame obedo Obaŋa a jo Icrael okobo ni, Yik wunu kitewu kede ginnoro luŋ ame itimo wunu, an abino weko ibedo wunu i lobo man.

⁴Kur ibed geno wunu kop me gobagoba ame otye ka kobbiwu, ni, ‘Man ot a Rwot, man ot a Rwot, man ot a Rwot.’

⁵“Pien ka ce iyiko wunu kitewu kede ginnoro luŋ ame itimo wunu ateteni, kun iŋolo wunu kop atira i akinawu kenwu kenwu,

⁶ka ce mom ibedo wuno wunu jo ame bedo i akinawu, itino kic, onyo mon to, kun mom daŋ ionyo wunu remo a mom i bal i kabedo man, dok ka ce mom ibedo woro wunu obaŋa mogo ocele ame twero miyo can poto i komwu,

⁷mannono bino miyo awekowu ibedo wunu i kabedo man, i lobo ame rik doŋ atyeko miyo con baŋ kwariwu me bedo megi atwal.

⁸“Nen ba, itye wunu ka geno koppogo me go ba ame konygi mom.

⁹Ibino kwala wunu kwo, neko jo, codo cot, kwono kwoŋ me gobagoba, yalo Baal i gin ame ŋwece kur, kun daŋ itye wunu ka woro obaŋa mogo ocele ame yam mom iŋeo wunu,

¹⁰eka dok ite bino wunu cun i nyima i ot man, ame olwoŋo i nyiŋa, eka ite kobo wunu ni, ‘Wan doŋ olarowa oko!’ Ento kun itye wunu ka medde itimo tim man me kwer?

¹¹Iloko wunu ot man ame olwoŋo kede nyiŋa-ni odoko aduu oyak bo? Nen ba, an Rwot ikoma doŋ atyeko neno ni tye kittono.

¹²Aman myero iwot wunu i kabedona ame rik tye i Cilo, kan ame rik koŋ ageo miyo bedo kan ame owora iye, me iwot inen wunu gin ame atyeko ti mo kuno pi tim areco a jona Icrael otimo.

¹³Aman doŋ ba, pien itimo wunu jami magi luŋ, dok i kare ame abedo kop kedwu tere i tere, wun mom iwinyo wunu koppa, i kare ame alwonowu, mom igamo wunu doga, man kop ame Rwot okobo,

¹⁴mannono omio abino timo i kom ot man ame olwoŋo i nyiŋa, dok ame igeno wunu-ni, kede i kom kabedo man ame rik amiowu kede kwariwu, gin ame atimo i kom Cilo.

¹⁵Abino ryemowu oko i nyima, kite ame aryemo kede jo turwu ame obedo ikwae Epraim oko i nyima.

¹⁶“Aco yin Jeremia ba, myero kur ikwa pi jo man, kur daŋ itiŋ dwoni malo ni ikoko onyo ikwaya pirgi, kur daŋ item bako dogi baŋa pirgi, pien mom gira atye ka ci ko yita baŋi.

¹⁷Mom ce itye ka neno gin ame gin tye ka timo i boma luŋ me Juda kede i dye yo ame tye i Jerucalem?

¹⁸Itinogi rao yen, papo te kuto kede mac, kun mongi tye ka jebo moko me tedo ogati pi abaka a dako me polo; dok daŋ oyalo-gu obaŋa mogo ocele kede motgi me ama ta, me gin omi akemo maka,

¹⁹An en ame gin tye ka roko doge-nono? Man peny ame Rwot openyo, Mom gin i komgi en a doŋ obaŋere oko-nono?

²⁰Mannono omio Rwot Obaŋa okobo ni, Nen ba, abino coro akemona kede inigana piny i kom kabedo man, i kom dano kede i kom leyi, i kom yen ame tye i tim kede i kom cam ame ocek i potti; maccere bino waŋ ame mom oromo neko.”

²¹Rwot me mony, ame obedo Obaŋa a jo Icrael okobo ni, “Med wunu mot awaŋawu i kom motwu ocele mege, me icam wunu riŋo.

²²Pien i nino ame rik akwanyo kwariwu iye i lobo me Miciri, mom rik akobbigi kopporo i kom mot awaŋa kede mot ocele mege, mom daŋ acikogi pire.

²³Ento rik acikogi ni, ‘Winy wunu koppa, an abino bedo Obaŋawu, dok wunu ibino bedo wunu jona; dok daŋ myero ilub wunu yo luŋ ame acikowu me lubo, me ibed wunu aber kun itye wunu kede kuc.’

²⁴Cite gin rik mom oye lubo gin ame aciko, dok mom ociko yitgi me winyo koppa, cite obedo lubo gin ame cunygi mito, kun daŋ olubo gin ame yigi mito ame opoŋ i ti mo gin arac; ote bedo wot kun odok adoka cen, aboŋo wot anyim.

²⁵Cakere i nino ame kwariwu oya kede i lobo me Miciri tuno kede tin, abedo cwayo baŋgi omirona ame obedo odwarpiny tere i tere, nino i nino;

²⁶cite gin gigi mom oye winyo koppa, akadi yabo yitgi me winyo koppa; ento ŋutgi en ame oluŋyo bedo anwaŋ. Gin te bedo timo gigi mogo areco ame kato kwarigi oko.

²⁷“Doŋ yin myero iwot ikob kop magi luŋ baŋgi, cite gin gigi mom obino winyo koppi. Ibino lwoŋogi, cite gin mom obino gamo dogi.

²⁸Yin doŋ ibino kobbigi ni, ‘Man en rok ame rik okwero winyo kop a Rwot Obaŋagi, dok daŋ rik mom oye ni yik balgi; kop me ateni doŋ orwenyo oko i baŋgi: mom doŋ winyere kadi acel i doggi.’

²⁹Lyel wunu yer wiwu me ibol wunu oko teŋe, cak woo wunu i koko i kabedo ame odoŋ nono i wi kiddi malo, pien Rwot doŋ otyeko kwero lwak man ame akemo omake i komgi-ni, dok otyeko daŋ doŋ wekogi oko!

³⁰“Pien jo Juda doŋ otyeko timo gin arac i nyima, dokoketo timgi me kwer i ot ame olwoŋo kede nyiŋa, me balo oko, man kop ame Rwot okobo.

³¹Gin otyeko gero kabedo mogo me woro jogi i luŋ a wot a Kinom ame olwoŋo ni Topet, me waŋo awobegi kede anyiragi i mac, ame an gira rik mom acikogi pire daŋ rik mom atamo pire kadi acel.

³²Pi mannono ba, nino tye abino, ame mom dok obino medo lwoŋo kabedo-nono ni Topet, onyo ni luŋ a wot a Kinom, cite ni luŋ me neko jo, pien obino yiko jo i Topet, pien kabedo moro ocele nwoŋo doŋ mom, man kop a Rwot.

³³Kom jo oto bino doko cam a winy ame twarre malo, kede me a leyi ame bedo i lobo; mom tye ŋattoro ame bino ryemogi iye.

³⁴Abino giko oko i boma luŋ me Juda kede i dye yo luŋ me Jerucalem woo me yomcuny a jo, yomcuny ame anyom tye kede karacel kede me atera; pien lobo-nono bino doko wi obur ame tye nono.”